DANIEL 10 - KHYINGEI PU'TLOU Bible (BSI)

Daniel'ne Rmong Loumanbi Mthunkur

¹ Persia'yei Krung Cyrus'yei krungchaan kum'khyum tlungei kheenrou, Belteshazzar toubikhi ung Daniel'nung Pu'tlou khat mukandangyerkur; paolaa heiri chimmei tloubom, heiya raalpao; tloubom heiwari beimakne klu hoiyanungkhi, Daniel'ne hillou hungningmubi phab dakur.

² Heiyei tlainirap heirouri, Daniel keine hapta-khyumbil kanrilni chapkur.

³ Keine chaak-an tuikhi chamaimakne leikur, keimurra darkha yuikhi yongchangmakur, heisitoubi hapta-khyumbil koushirek khatkhi teimakne leiwurkhou.

⁴ Lamkri tanglaei somnile-phalini tlung tlainirou keine Tigris Kungtang ruira mayungbi leiyeinung;

⁵ heirou keine mangalthutbi thiyeinungri, thilak, napawa khat, phaikhringei shambya bangbine, aiyei shintlakra Uphaz'yei sina-khyingei shintlakrui khat mshuibine heiklei keine mukur.

⁶ Aiyei sharungkhi quartz kmal, heirou aiyei mairungri tliplai-alnaksi, aiyei mitlung rapri meithlanyei meisharnaksi, aiyei hutbang raple heirou aiyei hopar rapri lapathir pheengmthaibi alkur naksine liplipni allei; heirou aiyei tlou yunnei houri thimi chungei ungraonei hounaksi.

⁷ Asinungri, Daniel keine keile kalhonbi klei thimi rapne kar'anmumak rmongya keitamni kar'anmuwurla; heiya yaidoura chi-mthunkna thukkura; heingammei yaitam chiwurbi trukyulwura.

⁸ Heisitoubi keitamtom leiwurbi, keine rmong khat kar'anmukur; heirouri keiri chiwurbi tounaram makne leikur, heirou keiyei mairungkhi khi-thiminak kim hollura, heirou keiyei mantrangkhi koukhi yaomakura.

⁹ Heiya keine aiyei tlou yunnei houkhat loumayekkur, heirou keine aiyei tlou yunnei houya loumayekle tallengni keiyei mairungri thleira sikhuplhakbi kalni louiplhakkur.

¹⁰ Heirouri thilak, hutbang khatni keiya heipalbine, keiyei hutle khuklu rapri kanchunbi louleikur.

¹¹ Heirouri ani keiya heishun, “O Daniel, neiyari beimakne kringpiwurla; keine neinungei shunpikur tloulhang rapya lhangaini louninglhaklak; kouweiyo toulanungri keiyari neinungei tlou shunpinungei yenmalhetkura.” Heirou ani keinungei tloulhangrap heiwaya yunpikur heirouri, keine leoleo-kanchunni loukanthoubi mayungkur.

¹² Heirouri ani keinungei shun, “Chimaklo, Daniel, kouweiyo toulanungri lamkriyei tlainirou nangne tloubom heiwaya phab dananungei toubi neiyei Dunpunung neiyei ukning pilhakbi ukning khnimni shunchakur tlainirou neiyei tlouya mayekpiwurla; heitounei neiyei tlouya mallangna'nungei keine neileinara wakurame.

¹³ Heiya Persia Krungramei Krungchani tlaini somnile-khat keile raal kardourilkhou, heirouri thilak, lilkhoi Thangring Michaelni yongbine keiya trungpikur, ngamri keiyari Persia Krungle kalhonne keitamya lakkurkhou.

¹⁴ Asinungri neiyei thimi rapnungei hillou kou hungthukrouwo toubi phab dayernanungei keine neinungei yongkurame; kouweiyo toulanungri rmong heiwari hillei hungthukrou kyou ngam rapya mutpikura.”

¹⁵ Heitoubi ani keinungei tlou heiwaya yunpikur heirouri, keiyei mairung heiri thleira sikhuplhakurbi, keiri tloukhi yunchangmakne leikur.

¹⁶ Heirouri thilak, tlaipang thimiyei shakrung kmal khatni keiyei murpalra palpikur heirouri keine keiyei taka aangbi tlou yunkur; heitoubi keiyei maibongra mayungbi klei anungei shunkur: “O keiyei upawa, keiri rmongra hutlha kar'anmuwurnei ngamrou keilhawai lahwura, heingammei keiyei mantrang koukhi makkura.

¹⁷ Upawa, neiyei shik keineya koukumma upawanungei tlou kallangril manirouwo? Kouweiyo toulanungri, keiri kou mantrangkhi yaomakura, nilkhi shothutchangmakura.”

¹⁸ Heirouri tlaipang thimiyei shakrung kmal heiwane hanuikhi keiya palpiwurthu; heirouri keiyei mantrang hanui kallenglhakurthu.

¹⁹ Heirouri ani keiya shun, “Malungshipiya phakur thimi nangri chimaklo! Neidoura kying hoiniyasu! Ukningra rakkalo!” Heirou ani heisi yunkurle tallengni, keiyei mantrang phawurthu, heitoubi keine kyun, “Keiyei Pu Upawane keinungei shunpilaklo, kouweiyo toulanungri keiri mantrang phawurthulame.”

²⁰ Heirouri ani kyun, “Keine neinungei kyongri nangne phab daleiya? Heiya keiri asinung hanui kallengurbi Persia'yei Krungchale raal kardourillou; heineri keiri shalkura; heirouri thilak, Greece'yei Krungchani yongthurouwa.

²¹ Heisiya hoiyanungkhi, Chimyei Lailikra koutoubi mayelhakhouwo touri keine lamkrini neinungei shunpiheirou. Heinaksi yeekna raple maikroni keile mayungrilbi kardourillouri, neiyei thimi rapbei doura Pu hoibi klei Michael nimakne deiri hukhatkhi maklei.”