COLOSSIA 3 - KHYINGEI PU'TLOU Bible (BSI)

¹ Nayari Christa'le kalhonne ringthutyerbi khringei chaanya phayerwurla, heini naiyei ukning heiri Christa'ne Dunpuei thya lhangra ombi leina Thangmun rammei putle heirou lhoubom rapra khoulak.

² Heitoubi nai lhawai heiri thakrei lhangra khoulak, heirou tlaipangei lhoura ningchabi leiwurmak.

³ Ngamri nane hiwurbi, naiyei rongchan heiri Christa'le kalhonne Dunpura leilei.

⁴ Christa'ne yongeinung naiyei mayung phaeirou, heirouri nakhi Ale kalhonne leibi Aiyei thang'allei siruk kantlangni phamalnarou.

Khman Heirou Ran Chaan

⁵ Naiyei sharungei lhou rapya nane heisi toulanungri, naiyei ukning rillei lhoutoubi klei tlaipangei madurap touri. napui-napawa tilrilnei borhlhou, chorit naimak, khramtang, lhangaimakya toukni, heirou heengtang-rotang rapya thrainakni khrumkniyei lhourap heinakrouwei leimaka.

⁶ Ngamri heinaksi lhoura Dunpuei kyunya ninglhakmak thimi rapbei doura Aiyei meithukei malungkha yongdaeirou.

⁷ Bongnungri kheen khatrou heinakei lhou rapne manebi leikhouweinung nai chaanrou, sharungei kning heirou maduyadik hilthungbi leikhou.

⁸ Heiya nane asinungri heinaksi lhou raprouwei, touri. malungkha, karhoukril, heirou ukningra machinkril heiraprei kartleilak. Heitoubi miya ngaalyernanungei tloulhangri kouniroukhi nai murrouwei kathukyermak.

⁹ Nari khatle khat mandallei tloukhi yunrilmak, ngamri naneri heinakei khman rongchanyei youkna rapya lakurkhoubi asinungri ranyei rongchanya nane phawurla.

¹⁰ Ari Sapipu Dunpuei kning heiyei ngamrou, Aiyei sheemthutkur hutsa rapya marthingpibi, heirou naya Anungei urlhakpiwurla.

¹¹ Ngam heini asinungri Gentile raple Jehudia rapbei karlhikril, heirou murdin thimi raple murdinmak thimi rapbei karlhikril heitoubi keithil mathai thimi raple Phringki rapbei karlhikril, heirou shok raple Krungei yu-cha rapbei karlhikril touri koukhatkhi makura, heiya Christa'ri namyerrei, heirou Anungei namma klei.

¹² Heitounei ngamrou, nari Dunpuei khalthutpikur thimirap khoini, marthingni heirou malungshirilni, khatle khat klah-knang dourumrilbi, kringpirilni, miyei klah'ya mupi thimirap, ukning khnim heirou kanthram khei thimiyei lhouya linglik naksine nalhaklak.

¹³ Nane khatle khat klah-trungrilbine, heirou khatni-khatdei klalyakhi kukpirillaklo. Heiri Pu Christa'ne naiyei klalkhi kukpiwurla.

¹⁴ Heirou namyerwa heiya rongtlungni khatsi hoinanungei dangphopkur mane- malungshiyei thang heiwaya nane nalhaklak.

¹⁵ Heitoubi nayari kyingei bomra ungpikur, sharung khatrei banrap hoiwurnei ngamrou, nai ukning rilla Christaei kying heini thrunglaksu. Heirou kheenserou mathanglak.

¹⁶ Heitoubi nane khatle khat shunmaturilyeinung, ukning thoubaangrilyeinung, heirou nane laa shayeinung, sheiputhee toubi kanyerreinung, heirou Dunpuya mathangna laa shayeinung, kheenserou nai ukningra Christaei shingkhei tlou rapne thimkur hoiniyasu.

¹⁷ Heitoubi nane tlou kyun hoiyasu, lhou touyeinung hoiyasu, kheenserou Pu Jesuei minra Pawa Dunpuya mathanglak.

Christen Bommai'yei Chanungei Lhoulamrap

¹⁸ Nurap, Christen napuiya khatdei toubomthuk khat khoini, nane naiyei shal rapnung pilhaklak.

¹⁹ Shalrap, nane naiyei nu rapya malungshilak, heitoubi yayari thuithini marhotpimak.

²⁰ Chanaorap, lhoubom kantangrou nai pui-payei shunya chanthunglak, ngamri heiwane Dunpuya pilyerkna hoirou.

²¹ Parap, naiyei chanao rapya malungkhananungei daimarekmak, nimanungri yaiyei ukning kanthritdurou.

²² Shokrap, nane naiyei tlaipangpallei Pu rapya, yaimitni naiyei lhoutouya muthungbi malungamyertom nimakni, nane nai puya rikrai-chile kalhonne nai ukning khyingni lhou toulak.

²³ Nane koukou lhou touya hoiyanungkhi, nai ukningra thimi rapnungei toupikur nimakni, Dunpunung watlhou toupime toubi khalbine lhouchurlak.

²⁴ Nane ningmulak touri, Dunpune Aiyei thimi rapnung marshikbi khoukur klahman heiwaya nanungeikhi piroume. Ngamri Christa'ri tanghakpane nai churbi klei watlhou Pu.

²⁵ Heirou klal lhoutou thimi napung kantangnung yaiyei klal lhou touwurnei klahmanya piyeirouhui, ngamri Dunpune thimi napung kantangya lingkhatra yukthrilbine leilei.