DANIEL 8 - KHYINGEI PU'TLOU Bible (BSI)

Yaopa Heirou Tlangpa Kar'ankmu

¹ Belshazzar'ne Krung khoini thrungei kheen kum-khyum tlungeinung, keinungei kar'anbi rmong khat loumuyerkur. Lamkriyei kar'anmukur hilloukhi Daniel keinungei hanuikhi kar'anbi loumuyerkur.

² Keine rmong heiwaya kar'anbi muyeinungri, Elam krungramei kholil Susa'ra leiyei kaallou, Ulai kungpaalra mayungbi leiyeinung loumukur.

³ Heirouri keine mangalthutbi thinarouri, thilak, chee khintam klei yaopa khat kungpalra mayungbi kleiya keine mukur. Chee khintam heiri shang, heiya chee paangkhat heiri pangkhatreiya duini shaang, chee heiri hillei katpukthut.

⁴ Yaopa heini kulrel lhangra, khalu lhangra, heirou khate lhangrakhi kallekbine aiyei cheene khotbi klei heiwaya keine mulhakur. Kounaksi yaa khatnikhi aiyei maibongra loumayungchangmak, heirou hukhatnikhi aiyei mantrangkur hutrei kalthutchangmak; heiya aiyei kningya heisi toubine aitamtomya mathumbaangbi tangyerkna.

⁵ Heirou keine heisi thibine leiyeinung, tlangpa khat kulrel lhangrei kathuk keine loukmu. Tlangpa heiyei machalra mitlung khintamei tlakra chee tangkhat puklei. Tlangpa heini aiyei horap heiri thleirakhi yongdamakne tlaipangpal karyouni shaikoolbi kathuk.

⁶ Heirou tlangpa heiwane chee khintam klei yaopa, keine lamkriyei loumukur kungruira klei yaopa heiyei lhangra meithukni malungkhawurbi chanlhakbi karsulkur.

⁷ Heirou keine louthinarouri ani tlangpa heini yaopaei maibongra chanlhakbine heitoubi aya chee khintam washudeekkur heiwaya keine mukur. Yaopa heiwari aiyei maibongra mayungbi lousouchangmakura. Heisitoubi tlangpa heini aya thleira shutluiwurbi hopaakni tatchunkur; heisi tounarouri hukhatnikhi yaopa heiwaya aiyei mantrangkur hutrouwei kalthutpirou yaomakura.

⁸ Heirouri tlangpa heini aitamya beimak tangni mathumbangurla. Heiya aitam mantrang katduikurle tallengni aiyei chee'bal tangwa heiri deeksundawura, heitoubi heiwaei bira heiyei rungkhlangra chee phalitam nungthou pulphali lhangrei katpukthutkur.

Chee Mandicha

⁹ Heirouri chee phalitamei hangrouwei chee mandicha khat katpukthutbi, beimakne katmantrangkur, heitoubi khate lhangra, kulkung lhangrakhi heirou thang'allei lhangai lamrakhi akou parillou yaomakne mantrangkur.

¹⁰ Heirou ani nungthou katokni kattangbine heitoubi nungthourei Thangringrap thaya toufyoubi heitoubi sorwa thaya thleira khingsundakur, heitoubi yaya hopaakni tatphopburpi.

¹¹ Heirouri chee mandicha heini aitam mathumbangchabi thangwanrei raallui Chaylam Pu Dunpuya malnayerkur; heitoubi Dunpu'nungei tlainiserrei makatput makatbi klei heiwaya ani toudongurpi, heitoubi Aiyei khying Pucheemya tangthresundakur.

¹² Thangwan raallui rapbei borh touwurnei ngamrou heirou tlainiserrei malamput makatbi klei heiwari chee mandicha heinungei pilhakrouwa; heitoubi ani tharmu chimya thleira khingsundarouwa, heirouri aiyei toubi klei lhoulam kantangra tangbaang-choubaangrouwa.

¹³ Heirouri khying Thangring khatni tlou kyunya keine mayeklhakur; heitoubi Thangring khatni lamkri Thangring heiwanung heikyun; “Kar'ankmu tloubomrei malamput makatya toudongkur thuithiyei raal younei deekbai thukyerkur, Khyingei Pucheemya tangthresundakur heirou Thangring rapya thleira khingsundawurbi hopaakni tatmnuikur heiri kounak tlani thukheirouwo?”

