EPHESIA 2 - KHYINGEI PU'TLOU Bible (BSI)

Khi Chaan'rouwei Khring Chaan

¹ Bongnungri nari shunya ningmaknei heirou borhrei lhouya tounei ngamrou lhawaira hibine leikhou.

² Heiyei kheenrouri nane tlaipangei lhangaimak lamra chanthungkhou; heirou Dunpuei shunya ningmak thimi rapbei doura paalbi klei thangwanrei toumane purap touri lhangaimak lhawaiya hilthungbine leikhou.

³ Heinakrimni ka namyerwakhi kaikaiyei sharungei toukniya heirou ukningei maduyadik toubine leikhou. Kaiyei sharungei kningya tounei ngamrou, thimi napung kantangne Dunpuei malungkhaei daakra klah-knang dourouri leiyura.

⁴ Heiya Dunpuei kringpi heiwari kalthi dunlei, heirou Aiyei kaya malungshipi heiwari beimakni tanglei,

⁵ touri kane shunya ningmaknei ngamrou bongnung kheen khatrou lhawaira hibine leikhouweinung Ane Christa'ra kaya khringei chaanra ruilhakpiwurla. Ari Dunpuei kringpinei ngamrou nayakhi kalpi phayerpi.

⁶ Christa Jesule kalhonnei ngamrou kane Thangmunra Ale pulne paalna'nungei Ane kaya ringmalnayerpila.

⁷ Lhou awari hillei hungrou kyou kum rampha heiroukhi Christa'ra kanungei Aiyei kwat naimak malungshibi kringpikur heiwaya klui naimakne mutpinanung toume.

⁸ Kouweiyo toulanungri, uklumnei ngamrou naya Dunpuei kringpikhei heiwane kalpikur. Awari naitammei lhou lhangainei nimak, heiya Dunpuei man naimakei hutthul.

⁹ Awari lhou-lhangai tounei ngammei nimak, heinung'tlim thimi hukhatnikhi tangchanung bom thukmak.

¹⁰ Dunpune kai klei arou heisi hoiyerpila, heitoubi kane Christa Jesule kalhonnei ngamrou Ane kayari khring chaanyei lung lhangai hoiyerpila, awari lamkrine kaya touyernanungei Ane marshikkurkhoula.

Christa'ra Khatsi Khoini Klei

¹¹ Nari puknarei Gentile khoi, heitounei ngamrou nayari “murdinmak thimirap” toubi Jehudia rapne unglei, heirou yaitamyari “murdin thimirap” toubine ungnalei, heinakrimni bongei youkna naiyei chaan rapya yuk'khalthilak.

¹² Heiyei kheenrouri nane Christa'rei tlatrilni leikhou. Heineri nari kheen heinungri Dunpuei khalthutkur thimirap hoimakni miram-mithrillei thimi naksine hoikhou. Heine nari Dunpune Aiyei thimi rapnung tlou kantombi mardingkhounara nai siruk koukhatkhi leikhoumak, heitoubi nari tlaipang arou kouroukhi malungamkna makni heirou Dunpu yaomakne leikhou.

¹³ Heiya asinungri, nane Christa'le kalhonnei ngamrou, tlatnara leikhounarei Christa'ne leemni hipibi makatpiwurnei ngamrou, naya Ane yenruibi karnakyerwurla.

¹⁴ Ngamri Christa'ne khintamrekya khatsi khoine thikkartilbi ka namyerrei doura kying yenpiwurla. Aiyei sharunghakya Ane baiyerbine khatle-khat karhourilnei paltangya nambaiwurla.

¹⁵ Ahakne Jehudi rapbei Tloulamyei chaytloule heirou yai youkna rapya toumitdurbi, lim khintam heiya Anungei limkhat hoiyerna'nungei Ane kyingne leiyerwurla.

¹⁶ Ane heeng karbak doura hipiwurbi, Christa'ne yaiyei karhoukril heiwaya mityerwurla; Cross'yei ngamne lim khintam heiya sharung khatsi hoiyerbine, Dunpuei bomra ungmallengpila.

¹⁷ Heisi toubine Christa'ne thimi namyernung kyingei Lhangai Pao-laaya paothutpila- Dunpurei tlatrilbi leikhou Gentile'rap nanungkhi, heirou Aiyei pongra karnakrilbi klei Jehudia rapnungkhi shunthutpila.

¹⁸ Christaei ngamne ka namyerwa, Jehudia'khi heirou Gentile rapkhi, Lhawaira khatsi khoine Pawaei bomra wachangkur maneyura.

¹⁹ Heiyanungri, Gentile'rap nakhi asinungri miram-mithrillei thimi'rap, nimanung ramtang thimirap naksine hoimakarou; heiya asinungri nakhi Dunpuei bomra cheemmai khatdei teinaorap naksine, Aiyei thimi raple ram khatra leimalkna thimi naksine hoiyura.

²⁰ Nakhi paocha thimirap heitoubi Thimkhui rapbei thulbaangkur cheemmun doura sabaangkur cheem naksine hoiyura, heirou cheem heiyei shutlairi Christa'ne hoilei.

²¹ Ahakne cheemrong namyerwaei hungsuikartukna hoilei, heitoubi Dunpu'nung khyingei makatkur Cheemya tangbaangyerlei.

²² Heineri nakhi Christa'ra Dunpuei Lhawaine thrungbi leina Cheemya thimi deile kalhonne pulne sabaangnara yaowura.