COLOSSIA 2 - KHYINGEI PU'TLOU Bible (BSI)

¹ Keine nanung'tlim heirou Laodicea'rei thimi rapnung tlimle heitoubi keiya shakmumak thimirap deidei namyernungei tlimkhi kounak krakni lhou churleiyo touri nai maibongra yunpiyeise.

² Keine anakya yunpi'kniri, yai ukningya thoubaangpibi heirou yaya malungshirilnei lhoura taangtilna'nungei tou, heisi toulanungri yaihangra khatle khat ukningra mulhakrilbine chimmei lhoura yenlhakna'nungei tou. Asitoubi yane muphachangmak Dunpuei kning touri Christaya mupharou.

³ A heiri mitne muphamakei klei Dunpuei shingkheiyei lal namtomaya laatthutna'nungei hangchei hoilei.

⁴ Heitoubi keine nanungei yunpilei, thimi hukhatnikhi naya klalyei yeetkril heiwane maneyermak, yai heiwari kounakei lhangai tloubom louhoiyasu, heirapne naya klal dayermak.

⁵ Ngamri keiyei sharungni naihangra leimakanungkhi, keiyei lhawaini nakou kalhonbi leilei, heirou nane Christa'ra khatsi khoini mayungbine naiyei uklum heiwaya karbilni sabaangbi mayungnei ngamrou keiri beimakne malung-khrahwura.

Christa'ra Rongtlung Chaan Klei

⁶ Nane Christa Jesuya Kalpipu khoini loulhakur hillouri Ale kalhonbi leilak.

⁷ Heitoubi nanungei shunmatupikur heiwarou naiyei uklumnei yrung heikhi Anungei khyukne runyerlak, heitoubi Aidoura naiyei rongchanya sabaangbine uklum heiwaya mantrangyerlak. Heirou ukningra Dunpuya mathangnei lhouni thimyerlak.

⁸ Heiya thilaklo touri, Christa'rei nimakni thimi hukhatnikhi nayari koukhi karsukmak tlaipang thimiyei shingkheini, heitoubi thimi rapne bongei waiyoubi louyoukna lhourap heiwaya yrengchabi, nanungei shunmatupikur nimaklei.

⁹ Ngamri Christa'ra heirou Aiyei sharungra rongtlungei chaan leilei,

¹⁰ heirou nanungeikhi Ale kalhonnei ngamrou heinaksi rongchanya pulni pilei. Heirou A heiri mane-mantrang namyerrei lu hoilei.

¹¹ Christale kalhonnei ngamrou nayari murdinnei lhouya toupiwurla, heinaksi lhou heiri tlaipang thimiyei hutne murdinkurri nimak, heiya Christa'ne naya paapbei lhourei malhetthutyernei lhouya toupibi naya ukningra murdinnei lhouya toupiwurla.

¹² Ngamri nane yui lupbeinung, nayari Christale kalhonne phumchokurla, heitoubi yuiklup heirouei nane uklumnei ngamrou, khirouwei ringyerkur Dunpuei mantrang heiwane nayakhi Christale ringchokyerpila.

¹³ Heirou nari, naiyei borh lhoura, heirou naiyei sharung un dinmaknei ngamrou hibi leikhou. Heiya Dunpune nayari borh namma kukpiwurbine, Christakou pulne ringyerpiwurla;

¹⁴ heirou kaya karhakril lhou raple, tlaipang thimiyei hutne mayethutkhou youkna namyerwa heiya Ane toumitdurla, heitoubi heirapya Ane urlouheibi Cross doura hemphopburla.

¹⁵ Heirou Christa'ne tlaipangei lhou'urpu laa'urpu rapbei heirou mane-mantrang rapbei hutrei kalthutnanungei raal maneyei lamkrui heiwane thimi rapbei maibongra yaya ruibine, heirou Ane Cross doura hipibi yaya malhetthutpila.

¹⁶ Heiwane ngam hoibi thimi hukhatnikhi naiyei cha'kmai ngamrou, nimanung khyingei tlaini, nimanung tangladou hungnei kneitlun ngamrou, nimanung Mathrilna tlainiyei ngamrou toumak yamakme toubine youknaya sheemthutyermak.

¹⁷ Heinaksi lhourap namma heiri hillei hungthukrou kyou lhou rapbei lhimdikme; heiya nam'rouwei chimri Christa'tomngei.

¹⁸ Thimi hukhatnikhi nayari lhawaiyei lamra mit-mai kwaarme toubine, heirou klal thimi rapya mathangbine, heirou Thangring rapya khrumbine naidoura klal dayermaklo. Ngamri thimi khatni heinaksi aitamtomei kning heiwirou aya klu dayerheirou.

¹⁹ Heirouri sharungei lu hoibi klei Christaya uklum heiri trimmurheirou. Heiya Christaei koolphopna rilla thru-konglhok, shamitee heirou yra namyerwaya pulne leiyerbine, Dunpuei tangyerkni heiyei hilthungne tangbaangbi klei heiriya.

Christa'ra Hiwurbi Katringthut

²⁰ Nari Christa'le kalhonne leibi, heirou tlaipangya kulchalbi klei lhawai raprei naya malhetthutdurla. Heiyanungri, koutoubi nane tlaipangei pu hoibi klei thiminakni thrungeirouwo? Nane heinakei tloulam rapya,

²¹ “Anaksiri pal'kya, heirou heinakpiri pal yamaklei, heitoubi heinaksi cha'kmai putri martam yamak, heirou anaksiri martam kya,” toubine chanthungbi kleiya koutouneiyo?

²² Heinak namyerwa heiri bongei louyoukna thimi rapbei sheemthutkhou lhou rapthil, heirou asinungri heinakya koukhi karsukmak hoiwurnei khingurkhou lhouthil.

²³ Heiya heinaksi lhourap heikhi yane thimi rapya shunmatubine, Thangring rapya khrumkyer, heitoubi thimi rapbei thangya mathangyerbine, heirou sharungei lhou rapya chanthungyernanungei yrengchakhou, heiya yane kaiyei sharungya kulchalyerbi klah dayernungei lhouri koukhi maklei.