¹⁴ Heirou ani loumallangbi anung shun, “Awari masa-nunghang lishing-khnile macha-khyum hoirou; heihillouri Khyingei Pucheemya marthingthutbi loulhakthurou.”

Daniel'ne rmongya artha shunthutpi

¹⁵ Heirouri asitoubi hungthukura, touri Daniel keine rmong khat kar'anmukur, heirou keine heiyei arthari kouwo toubi munanungei raphakur. Heirouri thilak, keiyei maibongra tlaipang thimi kmal napawa khat mayungbi heiklei.

¹⁶ Heirou Ulai kungrui khintamei tlakrei tlaipang thimiyei hounaksi khat: “Gabriel, napawa heinungei rmong heiyei arthaya bei shunpilaklo!” toubi heikyunya keine loumayekkur.

¹⁷ Heisitoubi ani keiyei mayungna pongra hungchangkur, ani keipongra hungchangkur heirouri keiri chi-mathunwurbi thleira keiyei mai sikhuplhakur, heirou ani keinungei, “Thimiyei chanapawa, rmong heiri tlaipang hungdongrou younei kheenya mu'kname touri mulaklo,” toubi heishun.

¹⁸ Heirou ani keinungei heisi tlou yunyeinung, keiri thleira keiyei mai sikhuplhakbi chetni louiplhakur, heiya ani churloubine keiya khangkanthoukur.

¹⁹ Heitoubi ani keiya shun, “Thilak, kluiyei kheenrou Dunpuei meithukni malungkhaeinung kou hungthukrouwo touri keine neinungei yunpiyeise, kouweiyo toulanungri neiyei rmong heiwari hungluinanungei kartinkur kheen heiwaya mu'kna.

²⁰ Neiyei rmongra loumukur chee khintam klei yaopa heiri Mediale Persia'yei Krungrap khintamya mu'kna.

²¹ Heirou khmul'tabur tlangpa heiri Greece'yei Krungbomya mu'kna, heirou aiyei mitlung khintamei tlakrei chee tang heiwari Greece'yei lamkri krungya mu'kna.

²² Heitoubi deekkur chee, heirou heiyei bira katpukthutkur chee phalitam heiri Greece'yei Krungbomrei kathukrou kyou Krungbom phalitam heiyei rungkhlangya mu'kna, heiya yarap heiri lamkriyei Krungbom naksine mantrangmakrou.

²³ Heirou yaiyei krungchaan hungluiyei kheenrouri heirou khril thuithiyei lhouya kalthi touyei kheenrouri, rikrai mumak heirou mandalkhei Krung khat kathukheirou.

²⁴ Heitoubi krung heiwari beimakne mantrangrou, heiya mantrang heiri airouwei hoimakrou. Ane deekbai thukyerbi thuithini mang-taakyerreirou; heitoubi aiyei kningni aithukpa toubine tangbaang-choubaangeirou. Heitoubi ani mantrang thimi rapya, heirou khying thimi rapyakhi toumaangeirou.

²⁵ Heirou aiyei khril-lhangaimak heiwane mandalbi kulchalnanungei mreknarou; heitoubi aitamei solungra tangchani mathumbangrou; heirou thimi rapne muheimakne leiyei kaalnung, ani yaya toumaangpirou. Krungcha rapbei krungcha rapya yanimakne raal daheirou, heiya khril-thuithi krung heiwayari toumaangeirou; heiya tlaipang thimiyei hutniri nimakrou.

²⁶ Heirou ningshunyei heirou masaei kar'anbi loumukur rmong heiwari chimlei. Heiya rmong heiri muni yulkhoulak; kouweiyo toulanungri hillou tlani leibi hungthukeirou.”

²⁷ Heirou Daniel keiri, rmong loumukur hillouri tlaini tlawani nawurbine leikur. Heitoubi kna damkur hillou kanthoubi, Krungei watlhoura hanui kallenglhakbi lhou toukur; heiya rmong heiwane keiya kalthi lhawai lahyerkur, heirou hunikhi heiwaya mallengthutpirou yaomakkur.