DANIEL 2 - KHYINGEI PU'TLOU Bible (BSI)

Nebuchadnezzar'yei Malumkur Rmong

¹ Nebuchadnezzar'ne krung khoi kum-khni tlungei kheenrou, Nebuchadnezzar'ne rmong khat manbi, rmong heiwane aya iplhakyermakne marhotbi lhawai lahyerkur.

² Heirouri krungni chay piwurbi thuikhei thimkhui rapya, meiruithi thimi rapya, heirou Chaldea'yei shingkhei thimi rapya aiyei rmong rapya shunthutyerna'nungei unglhakyerkur. Heisitoubi ya rapne hungchangbi Krungei maibongra mayungkur.

³ Heirou Krungne yanungei loushun, “Keine rmong khat loukman, heineri keiyei solungne rmong heiyei ngamrou beimakne munilei.”

⁴ Heirouri Chaldea rapne Krungnung Aramic tlouni kyun, “Krungri, pulchiniyasu! Neiyei shokrap kanungei rmongya yunthutpilaklo; heiyanungri kani heiyei arthaya yunthutpirou.”

⁵ Krungne loumalangbi Chaldea rapnung shun, “Keiyei shunthutkur chaytlouri shuinungei yamakrou. Kounakpi nani keinungei rmong heile, heitoubi heiyei arthale yunthutpi manemanungri, nayari mtum-mtum shattatdurou, heitoubi naiyei cheem-kei rapkhi udthukni kontummurou.

⁶ Heiya kounakpi nani rmong heiwaya yunthutpibi, heitoubi heirapbei arthakhi mallengthutpilanungri, nani keirouwei hutthul putle heirou klahman pharou; heitoubi tangni rikrai khrumknakhi pharou. Ngam heineri nani keinungei rmong heile heirou heiyei arthakhi yunthutpilak.”

⁷ Heirou yani hanuikhi loumallangbi kyun, “Krungne neiyei shokrap kanungei rmong heiwaya yunpilaklo, heiyanungri kane heiyei arthaya phongthutpirou.”

⁸ Heirou Krungne loushun, “Keine mulei touri keiyei chaytlouri shuinungei yamakme toubi nane muwurnei ngamrou, nane kheen bei tlane lounanungei toukuralei.

⁹ Heineri kounakpi nane keinungei rmong heiwaya shunthutbi, heirou heiyei arthaya shunthutpi manemanungri, nai phanungei tantiri khattomngei; ngamri nani yakantlangrilbi keinungei mandal tlouya yunbi kheen toumaangnanungei marshikkurla. Ngam heineri keinungei rmong heiwaya shunpilak, heitoulanungri nane keinungei rmong heiyei arthaya yunthutpi manirou touri keine murou.”

¹⁰ Chaldeaei shingkhei thimi rapne Krungnung loumallangbi kyun, “Krungnungei heinaksi tloubomya shunthutpi manirouri tlaipang doura thimi hukhatkhi makrou, heirou hu Krung khatnikhi, nimanung mantrang krung khatnikhi Chaldea rapnungei, nimanung Krungkullei shingkhei thimirap hukhatnungei heinaksi tloubomya kouniroukhi shunthimakhui.

¹¹ Heiyakhi duinara, Krungei shunkur tloubom heiwari beimakne luwatchaklei; heitoubi krungnungei heiwaya shunthutpi manirouri tlaipang thimi rapkou leimalnamak thrai rapne nimanungri thimi hukhatnikhi shunthutpi manemakrou.”

¹² Heitounei ngammei Krungri meithukni malungkhawura; heingammei ani Babylon'rei shingkhei thimirap nammaya hatnanungei chay piwurla.

¹³ Heisitoubi shingkhei thimi rapya hatnanungei Krungei chay heiwaya khulpaobi chaiwurla; heirou yani Daniel'le aiyei palui rapyakhi hatnungei raphakur.

¹⁴ Heirouri Krungei raallui upa Arioch'ne Babylon'rei shingkhei thimi rapya hatnungei wathukei kallou Daniel'ne anungei roushing kleini, heirou mukheini loumallangbi kyun;

¹⁵ heirou ani krungei raallui upa Arioch'ya kngai, “Koungammei krungei chaytlouya heinakei thuithikurawo?” Heirouri Arioch'ne tloubom heiwaya Daniel'nung yunthutpikur.

¹⁶ Heisi tounarouri Daniel'ne krungei maibongra wachangbi anungei rmong heiwaya shunthutnanungei kheen beicha pinanungei shunchakur; heiyanungri ani krungnungei heiyei arthaya shunthutpichangrou.

Dunpune Daniel'nung Krung Nebuchadnezzar'yei rmongya mutpikur

¹⁷ Heirouri Daniel'ne aiyei cheemra hungchangurbi, heitoubi tloubom heiwaya aiyei paluirap Hananiah, Mishael, heirou Azariah'nungei shunpikur.

