COLOSSIA 4 - KHYINGEI PU'TLOU Bible (BSI)

¹ Cheempurap, nane naiyei shok rapya watyilyeinung thuithine toupimak. Arouwei nane ningmulaklo touri, naiyeikhi Thangmunra Pu khat leileihui.

Shunmatupinei Tloubom

² Nane kheenserou krakni shunchabi Dunpuya mathanglak.

³ Heitoubi kanung tlimkhi shunchapilak, heisi toulanungri Dunpune kanungei kheenchaya phayerbine, kane mideiyei muphamakei klei Christaei Pao lhangaiya shunthutpi manerou. Ngam heini keiya angtu kulrilla chalphopbi klei ariya.

⁴ Keinung tlimkhi nane shunchapilak, heiyanungri keiyei yunthutpibom thuk tloubom rapya khyingni shunthutpi manerou.

⁵ Nane uklummak thimi rapnung lhou toupiyeinung sirei kheini toulak, heirou kheenserou nane trum lhangaiya thibine lhou toulak.

⁶ Naiyei yunthutkur tloulhangrap heiri kheenserou mideine ninglhakni, heirou khnimyei tloulhangrap hoiyerlak, heirou mideine tlou ngailanungkhi napung kantangnung chimni loumallangpilak.

Luinanungei Karyemthung Tlourap

⁷ Kaiyei malungshi'kna teinaowa Tychicus, heirou Dunpuei watlhoura malungamkna shik-palui, Ane keiyei ngamrou nanungei paotampirou.

⁸ Heinung'tlim keine aya naileinara heimalhetlei, heitoubi kaiyei ngamroukhi ane nanungei paotambine naya malung damyerrou.

⁹ Heirou ale kalhonne kaiyei malungshi'kna heirou malungamkna teinaowa Onesimus'khi naileinara walei, heirou akhi naihangra kyao thimi khatkhi khoi. Heirou yakhuntane arei kai klei heiyei ngamrou nanungei namyerwa yunpirou.

¹⁰ Keile kulrilra leikalhon Aristarchus'le, Mark'nekhi nanungei karyemnei tlouya shunthunglei. (Heirou Mark'ya nai hangra hungeinung lhangaine louropina'nungei paokhi haalnung shunthungurla.)

¹¹ Minri Justus toubikhi ung Joshua'nekhi nanungei karyemnei tlouya manthunlei. Ya napung-khyum heiri keile kalhonbi Dunpuei Krung'ramnung tlim lhoutoubi klei Jehudia rapbei hangrei uklum thimirap, heirou yakhyumni keiya kalne lhou churtrungpilei.

¹² Heitoubi naihangrei napawa napung-khat, heirou Christa Jesuei shik, Epaphras'nekhi nanungei karyemthunglei. Anekhi naya Christen'yei lhoura krakni mayungbi Dunpuei kningya hilthungbi rongtlungni klei manenanungei kheenserou Dunpunung buchabine leilei.

¹³ Heirou keinekhi aingamrou touri, ane nanungei tlimle, Laodicea'le Hi-erapolis'yei thimi rapnung'tlim lhou krakni churpinei ngamrou chimya shunthunglei.

¹⁴ Kaiyei malungshi'kna Thimkhui Luke heirou Demas'nekhi nanungei yaiyei karyemnei tlouya manthunthunglei.

¹⁵ Kaiyei karyemthung awari Laodicea'rei klei kaiyei teinao rapnungle Napuinu Nympha heirou aiyei cheemra wakartilbi klei khulbung rapnungeikhi lousherthutpilaklo.

¹⁶ Nane chethi aya louphayeinung, chethi awari Laodicea'rakhi pathutdurlame touri loumulak. Heini keiyei chethi awari Laodicea lhangrei yenpithungme toubi nane loukhalpilak.

¹⁷ Heitoubi Archippus'nungkhi asitoubi shunpilak touri, “Neinungei watyilkur Dunpuei lhouwai heiwaya luilhaknanungei toulak.”

¹⁸ Paul, keihut'hakni karyemnei mayepi chethi awaya nanungei manthunthunglei. Keiya kulra chalphopbi klei awari nanekhi malumpimaknia. Dunpuei kringpi heiwane naya kalhonpiniyasu.