DANIEL 11 - KHYINGEI PU'TLOU Bible (BSI)

Khalule Khate Krungbom Khintam Yarilmak

¹ Medes'yei napawa Darius'ne krung hoiyei lamkri kumrou keine kanthoubi aya mantrang lhakbaangbi soubaangpikur.

² Heirou asinungri Daniel, Keine neinungei chim tlouya shunpirou: Thilak, Persia'ra Krungrap khyumtam kathukrou. Heirouri phalitam tlung Krung khat katpalheirou, heitoubi ari ya namrei yerrouwei traiduini lal dunkhi hoiheirou; heitoubi laldun heiwane aiyei mantrang hoinabine aiyei Krungbom heiri Greece Krung ramyakhi koolphopna'nungei marshikheirou.

³ Heirouri hut mantrang Krung khat kathukrou, heitoubi ani ram karyouni hut mantrangle kalhonne pu khoini paallou, heirou aiyei kningyatom toubine palheirou.

⁴ Heiya ani paalkanthoule tallengni aiyei Krungramri harhar baiwurbine tlaipang shung-phalira yerkarkhairou. Heiya aiyei Krungbom heiri aiyei yu-cha rapbei hutrakhi damakarou, heirou aiyei pu khoiyei paalkhou naksikhi paalkhouchangmarou; kouweiyo toulanungri aiyei Krungbom heiwari phurthutrouwa, heitoubi aya karhillei klei lim rapnungei pirouwa.

⁵ “Heiya khate lhangrei palrou kyou Krungri hut mantrangrou, heiya aiyei lhou'urpu rapbei hangrouwei napung-khatle aya duini mantrangni palheirou; heitoubi aiyei Krungramri kngak'khat khoini mantrang hoirou.

⁶ Heitoubi kum beiyei hillouri yani yakantlangrilbi hut-dangrillou, heitoubi khate lhangei Krungei chanapuiya heiwini kying yennanungei toubi khalu lhangei Krungle shal dunheirou. Heiya chawini krung hoinei mantrangri phakhouchangmakrou; heirou Krungnekhi aiyei mantrang shinphopchangmakrou; aiyei lhou'urpu rapkhi heirou aya mathumbang thimi rapkhi heirou aya hut-trungpi thimi rapkhi, heirou aiyei yu-cha rapkhi ale kalhonne hunghichirou.”

⁷ Heiya napuiya heiyei yu-cha rapbei hang'rouwei ban khatni krungei rungkhlang khoini kathukheirou; heitoubi ani khalu lhangei krungei raallui rapbei doura karhani kathukrou, heitoubi krungei raalpal rilla kachangbine yaidoura thuithini raal maniwurbi kheen tlani hutmantrangni paalpiheirou.

⁸ Heitoubi ani yaiyei thrailha rapkhi, thirrei thimilha rapkhi heirou lapaei, sinaei manklu phuwanrap heirou shungyang rapkhi ani markumloubi Egyptra urlouheirou. Heiya khalu lhangei krungyari kum beiri hatpimakne ani horkhoupirou.

⁹ Heirouri khalu lhangei krungni khate lhangei krungei ramra raal darou, heiya ayari raal loumaniwurbi airamra hulmallengurthurou.

¹⁰ “Heirou khalu lhangei krungei chanapawane markhulbi hut-mantrang raalluirap chungwani markumbangrou, heitoubi yaihangrei napung-khatni humlouheibi yairam heirouei yuitang naksine thullhakbi khate lhangei krungei raalpalra wanorheirou.

¹¹ Heirouri khate lhangei krungnikhi malungkhawurbi raal marshikrou, heitoubi ani wathukbi khalu lhangei krungle raal kardourillou. Ane raallui rul chungwani heihumlhakrou, heiya yarapri khaterei yeekna raallui rapbei hutra wadongchirou.

¹² Heirou raalluirap chungwaya manbi urthutloubine hatkur heirouri, aiyei solungra beimakne langthoubi kanyercharouwa; heitoubi khaluei raalluirap lishing-lishing hatrouwa; heiya aiyei Krungbomri tlani paalchangmakrou.

¹³ “Heirou khalu lhangei Krungne raalluirap heiri lamkriyeiya duini chungni markumbi markhulthurou. Heitoubi kum beiyei hillou ani raallui chungwaya hutshu marthumni rumlanbine raal darou.

¹⁴ “Heitoubi kheen heirouri thimi chungwani khate lhangei krungei doura raal yourou, heirou neiyei thimi rapbei hangrouweikhi khril-thuithi hukounak khatnikhi rmongrei kar'ankmuya tlungyernanungei toubi yaitam kanyerchabi raal youheirou, heiya yarapri raal manemakne kanelchirou.