¹⁸ Heirou ani yanungei shunbi Thangmunrei Dunpurei kringpikheiya phabine heinaksi kluei tloubomei ngamya phongthutchangnanungei buchayerkur, heiyanungri yayari Babylon'yei shingkhei thimi raple hichokyermakrou.

¹⁹ Heirouri msanung Daniel'nungei kngak khat khoini kar'anbi muyerwurla. Heirouri Daniel'ne thangmunrei Dunpuya mathangkur.

²⁰ Daniel'ne kyun: “Dunpuei minri klui naimak-trim naimakne mathangniyasu! Kouweiyo toulanungri, roushingle mantrangri Aiyeime.

²¹ Ane kheenya heirou kumchaanya martlengkur manilei; Ane Krung rapya louthutdurlei, heitoubi Krungrap deiya khalbaangurlei; shingkhei thimi rapnungei Ane roushing pilei, heirou phabda thimi rapnungei Ane khyal pilei.

²² Ane muei klei tloubom rapyakhi kanreni mutpilei; mehnara kleikhi Ane mulei, heirou kwaar heiri Anungei klei.

²³ Kai pawa rapbei Pu Dunpu, keine Neiya mathanglei. Kouweiyo toulanungri Nangne keinungei roushingle mantrangya piwurlame. Asinunghak'roukhi kani Neinungei buchakur heiwaya Nangne kanungei piwurla. Kouweiyo toulanungri Nangne kanungei Krungei rmongya mutpiwurla.”

Daniel'ne rmong artha mallengthut

²⁴ Heitounei ngamrou Daniel'ne krungni Babylon'rei shingkhei thimi rapya hatnanungei khalthutkur napawa Arioch'yei leinara Daniel'ne wachangbi anungei wakyun, “Babylon'rei shingkhei thimi rapyari hatpimaklo! Keiya Krungei maibongra ruilhakpilak, heiyanungri keine Krungnungei rmongya artha shunthutpirou.”

²⁵ Heirouri Arioch'ne Daniel'ya Krungei maibongra khnotni yenruilhakpikur, heirou ani krungnung kyun, “Krungnungei rmongya artha yunthutpi manirou thimiri Judah'yei raalmankur rapbei hangra keine napung-khat raphamula!”

²⁶ Heirou krungni loumallangbi min Belteshazzar toubikhi ung Daniel'nung kngai, “Nangne keiyei loumankur rmong heile heirou heiyei arthakhi keinungei yunthutpi manirouko?”

²⁷ Heirou Daniel'ne krungei maibongra loumallangbi anungei kyun, “Krungei shunkur kngakei tloubom heiwaya shingkhei thimi hu khatnikhi, thraiyei tlou kar'an thiminikhi, thuikhei thimkhui rapnekhi, heirou meiruithi thimi rapnekhi yunthutchangmakrou.

²⁸ Heiya kngakei tloubom rapya mutpi heirou shunthutpi mani Thangmunrei Dunpu khatri leilei. Ane Krung Nebuchadnezzar anungei hillou kou hungthukrouwo touri yunthutpiwurla. Krungne ipbeinung loumukur rmongri asitoulei.

²⁹ O Krung, nangne ipbei kalnung neiyei solungra hillou kou hungthukrouwo toubine ningchakhou, heirouri Ane neinungei hillei hungthuknungei kngakei tloubom rapya kar'anbi muyerkurame.

³⁰ Heiya tlaipang thimi deirouwei duini keine roushing kleime tounei heinaksi kngakei tloubom rapya keinungei muyerpikuri nimak; heiya rmongei arthaya Krungnungei mallengthutpibi, Krungei ukningra kou kleiyo touya ningmunanungei toubi mutpikurme.”

³¹ “O Krung, nangne thiyeinung beimakne tang thimilha khat neiyei maibongra mayungbine kleiya loukmu. Thimilha heiwari thiyeinung mairungri kngak khatdei chi'kna thang'alni bilthim thimilha khat.

³² Thimilha heiyei luri sina khying, heirou aiyei malungpakle, hutbang rapri lapathirni, heirou aiyei ukle, pheikhnang rapri kulshan;

³³ heirou aiyei hoyeng raple homayung rapri thirle thleibulle markotlei.

³⁴ Heirou nangne thimilha heiwaya heisi thibi leiyeinung, tlaipang thimiyei hutbangkhi yaomakne thlungtum khat aitam dantatkur heiwaya nangne mukur. Heitoubi thlungtum heiwane thimilha heiwaya thirle thleibul markotkur ho doura nanbangurbi harhar chalkur.

