DANIEL 4 - KHYINGEI PU'TLOU Bible (BSI)

Krungne Dunpuya Ningmupikur

¹ Krung Nebuchadnezzar'ne thimirap nammanungei, limrap nammanungei, heirou tlaipangpal karyouni paalbi klei tloulim kantangei thimi rapnungei karyemnei tlouya bethungbi kying, malungdam hoiniyasu!

² “Yerrouwei Choudui Dunpune keinungei toupikur kngakei hutlharap heirou lhoutang rapya nanungei shunthutpikur heiwari keiyei malungpil khoi.

³ Aiyei hutlha rapri kounak tang, heirou Aiyei kngakei lhou rapri kounak mantrang! Aiyei Krungram heiwari klui naimakei Krungram, heirou Aiyei Pu hoipi heiri chaan khatrouweini chaan khatbil khoi!”

⁴ Nebuchadnezzar keiri keiyei Krungkullei cheemra kyingni heirou nungkngaini leikhou.

⁵ Heiya keine rmong khat loumanbi heiwane keiya chiyerkur, heirou keine rkhum doura neibi leiyeinung rmong heiwane keiya ukningra markholbi iplhakchangmakur.

⁶ Heitounei ngammei keine chay piwurbi Babylon'yei shingkhei thimirap nammaya ungthutyerbi keiyei maibongra yenruilhakur, heitoubi yani keiyei rmongya keinungei artha phongthutyernanungei shunkur.

⁷ Heirouri meirui thi thimirap, thuikhei thimirap, hutchiek thi thimirap, hillei hungthuknungei tlou kyun thimirap heirou Chaldea'yei shingkhei thimi rapne wachangeinung keine yanungei keiyei rmongya louyunpikur; heiya yani rmong heiyei artha heiwari hukhatnikhi mallengthutpi manemakkur.

⁸ Heiya hilluirouri Daniel touri keiyei thrai khatdei min loubi Belteshazzar toubi thulpikur napawa heiwane keiyei maibongra wachangkur. Aidoura Khying Dunpuei Lhawaini kalhonpi thimi khat. Keine anungei shunbi asitoubi kyun:

⁹ “O thuikhei thimi rapbei pu Belteshazzar, Khying Dunpuei Lhawaini neinungei kleime touri keine kmu; heineri neinungeiri phab dachangmakei klu touri koukhatkhi makrou, heineri keine rmong khat asitoubi loukmu, heineri heiyei arthaya mallengthutpilaklo!

¹⁰ Keine rkhum doura ipbeinung loumukur rmongri asitoulei: ‘Keine thiyei kallouri, thilak, tlaipangpal tlailamra heengtrung tang khat pukbine klei mulhakkur, heirou aiyei rong heiwari beimakne tangmlamchou.

¹¹ Heengtrung heiwari kattang-katchouwurbi mantrangkur, heitoubi heiyei bungkhi nungthou katokkur, heitoubi heiwaya tlaipangpal bi kantangrakhi heimuphakur.

¹² Heengtrung heiyei heengna rapkhi beimakne lhangai, heitoubi aiyei heenghei rapkhi marthumni kat-heikur; heitoubi heirapne tlaipang limraple, yaalim-yoolim nammanung ukchak hoikna. Ramhangrei yaalim-yoolim nammani heiyei daakra rehbine mathrillei, heitoubi nungthourei yoolim-waalim rapne heiyei ban rapra chubine rabu sheembi leilei. Heirou tlaipang lhawaipal chiwirap nammani heirouwei chamaibine ringlei.’ ”

¹³ “Heirou keine rkhum doura heisi ipbine leiyeinung keiyei rmongra loumukur heiri thilak, khying thimi paopiya khat nungthourei yongchum keine loumukur.

¹⁴ Ane kalni ungraobine asitoubi kyun, ‘Heengtrung heiwaya shendeekurbi, heitoubi aiyei heengban rapkhi shatbi mthousundawurlak. Aiyei heengna rapya phitkhreuwurlak, heitoubi aiyei hei rapkhi phittrulwurbi khrechekwurlak. Ramyaa rapne aidaak'rouwei trukchekurasu, heirou ramwaa rapnekhi aiyei heengban raprouwei traichekurasu.

