DANIEL 9 - KHYINGEI PU'TLOU Bible (BSI)

Daniel'ne Thimi Rapnung Shunchakur

¹ Medea yu-charei yenrankur Xerxes'yei chanapawa Darius'ne Chaldea'yei krung hoiyei lamkri kumrou,

² Daniel keine, Pu'tlou latbine pathinarouri, Umpuei tloulhangni thimkhui Jeremiah'nung shunthutkur heiri kum somret rillou Jerusalemri tlumni mangchirouwa toubi kyunya karthangkur.

³ Heitounei ngamrou keine Pu Dunpu'nung kalleklhakbine, chara yilbi, phichun upbine heitoubi lura rahui chaiphangbine shunchabi buchakur.

⁴ Heirou keine keiyei Pu Dunpu'nung ukning hungbine kyun: “Ulleiyo, O Pu Dunpu, Toumani-Mantrang, chi'kna shakrungei Pu Dunpu, Aiyei Mardingkril tlouya kngak Pu, Aya malungshi heirou Aiyei chaylam rapya kngak thimi rapya malungshipi Pu, kringpikhei Pu Dunpu;

⁵ Kane Neiyei Chaylam'rap heirou Neiyei Kulyom youkna lammit rapya khingurkhoubi, khril-thuithini raal youbi, lhangaimak borhyei lhouya touwurkhoulame.

⁶ Heiyakhi duinara, Neiminra kaiyei Krung rapnung, krungcha rapnung, kaiyei patar rapnung heirou ram heiyei thimirap nammanung Pu'tlou shunthutpi Neiyei shikrui thimkhui rapbei shunyakhi ninglhakpimakura.

⁷ Tharmu chimri Neinungei klei, O Umpu, heiya angturi kanungeiri rikraiknani bil thimmura, Judah'yei thimi rapnung, Jerusalem'ra paalbi klei thimirap, heirou Israelrap heirou Nangne hulchekurbi ram nammara, naknara heirou tlatnara paalbi klei thimirap namanungeiri beimakne rikraikna hoiyura; ngamri yani Neiya karhani malungamnamakei lhouya touwurla.

⁸ Kanungeiri, O Pu Dunpu, kale kaiyei krungrap, krungcharap, heirou kaiyei patar rapri rikraiknani mai khumphopkura, ngamri kani Neidoura karhani borh touwurkhoula;

⁹ Heiya kaiyei Dunpu Umpuri kringpikhei heirou kukpikhei Pu; kouweiyo toulanungri kani Neiya karhani raal youwurkhoula;

¹⁰ heirou Aiyei shikrui thimkhui rapne kai maibongra marnopikhou Aiyei chaylam rapya kani hil chanthungmakura.

¹¹ Heinung'tlimri Israelrap nammani Neiyei houya ninglhakpimakne lehni kallekthutdurbi Neiyei ayilya touborhwurla. Heitounei ngammei mancho heiri kaidoura yongdawura, heitoubi heile kalhonne Dunpuei shikrui Moses'yei chaylamra mayelhakur tloukantom heiwakhi kaidoura yongdawura; kouweiyo toulanungri kani Aya karhani borhlhou touwurkhoula.

¹² Kaidoura hungthuknungei Aiyei shunthutdurkhou heiwari chimni hungthukura, heitoubi kaidoura pu khoini thrungbi klei thimi rapbei dourakhi tangni klah-knang, deekbai thukyerwurla; kouweiyo toulanungri nungthou daakra karyouni Jerusalemra touwurkhou lhounaksiri dei kourakhi thukkhoumakhui.

¹³ Mosesyei ayilra mayewurkhou heinaksine klah-knang, deekbai thukwurkhou namma heiri kaidoura yongdawura; heisiya hoiyanungkhi kani kaiyei khril lhangaimak lhourouwei kallekthutdurbi kaiyei Pu Dunpuei kningya raphabi, Aiyei chim tlouya ninglhakpi toukhi maklei.

¹⁴ Heingammei Umpune klah-knangya marpeilhakbi kaidoura yongdayerwurla; kouweiyo toulanungri kaiyei Dunpu Umpuri Aiyei lhoulam kantangrou tharmu chimni touthutpi, heiya kaneri Aiyei kyunya chanthungkhoumak.

¹⁵ Asinungri, O kaiyei Pu Dunpu, Neiyei mane-mantrangei hutni Neiyei thimi rapya Egypt ram'rouwei yenruithutpikur, heitoubi asilumpha Neiyei thang'alri minchabi leileihui, heiya kaneri borh touwurla, heirou khril lhangaimakei lhouya touwurla.