³⁵ Heirouri thirkhi, thleibulkhi, kulshankhi, lapathirkhi, heirou sinakhi namma hanuitomrou tlengwa nangchaallurchi, heitoubi heirapri manthrallei phailou ruitlairei martheeni chaker sha'mtrailoukur heinaksine mtrailoubi raphamuchangmakur. Heiya thimi lhaya nangchalkur thlungtum heiwari lhungdou tangkhat hoiwurbi tlaipangpalla karyouni omthimkur.”

Rmong Phongthutpikur

³⁶ “Neiyei rmongri awariya: asinungri kani Krungnungei heiyei arthaya phongthutpirouwa:

³⁷ ‘O Krung, nangri krungrap nammaei Krungme; thangmunrei Dunpune neinungei Krungbomkhi, mantrangkhi, toumanikhi, heirou rikrai-khrumknakhi piwurla.

³⁸ Heirou tlaipang thimi rapne bi kourou-kourou paalbikhi, ramyaa rapkhi, heirou nungthourei traichabi klei ramwaa rapyakhi nammaya Ane neihutra silnawurbi, nangne yaidoura pu khoini paalbine leilei. Heingamei nangri sinayei lu heiwarime.’ ”

Medo-Persia'le Greece

³⁹ “Heitoubi neiyei hillouri neiyei Krungbomya manthirdui krungbom khat kathukheirouhui; heirouri khyumtam tlung kulshanyei Krungbom khatkhi kathukbi tlaipangpal nammaei doura paalheirouhui.

Rome Krungbom

⁴⁰ “Heirouri phalitam tlung Krungbom khat thirnaksi mantrang kathukrou; ngamri thirni putrap nammaya nangchalkur heirou takbaikur mani heinaksine, Krungbom heiwane krungram deirapya harhar dani toubaiheirou.

⁴¹ Heirou neiyei loumukur heinaksine, ho raple homayung rap heiri thirle thleibulni mankonbi sheemkur heiwari baikur heinaksine heiyei Krungbom heiwari baiwurheirou; heiya thirle thleibul maryalbi sheemkur hoiyabine, kheen khatrouri thirnaksine beimak mantrangkhourou.

⁴² Kouweiyo toulanungri thimilha heiwaei homayung rapri thirle thleibulle lhang khat-khat maryallei; heinakrimni Krungbomrap thari thirnakni mantrangkhourou, heirou lhang'khatneri thleibulnakni manthirheirou.

⁴³ Heirou neiyei mukur heinaksine, thirle thleibulle maryalkur heinaksine, yani khatle-khatle nulou-chalourilnara marchokrilleirou; heiya thirle thleibul'le popkril yamak heinaksine, yani khatle-khatle yarilmakeirou.

Khyingei Krungbom

⁴⁴ “Heirou heinaksi Krung rapbei chaanrouri Thangmunrei Dunpune tekkhi toumaang manemak Krungram khat phunbaangpirou, heirou Krungram heiwari thimidei hukhatdei dourakhi lakkhoupimakrou; heitoubi Krungram heiwane Krungram deirap nammaya nangbairou, heirou ari aitam klui naimak-trim naimakne paalheirou.

⁴⁵ Heirou neiyei kmu'naksine tlaipang thimiyei hutkhi yaomakne lhungdoura thlungmtum danbine heitoubi heiwane thirya, lapa'thirya, thleibulya, kulshan, heirou sinayei thimi lhaya nangchaalkur heinaksine hillou kou hungthukrouwo toubine Mane-Mantrang Dunpune Krungnungei mutpikur heiwariya; heineri rmong heiwari chimhak heirou heiyei arthakhi chimni hungthukkeirou.”

Daniel'ya Bom Lhakbaangkur

⁴⁶ Heirouri Krung Nebuchadnezzar'ne thleira mai sikhuplhakbine heitoubi Daniel'ya rikrai-khrumkna mutpikur; heitoubi anungei hutthul putle muiknam mrohkhi thulpinanungei chay pikur.

⁴⁷ Krungne loumallangbi Daniel'nung shun, “Tanghakpani neiyei Dunpuri thrairap nammaei Pu Dunpume, heirou krung rapbei Pume, heirou kngakei lhou rapya phongthutpi mani Pume ngamri nangne anaksi kngakei lhouya phongthutpibi mutpiwurla.”

⁴⁸ Heirouri krung Nebuchadnezzar'ne Daniel'ya bom lhakbaangpikur heitoubi anungei hutthulkhi tangni pikur; heitoubi Krungne aya Babylon'yei Kholim nammaei doura Pu hoiyerkur heirou Babylon'yei shingkhei thimirap nammaei doura lhousilpi pu hoiyerkur.

⁴⁹ Heirou Daniel'ne Krungnung shunchabi Shadrachle, Meshach, heirou Abed-Nego yakhyumya Babylon'yei kholim nammaei doura lhou'urpu khoini bom lhakpikur; heitoubi Daniel'neri krungei pichar bomra lhou'urpu khoini leikur.