¹⁵ Heirouri khalu lhangei krungni wachangbine koolphoprouwa, heitoubi raalpal chetni sakoolkhou Kholilya raal luklourou; heirouri khate lhangei raallui rapri raal lousouchangmakrou, heirou yaiyei khalthutbi khoukur raallui lhouwa rapkhi loumayungchangmakrou. Ngamri yari raal lousounei mantrangri makura.

¹⁶ Heiya aidoura karhani raal wadakur thimini aiyei kning hilthungni lhou tourouwa, heirouri hunikhi aiyei maibongra loumayung'changmakrou. Heirou ani lhangaikur Israellei ramra aihoni trumphopbine aiyei mangyerkna hutni ram karyouni kulchalbine paallou.

¹⁷ “Khalu lhangei krungni aiyei mane-mantrang namma urthutbi, heirou aiyei raalluirap nammaya urbine khate lhangei krungle kyingni yakantlangrilnanungei marshikrou; heitoubi ani khaterei krungnungei aiyei chanapuiya rapbei hangei khatya aiyei nu hoinanungei pibine aya malhimnanungei wairangrou. Heiya heinaksi waikrang heiwanekhi aya manikhoumak.

¹⁸ Heirouri khalu lhangei krungni Mediterranea Samadru ruirei khukarthil rapbei lhangra mai hollhakbine yaya luklouheirou; heiya aiyei raallui chaylampu upawane aiyei kanyerchakurya toudongurbi, aya maithee phayerheirou.

¹⁹ Heirouri khalurei krungni ai'mshaei raalpal kuiphopkhou kholilra yenkallenglhakrou; heiya aitamtom tapanbi kanelbine hungmangrouwa.

²⁰ “Heirouri aiyei rungkhlangra Krungramei thang'alnung'tlim ruiput markumrou thimi malhetrou Krung khat kathukheirou; heisiya hoiyanungkhi ayari tlamakne leikhoubi malungkhani nimanung, raalbomra nimanungkhi hatdurheirou.”

Syria'yei Khril'thuithi Krung

²¹ Heirou Thangringne heisi yenkyun: “Syria krungei rungkhlangra beimakne khril-thuithi, machinkna napawa khatni kathukbi, Krungbomkhi phabom thukmak thimi ani luklouheirou; heiya thimi rapne koukhi hou lungmakne, kying-karbilni leiyei kheenrou ani minambi Krungbom lunglouheirou.

²² Hut mantrangkur raallui rul kounakni aiyei maibongra karbaibine trukchekurou, heirou akou yakantlangrilkhou krung ramphayakhi ani hatdurheirou.

²³ Limdei mandicha rapnekhi akou yakantlangrillou, heiya ani yaya mandalbine minampithurou. Heirou ani thimi raprei michang khumpharou, heiya thimi thachani aya kal'lhoprou.

²⁴ Ane koukhi shunmakne yerrouwei lhangaina ramra wachangrou, heitoubi aiyei pa rapnekhi touthutkhoumak, heirou aiyei patar rapneapha toukhoumak lhou rapya touthutrou; ani raalla yenlukheikur putchei-lalthum rapya yanungei yerkhaipirou. Heitoubi mantrangkur raalpal kuikoolkhou kholil rapyakhi raal dabi nangbainanungei wairangrou, heiya lepchaeinung hoirou.

²⁵ “Heitoubi ani raalluirap rul chungwale markhulbine heitoubi yaya thouplangbi khate lhangei Krungya karhani raal darou; heirouri khate lhangei krungnikhi raallui rul chungwani markhulbi hut mantrangyerou; heiya ani mayungbi lousouchangmakrou; kouweiyo toulanungri yeekna raallui rapne aidoura karhani muni raal marshikkurchila.

²⁶ Aiyei chetkril palui rapnea rampha aidoura hollhakbine maangyernanungei silwurla; heirou aiyei raallui chungwaya hullouheila, heitoubi chungwaya hatdurla.

²⁷ Krung napung-khni heiyei ukning-solung rapri lhangaimakya khalbine khatle-khatle norrilnanungei ningcharou; yarukhnine omna khatra mai kallukrilni omkanthrinbikhi, mandallei tlouyathil yunrillou; heiya khatni khatya manirilmakrou, ngamri yakhunta-rekkei hungdongnanungei kheenri kartinwurkhoula.

²⁸ Heirouri khalurei krungni lalthum chungwani markumloubine airamra kallengrou, heitoubi khyingei mardingkril tlouya karhani lhou tourou, heirou aiyei kning hilthungni aiyei toukni lhouya touthutrou, heitoubi aiyei ramra yenkallengrou.

²⁹ “Heirou kartinkur kheen hungtlunganungri khalurei krungni yukallengbi khate lhangei krung ramra yuchangthurou, heiya kheen ahakrouri halleinaksine hoimakarou.