¹⁵ Heiya aiyei ramuiri aiyei yrung raple kalhonne thlei rilla yuklakkhoulak; heiya tingtou mar'emna hangra heiwaya thir'ruile kulshan ruini msuiphopbi khoulak. Heitoubi aidoura nungthourei rdaini chukphoplaksu, heirou ramyaa rapkou ramhangra namh chakshailaksu.

¹⁶ Heitoubi aiyei ukningkhi tlaipang thimi khatdei ukningrouei hollurasu; heitoubi anungei ramyaaei ukningya lhakpiwurlaksu. Heitoubi enibuirek yenralphane ramyaa naksine leiyurasu.

¹⁷ Chaytlou awari Thangringni shunpikur tloubom, heirou Thangmunrei khying thimi rapbei paothutpikur chaytlou. Heineri khring tlaipang lim nammani mubomthuk touri Yerrouwei Choudui Puni tlaipang Krungbom nammaei doura Pu hoipilei, heirou Aiyei pi'kni thimi rapbei doura Ane phor yukpilei, heirou ukning khnim thimiya Ane phunkanthoupilei.’ ”

¹⁸ “Krung Nebuchadnezzar'yei loukmu rmongri awariya. Asinungri, Belteshazzar, nangne keinungei rmong heiyei arthaya yunthutpilak, rmong heiyei arthaya keiyei Krungramrei shingkhei thimirap hukhatnikhi phongthutpi manemakanungkhi nangri phongthutkur manirou, ngamri Khying Dunpuei Lhawaini neinungei leipilei.”

Daniel'ne Rmongei Artha Phongthutpikur

¹⁹ Heirouri Belteshazzar toubikhi min ung Daniel'ne ngakchatnawurbi lepcha ningthutbi leikur. Kheen heirou Krungne ungbi heikyun, “Belteshazzar, keiyei rmong heiwane heirou heiyei arthane neiyei solungya khalchanayermak.” Heirou Belteshazzar'ne loumallangbi kyun, “Keiyei Krung, neiyei rmong heiwari neiya machin thimi rapnungei hungthukur hoiniyasu, heirou neiya yeekna thimi rapbei doura heiyei artha yongdaniyasu!

²⁰ Neiyei rmongrei loukmu heiwane kattang-katchouwurbi mantrangkur, heitoubi aiyei lamchoukhi nungthou katokni katchouwurbi, heirouwei tlaipangpal namma muphakur;

²¹ Heirou aiyei heengna rapkhi lhangai-karyuikna, heirou aiyei hei rapkhi marthumni heikur heitoubi tlaipang yoolim-waalim rapbei ukchak hoinakur; heitoubi aiyei holira ramyaa rapne daikallim rehbine leikur; heirou aiyei ban rapbei doura nungthourei traicha ramwaa rapne rabu sheembine chaklei.

²² “Heiwari neiya mu'kname, O Krung; ngamri nangri kattangurbi mantrangura, neiyei Krungram heiri tangbangurbi nungthou katokura, herou neiyei Krungchaan thrungkur heiwari tlaipangpal wadongnabil hoiyura.

²³ Heitoubi rmong heirouwei Krungne thangmunrei kyong khying Thangring khatkhi loumuwurbi, heirou ani kyun, ‘Heengtrung heiwari shendeekbi toumaangurlak; heiya aiyei ramuiri aiyei yrung raple kalhonne thleira yuklakkhoulak, heiya ramhangra tingtou hangra thir-ruile kulshan-ruini msuiphopbi khoulak, heitoubi nungthourei rdaini aidoura chukphopbi, tingtou shaibine ramyaa hangra enibuirek yenhoibongyen leilakasu!’

²⁴ “O keiyei Krung, rmong heiwaya mallengthutri asitoubi leilei; heirou Yerrouwei Choudui Purouwei chayri keiyei Krungei doura yongdarou leiyura.

²⁵ Neiyari thimi rapbei hangrouwei hulthutloubi, heitoubi neiyei paalna ramri ramhangra ramyaa rapbei hangra hoirouwa; heitoubi neiyari halnakni ramna namh pishairou; heitoubi nungthourei rdaini neilura chukphopyerrou; heitoubi enibuirek yenrallouwa; heirouri nangne hungningthuteirou touri Yerrouwei Choudui Pu Dunpuri tlaipang nammaei doura Pu khoini thrungpi, heirou Aiyei malungshipi Krungram rapnungei Ane phor piwurlei.

