DANIEL 5 - KHYINGEI PU'TLOU Bible (BSI)

Belshazzar'yei Chaak-khaang

¹ Krung Belshazzar'ne aiyei Krung paluirap chungwa ungbine malchaak-khaang tangni markhulkur; heitoubi ani aiyei paluirap lishingei maibongra yale tul mongmalnabi langthoukur.

² Heirou Belshazzar'ne tul mongbi chay pibine aiyei pa Nebuchadnezzar'ne Jerusalemei Pucheemrei yenmarkumkhou sinayei heirou lapa-thirrei daarkep shungyang rapya hunglouthutnungei shunkur, heitoubi heirapne aiyei krung rapne, lhou'urpu rapne, heirou aiyei krungnu raple, nukhuwi rapne tul mongnanungei toubi louthutyerkur.

³ Heirouri yani Jerusalem'ra klei Pucheem'rouwei louthutkur sinaei heirou lapa-thirrei daarkep-shungyang rapya yenthutpikur; heitoubi krungni aiyei krungmal raple, lhou'urpu raple, aiyei krungnu raple heirou aiyei nukhuwi rapne heiyei sina daarkep rapya tul mongnakur.

⁴ Heisitoubi yani tul mongmlipbi sinaei, lapaei, kulshanyei, thirrei, heengei heirou thlungei thrailha rapya mathangbi kanyerkur.

⁵ Heirouri tallengni tlaipang thimiyei hutbangnaksi khat heimlamthutbi Krungkullei cheem meitharl maibongei rapthangra hutmayungni kouweikhat mayekur. Heirou Krungne heisi heithiyeinungri mayebi klei hutbang heiwaya heikmu.

⁶ Heirouri Krung Belshazzar'ri chitekkurbi maikhi mui yendaiyura, malungkhi kanchunwura, hut-ho rapkhi kanthingura, heirou khuklu rapkhi chingkantummura.

⁷ Heirou Krungne ungraobi thimkhui rapya, meiruithi thimi rapya, Chaldea'yei shingkhei thimi rapya, heirou hutchiekthi thimi rapya yenruilhaknungei shunkur. Heirouri Krungne Babylon'rei klei shingkhei thimi rapya shun: “Huhuni rapthangra mayekur myek awaya pathutbi, heitoubi keinungei heiyei arthaya mallengthutpichang yaowanungri, anungei Krungshamb khmongdup thulbangpirou, heirou khrulruiya aiyei ngakhungra nabangpirou. Heitoubi aya Krungramei lhou'urpu khyumtam tlung pu hoiyerrou.”

⁸ Heirouri krungei shingkhei lhou'ur purap nammani hungchangkur, heiya ya hukhatnikhi rapthangrei mayekur heiwaya pathutchangmak, heirou heiyei arthakhi Krungnungei mallengthutpi manemakkur.

⁹ Heirouri krung Belshazzar'ri duidui ningchiwurbi mairungkhi duiduini mui yendaiyura, heirou krungei mal rapkhi aiyei lhou'urpu rapkhi tounaram makkurchiya.

¹⁰ Heirou Krungle aiyei mal rapbei ungraochani yunnei houya mayeknarouri Krungnuwi Malchak-khangna Bomthora hungchangbi kyun, “O Krung, pulchi hoiniyasu! Neiyei ukningra ningchawurbi lhawai lahmaklo, heirou neiyei mairungkhi mui daiwurmaklo!

¹¹ Neiyei Krungram rilla Khying Dunpuei lhawaini kalhonpi thimi khat leilei. Nai pawaei chaanrouei waiyoubi napawa heini phab dani, beimak shingkhei-mukheini Dunpuei shunthutpi naksine shunthutpinei toumani anungei klei. Heirou naipawa krung Nebuchadnezzar'ne ayari Krungkullei shingkhei, heirou Chaldea rapbei thuikhei thimirap nammaei doura pu khoini bom lhakpikhou.

¹² Ngamri anungei yerrouwei dui, shingkhei-mukheiyei roushing klei, phab da, heirou kluei tloubom rapyakhi sempi mani, yailim tlou rapkhi phongthutpi mani, heirou rmong rapkhi artha mallengthut mani thimi. Aiyei minri Daniel toubine ung, heirou Krung Nebuchadnezzar'ne ayari ‘Belteshazzar’ toubine thulpikhou. Heineri asinung Daniel'ya wa'ungyerlak, heiyanungri mayekur tlou heiyei arthaya ani mallengthutpirou.”

Rapthangra Mayekur Tlouya Mallengthutpikur

¹³ Heirouri Daniel'ya Krungei maibongra yenruilhakur. Heirou Krungne tlou louyunbi Daniel'ya shun, “Nangri kai pawa Krung Nebuchadnezzar'ne Judah'rei raalman khoini yenheikur napawa khat Daniel toubi ung heiwariko?

¹⁴ Asinungri keine neiyei ngamrou pao mayekkurla touri, Dunpuei lhawaini neinungei klei, heirou shingkhei-mukheiyei roushingle, phabda, heirou yerrouwei dui khyal-roushingkhi neinungei kleime toulei.

¹⁵ Asinunghak shingkhei-mukhei thimi raple thuikhei thimkhui rapya keiyei maibongra yenruilhakbi rapthangra mayekur tloubom rapya pathutyerbi artha mallengthutyerwurla, heiya yarapne heiwaya keinungei artha mallengthutpi manemakura.