³⁰ Koungameiyo toulanungri Kittimrei malirap heihul'lhakbine aidoura raal wadarou; heitounei ngamrou ari lhawai lahrouwa. “Heirouri ane yenkallengurbi khyingei mardingrilkur tloubomya malungkhapiwurbi yaidoura lhou tourouwa; heirou khyingei mardingkrilya lakurkhou thimi rapya rikrai khrumrou.

³¹ Heirou airouwei raallui chungwani malhetbine raalpal rilla wachangrou, heitoubi Khyingei Pucheemya touborhyerrou. Heitoubi yani machinkna lhouya touthutdurbi, tlainiserrei malamput makat rapya toudongeirou.

³² Ane mandalya yunbine khyingei mardingkril tloubomya toubaikur thimi rapya toumaangurnungei marshiklei; heiya yaiyei Dunpuya shakmu thimi rapneri krakni mayungbi lousoulei.

³³ Heirou thimi rapbei hangra shingkhei thimi rapne thukbi klei tloubom rapbei ngamrou thimi rapya phab toudapilei. Heiya kheen beiyei hillouri yarapri raalshonra, meira hiyerrou, heirou raalman khoini muloubine urlouheirou.

³⁴ Heirou shingkhei thimi rapne kanelyei kheenrouri, yanungei miyei trungpi beichari pharou, heiya thimi chungwaneri yaya trungpikarsarou.

³⁵ Heirou shingkhei thimirap thakhi kanelheirou, heiya kluiyei kheen hungbongyen yaya marthingthutnanungei, borh'rouwei chumbine kalthutnanungei heiwaya duiyei klu hungeirouhui, ngamri kartinkur kheenri hungeirouhui.

³⁶ “Heirouri krungni aiyei kningya heisi tourouwa, heitoubi aitam-ai'mshaya thraiyei doura chouni mathumbangbi kanyercharou, heitoubi thrai rapbei doura tlou tangtangya yunheirou; heirou papbei lhourap namma bung huithutbongyen ari heisi kattangbaangrou. Heirouri Dunpuei kartinkur tloubomri heisi chimni hungthukheirou.

³⁷ Heirou ani aiyei pawaei thraiya rikrai khrumknakhi mutmakrou, nimanung, napuiya rapbei maduni khrumkhou thraiyakhi rikrai khrumpimakrou. Heirou kouthrai rapyakhi ani lhou hoipimakrou; heinung'tlim aitam-ai'mshani heirap nammaei doura mathumbaangbine kanyerchaheirou.

³⁸ Heiya khalu lhangei krungni leireh-kngaak thraipu, aiyei pawa rapnekhi khrumkhoumak thraiya khrumkhou; heirou ani heiwaya sina, lapa, kulshan, manklu putchei-lalthum rapya makatbine khrumrou.

³⁹ Heitoubi Krung heini miram-mithrillei thraiyei hut-trungpiya loubine mantrangkur raalpal kuikoolkhou khukarthil kounakya nangbainungei tourou; heitoubi aya shak mubi rikrai khrumpi thimi rapya ani rikrai khrumpirou; heitoubi yarapya ram kounakei doura pu khoini thrungyerou, heitoubi aiyei ramya tuynungei yorcharou.

Kluiyei Kheen

⁴⁰ “Heirou kluiyei kheenrouri, khate lhangei krungni khalu lhangei krungle raal kardourillou, heiya khalu lhangei krungni aya lhimnung-martheetang naksine sapuk-kaari raple, sapuk-tung raallui raple, mali raple toubi aidoura raal darou; heitoubi ani ram deirakhi yuitangnak thullhakbine raal dabi luklouheirou.

⁴¹ Heitoubi ani Judah'yei marngirna ramrakhi wachangrou, heitoubi aihutra thimi chungwani dabine hiyeirou, heiya thimirap heiyari aiyei hutrouwei kalthutrou. Edom, Moab heirou Ammonia rapri aiyei hutrei karlheithutrou.

⁴² Heirouri khalu lhangei krungni ram deideiyei doura karhani aihut khangbaangeirou, heirouri Egyptbei ramri loudouchangmakrou.

⁴³ Heiya ani Egyptbei rilla klei sina, lapa, heirou manklu putchei-lalthum rapbei doura pu khoini paallou, heirou Libya raple Nubia rapri aihilla namma chanthungchirouwa.

⁴⁴ Heiya kulkung lhangreile khalu lhangreikhi raalpao urthimi rapne aya chi-mthunyerou, heitoubi malungkharou; heirouri ani wathukbi limrap nammaya toumaangurou.

⁴⁵ Heitoubi ani samadrule marngir ram-khying lhungdou tlakra aiyei krungei khuiluphiyei cheem sabangrou; heiya kluiyei kheenrouri aiyei chaan hungdongrouwa; heiya thimi hukhatnikhi aya trungpirou makrou.”