EZRA 1 - KHYINGEI PU'TLOU Bible (BSI)

Cyrus'ne Khulpao Paothutkur

¹ Persia'yei Krung Cyrus'ne krung hoiyei lamkri kumrou, Umpune Jeremiah'yei murne shunthutyerkhou tloulhang rapya chimne tlungyernanungei khoine, Umpune Persia'yei Krung Cyrus'yei ukningya toufyoukur; heirouri ane aiyei Krungram karyoune khulpao chilbine paothutyerkur, heitoubi mayekhi mayethutbine atoubi kyun:

² “Persia'yei Krung Cyrus'ne atoubi yunlei: Thangmunrei Dunpu, Umpune tlaipangpallei Krungram namma heiri keinungei piwurla, heirou Ane keiyari Judah'yei rilla klei Jerusalem'rei Pucheemkhi sabaangnanungei watlhoukhi silnawurla.

³ Heineri huhuni naihangra Aiyei thimirap yaowanungri, aiyei Dunpune aya kalhonpilaksu! Ane Judah'yei rilla klei Jerusalem'ra kabine, heitoubi Israellei Dunpu, Umpuei Pucheemya hanui kallengni sabaangthulaksu. Ari Jerusalem'ra thrungpi Dunpu.

⁴ Heisitoubi himaleithungkur thimi rapne kourou-kourou ramtangbine loukleiya hoiyasu, yane ai'aiyei manicha hilthungne, airamyei thimi rapne sina-lapakhi, heengro, heirou ui-waa rapya urthutrilbine aya trungpilaksu. Heitoubi heiyakhi duinara, mimiyei ukningra pi'kni pi'knine makatthutrilbine, Jerusalem'ra klei Pucheem sabaangnara trungpilaksu.”

Khyingei Shungyang Rapya Mallenglhakpithu

⁵ Heirouri Judah'le Benjamin cheemkhur upa raple, Levia raple, suipipu rapkhi, heirou Dunpune ukning thoubaangpikur thimirap nammani kanthoubi, Jerusalem'rei klei Pucheem heiwaya hanuikhi sabaangna'nungei kakur.

⁶ Heitoubi yaipongra leimalkna thimirap nammanekhi, ai'aiyei klei putcheirap, sinakhi-lapakhi, heengro khoinekhi, ui-waa khoinekhi, heirou manklu putcheirap khoinekhi urthutrilbine, yaiyaiyei ukningra pi'kni-pi'knine pithutbine yaya trungpikur.

⁷ Heirou Cyrus'nekhi Babylon'yei Krung Nebuchadnezzar'ne Jerusalem'rei luklouheibi Babylon'ra aiyei thraishangra khoulhakkur Umpuei Pucheemrei Khyingei shungyang rapkhi louthutbine pithutkur.

⁸ Heirou Persia'yei Krung Cyrus'ne shungyangrap heiwaya Shellungwa Mithredathyei hutra pithutkur, heitoubi ani heirapya kansherthutbi Judah'yei krungcha Sheshbazzar'yei hutra pilhakbine silnakur.

⁹ Heiyei shungyang rapbei mshingri awariya: sina chaakpang lishing'khat, kulshan chaakpang lishing khat, shonlu'msui somnile tako.

¹⁰ Heirou Sinaei kulpak somthum, heithangei kulshanyei kulpak macha phali'le chip; heirou deidei putlam rapkhi lishing khatkhi kyao.

¹¹ Heinaksi sinaei heirou kulshanyei shungyangrap namma heiri lishing phangale macha phalibil awaya Sheshbazzar'ne mshing sherthutbine, heitoubi heirapya Babylon'rouweine Jerusalem'ranung yenshalthutkur raalmankur thimi rapbei hutra pithutbine yenyerkur.