²⁶ Heitoubi aiyei ramuile aiyei yrung rapya thleira horkhounungei chay pikur heiwari, nangne thangmunrei Puni neidoura thrungpime toubi ningthutdei kheenrou neiyei krungram heiwari neinungei hanui mallenglhakpithurou touya mu'kna.

²⁷ Ngam heineri, O Krung, keiyei tlou sempikur awane neinungei malungpilkna hoilaksu; asinungri neiyei borh lhourouwei lakkurkhoulak, heitoubi tharmu chimmei lhouya toulak; heitoubi neiyei khril lhangaimakei lhoutouya lakurkhoubi heitoubi kanring-kanwai thimi rapya kringpi kheiyei lhouya toupilak; heiyanungri neinungei lhangai pulchini paalkhi kya.”

Krungei Rmong Heiri Chimni Hungthukkur

²⁸ Lhouthukrap namma heiri Krung Nebuchadnezzar'yei doura hungthukura.

²⁹ Tangla tlun chiple-khniyei hillouri Krungne aiyei Babylon Sina Krungkullei shangkai doura karwaichayeinung ani asitoubi kanyerchani kyun:

³⁰ “Anak tangkur Babylon'yei Krungkul awaya keiyei mantrangni keiyei thang'alya kanyernanungei keine sabangurkhou nimaka?”

³¹ Tloulhangrap heiwaya Krungei murrouwei heisi yunthutbi leiyeinung, nungthourei hou khatni asitoubi yukshunkur, “Krung Nebuchadnezzar, neidoura tloubom awaya paothutkura: Neiyei Krung hoinei mantrang thang'al heiri neirouwei louthutdurla.

³² Heitoubi neiyari thimi rapbei hangrouwei hulthutrouwa, heirou neiyei leina biri ramhangra ramyaa rapbei hangra hoiyerou. Heitoubi neiyari hal naksine ramna namh pishairou; heitoubi enibuirek yenralyerrou; heirou nangne Yerrouwei Choudui Pu Dunpune tlaipang thimilim namyerei doura Pu khoini, heirou Aiyei madu thiminung Ane phor pileime toubi ningthutbongyen neiyari heisi leiyerou.”

³³ Nebuchadnezzar'yei ngamrou kyun tlou heiri tallengni chimni hungthukkur, heirouri aya tlaipang thimi raprouwei hulthutloubi, heitoubi ramhangra hal naksine ramna chakshaibi leikur; heirou aiyei sharungkhi nungthourei rdai chudokbine aiyei lurei shamkhi malaangei khmulnakni heirou aiyei hutmathin-homathin rapkhi ramwaaei hutmathin-homathin naksine shaangkur.

Nebuchadnezzar'ne Dunpuya Mathangkur

³⁴ “Heirou kartinkur kum-eni yenluikur heirouri,” Krung heine kyun, “Nebuchadnezzar keine nungthou lhangra keiyei mit mangalthikur, heirouri keiyei ukningra yenningthutbi khalmukur. Heirouri keine klui naimakne ringbi klei Yerrouwei Choudui Dunpuya mathangkur. Kouweiyo toulanungri Aiyei Pu hoipi heiri klui naimak, heirou Krungbomri chaan khat'rouweini chaanserrei khoi.

³⁵ Heirou tlaipangra paalbi klei thimi rapri koukhi nimakme. Heiya Ane thangwanra Aiyei kning hilthungne lhou toupilei, heirou tlaipangpallei thimi rapbei hangrakhi Ane lhou toupilei. Heirou thimi hukhatnekhi Aiyei hutrouwei kartleichangmak, nimanung hunekhi, ‘Neiyei toukur awaya kouwo?’ toubikhi Anungei yunchangmak.

³⁶ “Kheen heihakrou keiyei ukning yenkallenglhakur. Heirouri keiyei mantrangle, keiyei Krungbomei thang'alkhi keinungei mallenglhakpithu; heitoubi keiyei lhou'ur purap, heirou Krungcha rapne keiya raphathutpithu; heisitoubi keiyari keiyei Krungbomra yenkallengyerbi phunbaangpithu; heitoubi toumane mantrangya keinungei lhakbaangpithu.

³⁷ “Heirou asinungri Nebuchadnezzar keine mathangbi, Thangwanrei Krungya chouni mathumbangkur; kouweiyo toulanungri Aiyei lhourap namma heiri tharmu chimthil, Aiyei lam rapkhi chimthil, heirou tangchabi klei thimi rapya Ane ukning toutomkur manilei.”