COLOSSIA 1 - KHYINGEI PU'TLOU Bible (BSI)

¹ Dunpuei khalthutkur, Christa Jesuei Paocha thimi Paul keile heirou keiyei teinao Timothy'rei chethi awaya manthunthunglei-

² Christa'ra kaiyei malungamna kya Colossae Church'rei klei Dunpuei thimi rapnung mayepithunglei. Kaiyei Pawa Dunpune nanungei Aiyei phor heitoubi kying pilaksu.

Dunpuya Mathangnei Shuncha

³ Kane nanungei'tlim shunchapi'yeinung, karyomni kaiyei Pu Jesu Christaei Pawa Dunpuya mathanglei.

⁴ Ngamri Christa Jesura naiyei uklum heirou Dunpuei thimi rapya nai malungshipi heiri kane mayekphalei.

⁵ Lhangaiyei Pao-laaya nanungei shunthutpi'yeinung, paolaa heiwaya mayekbine naya uklumyerla. Heini naiyei uklum heile malungshiril heiri Thangmunra klei Heiwaya malungamnei ngammei.

⁶ Lhangai Pao-laa heiri Dunpuei phorya tlaipangpal karyouni wa'tlungyerla, heiri nanekhi heinakya mayekloubi Dunpuei phorya tanghakne nane phaloukhei naksine hoilei.

⁷ Nane Dunpuei phor heiwaya, Christa'nungtlim klei kaiyei malungamkna lhou churmalkna thimi Epaphroditusrei nanekhi mulouheila.

⁸ Naya Lhawaini malungshipinei ngamrou ane kanungei paotampiwurla.

⁹ Heiyei ngamne kane nai'ngamrou mayekleiyen, nanungei'tlim Dunpunung karyomni shunchabi leilei. Nanungei Aiyei Lhawaini pikur shingkhei-mukheini Dunpuei kning heiya muyerpinanungei kane buchapilei.

¹⁰ Heisi toulanungri nane Dunpuei madu heitoubi Aya malung khrahyernei lhouya karyomni toubi leimanerou. Naiyei chaanrou lhangaiyei lhouyadik toubine heirou nane Dunpuei shingheinara choune paalchangrou.

¹¹ Nane Dunpuei thang'allei mantrang heiya phaloubine heirou naiyei mantrang katduilhakbi, klah-knang kounakroukhi pulchini kheenserrou kanthram manerou.

¹² Heisi toubi nane kwaarrei Krungbomra Dunpune Aiyei thimi rapnung marshikpikur sirukya phabi, heirou nane Pawaya hakraoni mathanglaklo.

¹³ Ngamri Ane kaya kmehyei mantrang'rouwei kalthutpi, heitoubi Aiyei Chanapawaei Krungbomra kaya kyingni urlhakpila,

¹⁴ heirou Ane kaya kaiyei borhya kukpiwurbine, heitoubi kaya malhetthutpila.

Christaei Rung Heirou Aiyei Lhou

¹⁵ Christa'ri mitni muphamak Dunpuei rungkhlang khoini mitdei mupha Dunpu hoilei. A heiri Dunpuei hutsa namyer'rouwei tangdui, heitoubi pukpikur Chanapawa samran.

¹⁶ Aiyei ngamrou Dunpune Thangmun'rakhi heitoubi tlaipang dourei mitdei muphakhi-muphamakhi, heirou krungkul rapkhi, pu rapyakhi, lhou'ur laa'ur thimi rapne heirou mane-mantrangyakhi namyerya sheemthutpikur. Dunpune Aiyei ngamrou heitoubi Anung'tlim tlaipang namyerya sheemthutpikur.

¹⁷ Christa'ri namyerouwei lamkrini louklei, heirou Ale kalhonbi put namyerwa heiri ai'aiyei bom chane leikyer.

¹⁸ Ari Aiyei sharung touri, Churchyei lu hoilei; heirou Aiyei sharungei chaan yenyouna bikhi hoilei. Ari hikur thimi rapbei hangrouweikhi ringthutkri Cha samran khatme, ngamri Aitam'tomni put namyerrouei lamkri thimime toubi mutlei.

¹⁹ Ngamri Dunpu Aitamei kningni Christa'ra Dunpuei rongtlung sharung leilei.

²⁰ Heitounei Chanapawaei ngamne, Dunpune tlaipang aya Anungei mallenglhakurla. Dunpune Aiyei Chanapawane Cross doura makatbi hipikur ngamne, tlaipang-Thangmun khintamei putchei namyerwaya Anungei mallenglhakbi, heirou namyerrei doura kying hoiyerpila.

²¹ Kheen khatrouri nakhi lhangaimak lhou rapya khalbi touwurnei ngamrou Dunpurei tlatrilni leiwurkhou.

²² Heiya asinungri, Aiyei Chanapawaei sharung kyaoni hipiwurnei ngamrou, Dunpune naya Aiyei pongra urlhakbine, naya Aiyei paluirap hoiyerpila, heirou naya marthingyerla, heitoubi klalkhi makni Aiyei pongra leiyerpila.

²³ Heiyanungri, nakhi malungamna kya Cheemmun doura karbilni sabaangbine leilakalo, heirou nane Lhangai Pao-laaya mayekloubi nanungei tungchakur heirapya hangwalne malummakne leiyalo. Heinakei Lhangai Pao-laa heirouei Paul, keihakhi Aiyei shik hoikurme-Lhangai Pao-laa awari tlaipangpallei thimi kantangnung shunthutpikur heiriyame.

Paul'ne Church'nungtlim Lhou Churkur

²⁴ Heirou keiri asinung Anungei'tlim klah-knang doukur awari keinungei nungkngai khatkhi khoi, ngamri keiyei sharungei klah-knang doukur awane Christa'ne Aiyei sharung touri Church'nungtlim klah-knang doupiwurkhou heiwaya rong tlungyerna'nungei khoi.

²⁵ Heirou Dunpune keiyari nanungei heinakei lhangai lhouya toupina'nungei toubine Churchyei shik hoiyerwurla.

²⁶ Lhou heiri bongei youbi thimi hukhatnungeikhi shunthutkhoumak heiwaya asinung Aiyei thimi rapnung shunthutkur Lhangai Pao-laa heiriya.

²⁷ Dunpuei kningri, Aiyei klui naimakne dunbi klei heirou thang'alne bil thimkur Lhangai Pao-laa heiwaya thimi namyerwanung shunthutna'nungei lhou heirime. Heinaksi mideine muphamak Lhangai Pao-laa heiri, Christa'ri nai ukningra leibi, heirou nane Dunpuei thang'allei bomra siruk dongmalnarou.

²⁸ Heisitounei ngamrou kane Christaya thimi namyernung shunthutlei. Heitoubi shingkhei-mukheini kane thimi napung kantangya shunmatubine, Christa'ra yaya rongtlung thimirap khoini Dunpuei bomra urlhakpina'nungei marshiklei.

²⁹ Lhou heiwaya keine luilhakna'nungei toubi, Christa'ne keinungei pikur mantrang heiwaya yrengbine keiyei hut-ho sirei kheikhi kyaoni keine lhou churbi leilei.