¹⁶ Heiya keimshani neiyei ngamrou pao mayekurla touri, nangri tloubom klu rapyakhi artha mallengthutchang, heirou klu lhouthuk rapyakhi sempi manime toubi mayeklei. Heineri asinung kounakpi nangne rapthangra mayekur tloubom rapya pathut maniyanungri, heitoubi heiyei arthaya keinungei mallengthutpi maneyanungri, neinungei Krungei shamb khmongmuk punshelya hubangpirou, heitoubi neiyei ngakhungra sina-khrulkhi nabangpirou, heitoubi neiyari Krungkul aei khyumtam tlung lhou'ur puei bomya lhakpirou.”

¹⁷ Heirouri Daniel'ne loumallangbi krungnung loukyun, “Neiyei hutthul rapri neinungei khoini khouchalaklo, heirou klahman rapkhi thimi deinungei malanpilaklo, heiya kouya hoiyanungkhi keine rapthangra mayekur tlourap heiwaya krungei maibongra pathutdeise, heitoubi heiyei arthaya neinungei mallengthutpiyeise.

¹⁸ “O Krung, Yerrouwei Choudui Dunpune nai pawa Nebuchadnezzar'ya lilkhoi Krungbomya lhakpikhou, heitoubi aya thang'alkhi, toumaninei mantrangkhi heirou rikrai khrumknakhi pikhou.

¹⁹ Heirou Dunpune aya yerrouwei lilkhoi Krungbomra khangbangpiwurnei ngamrou thimirap nammani, lim rapne heirou tloulim kantangei thimi rapne ayari beimakne chirilkhou; heirou ani hatkni thimi rapyari heisi hatkur, heirou ani hatmakne khringni khoukni thimiyari hatmakne ani heisi khoupilei; ani tangyerkni thimi rapyari ani bom lhakbaangpilei, heirou ani bom lousunda'kni thimiyari ani bom lousundawurlei.

²⁰ Heiya Nebuchadnezzar'ne aiyei solungra tangchawurbi napal toubine thuithikur heirouri aiyei thang'allei Krungbom'rouwei louthutdurpi, heitoubi aiyei thang'alya airouwei louthutkur.

²¹ Heirou ayari tlaipang thimi rapbei hangrouweikhi hulthutkur, heirouri aiyei solungkhi yaa naksine hoiyerkur, heitoubi aiyei leina bikhi ramhangrei gadha rapbei hangra hoikur. Heitoubi ayari hal naksine ramna namh chakshaiyerbi khoukur, heirou aiyei sharungkhi nungthourei rdai chudokbi leiwurkhou. Heisitoubi ani Yerrouwei Choudui Dunpuri tlaipang lim nammaei doura Pu khoini thrungpime, heirou Aiyei hoiyerkni thimi rapnungei heinaksi krungbom lhakpime toubi hungningmu'bongyen yuntlungmak thimi khoini leiwurkhou.

²² “Heiya aiyei chanapawa Belshazzar, nangri heinakya namma mukhoubinekhi, neiyei solungri nimsundabi neiyei touwurkhou lhourap heiri shuiyura toubine ukning hungkur toukhi maklei.

²³ Heiya nangneri Thangmunrei Pu Dunpuya karhane tangchabi neitamtomya mathumbaangurla, heitoubi nangne yaya Aiyei Pucheemrei sina daarkep rapya neiyei maibongra yenthutyerwurla. Heitoubi nangne neiyei mal Krungcha raple, neiyei nu raple heirou neiyei nukhuwi raple toubi heirapya tul mongnawurla. Heitoubi nangne sinaei, lapaei, kulshanyei, thirrei, heengei heirou thlungei sheemthutkur thrailha rapya, mitkhi mumak, khnakhi mayekmak, heirou lhawai yaomak thrailha rapya choune kanthangpibi mathumbaangurla. Heiya neilhawaiya heirou neiyei rongchanya shinphopbi khoupi Pu Dunpuyari nangne mathangpimaklei.

²⁴ Heirouri Dunpu Airouwei hutbang heiwaya yenmalhetbine, heirou tloulhangrap heiwaya rapthangra mayepikur.

²⁵ “Rapthangra mayekur tloulhang rapri: ‘Mene, Mene, Tekel, Upharsin’ (nimanung, Parsin).

²⁶ Tloulhang rapya artha mallengthutri asitoulei: ‘Mene’ - ‘Dunpune neiyei Krungbomya hungdongyernanungei tlaini mshing kansherwurla.’

²⁷ ‘Tekel’ - ‘Neiyari sherphala holmarkhebi thinarouri sher phamakura.’

²⁸ ‘Upharsin’(Peres) - ‘Neiyei Krungramri harhar toubaiwurla, heitoubi Medes'le Persia rapnungei yerkhaipirouwa.’ ”

²⁹ Heirouri Belshazzar'ne chay piwurbi Daniel'ya krungshamb khmongmuk hubangpibi heirou aiyei ngakhungra sina-khrulrui nabangpinanungei shunkur. Heitoubi chaytlou khat mayebine, “Asinunghak waiyoubi Daniel'ya Krungbom aei khyumtam tlung lhou'urpu hoiyura,” toubi paothutnanungei chay pikur.

³⁰ Heisitoubi heiniyei masahakrou Chaldea'yei Krung Belshazzar'ya hatkur.

³¹ Heirouri Medes'yei Darius'ne ai'mshaei kum somrukle khni tlungei kaallou ranne Krung hunghoikur.