¹⁶ O Pu Dunpu, Neiyei tharmuchim hilthungni, Neiyei meithukei malungkhakur heiwari Neiyei Kholil Jerusalem, heirou Neiyei khying Lhungdourei louthutdurlaklo. Kouweiyo toulanungri kai patar rapne borh touwurnei ngamni, Jerusalemle aiyei thimi rapyari kaya karhillei klei thimi rapne laonawurbi rikrai piwurlame.

¹⁷ Heineri O Dunpu, asinungri Neishik keine trungpinanungei shunchakurya louningpilaklo; heitoubi Neiyei minnungei tlim mangbi leikur Khying Pucheemnung Neiyei mairung-thang'alya yuk'alpilaklo, O Pu Dunpu!

¹⁸ O keiyei Dunpu, Neiyei khnale solungya latbine keiya ninglhakpilaklo! Neiyei mitlung mingbine heitoubi kanungei thukkur klah-knang rapya heirou Neiminra phunbaangkur khukarthilra thukkur deekbai rapya yukthipilaklo. Kouweiyo toulanungri kani lhangai-tharmu chimnei ngamrou Neinungei buchakuri nimakme, heiya Neiyei kringpikhei heiwaya kani shuncha-buchakurame.

¹⁹ O Pu Dunpu, louningpilaklo! O Pu Dunpu, kukpilaklo! O Pu Dunpu, ninglhakpilaklo; heitoubi lhou touthutpilaklo! Neiyei min heirou thang'alnung'tlim, touthilpilaklo, O keiyei Dunpu; ngamri Neiyei khukarthilni heirou Neiyei thimi rapne Neiminya ungurlame.”

Gabriel'ne Tlou Mallangpi

²⁰ Keiyei Dunpu Umpuei maibongra keiyei borhya heirou keiyei thimi Israel rapbei borhya shunthutbi ukning hungbi heirou keiyei Dunpuei Khying Lhungdou heinung'tlim shunchabi leiyei kheenrou;

²¹ keine lamkrini rmongra kar'anmukur napawa Gabrielni rawaiyei malamput makatlumei kheenrou heitrainakni keipongra khnotni wachangkur.

²² Heitoubi ani keiya shunmatubi keinungei atoubi kyun, “O Daniel, asinungri keine neinungei khyal-roushingya pibine phab dayerrou wakurame.

²³ Nangne shuncha waikyoule, neinungei tlou mallangpiwurlame, heirou keine neinungei shunpinung wakurame; ngamri neiyari Dunpune yapiwurla; heineri paolaa heiwaya louninglhaklak, heitoubi rmongei arthaya phab dalaka.”

Hapta Enitamya mu'kna

²⁴ “Neiyei thimirap heirou neiyei khying kholilyei ngamrou klal lhou toukurya thikmalleng'nungei, borhlhou touya dongyerna'nungei, heirou mralya kukpina'nungei, klui naimak tharmu chimmei lhouya yenlhakna'nungei rmong kman heirou kar'ankmu tlouya shunthutpi hungdongna'nungei, heirou Khyingei Biya shirek teipinanungei kheenya kartinbine hapta eniyei kum kartinwurla.

²⁵ Heineri neiyei mulhaknungei bomri, Jerusalem'ya mallenglhakbi hanui kallengni sabangnanungei mardingbi chay pithutkur tlaini heirouwei waiyoubine, shirek teipikurwa Krungei Chanapawa heini yongnei tlaini phane hapta'eni hoirou; heitoubi heihillouri hapta somrukle-khniyei rillouri lamtang, heirou khullam, heirou tuykung rapkhi sheemlhakrou, heiya kheen heiwari klah-mrimei kheenrou hoirou.

²⁶ Hapta somrukle-khni hillouri Shirek Teipikur heiwaya hatdurbi koukhi makrouwa; heitoubi hungrou kyou Krungchaei thimi rapne Kholille heirou Khying Pucheem heiwakhi toumaangrouwa, heirou kluiyei kheen heiwari tuyshun'nakni yenkungthutrou. Kheen heirouri raalkhi hungthukrou, heitoubi chi'knani bil thimrou.

²⁷ Heirou ani hapta khatnungei khoini thimi chungwanungei krakni tlou mardingpirou, heiya hapta heiyei tlailam hungtlungeinung Ane meira hongbi malamput makatkhi heirou trunwaiyei lung malamput makatkhi toudongeirou; heitoubi heihillouri mangnanungei chay piwurkhou hilthungni mangyernanungei watyillouwa.”