AMOS 9 - KHYINGEI PU'TLOU Bible (BSI)

Umpu ei Pichar

¹ Umpune khrahpal doura mayungbi klei heiwaya keine muwurla; heitoubi Ane shunlei, “Pucheemyei shutlai rapya namma shatdeeklaka, heitoubi cheembom namma kanthingyerlak; heitoubi cheem heiwa deek'khromsundayerbi thimi rapbei lura yongdaphopnayerlak; heirouwei hichimak rapyari Keine raalshon'ne hiyerrou; heirou huchakhatkhi trukthutbi kartleikur manemakrou.

² Kounakpi yane Sheol'ra yuk'utbine yongchanganungkhi, bi heirouwei, yayari Keihutni yuktangthutlourou; heirou yane thangwanra loutrukbaanganungkhi, bi heirouwei Keine yaya taangsundarou.

³ Heirou yani Carmel Lhungdoura loutrukyulbikhi, bi heirouwei Keine raphabi manthutlourou; heitoubi yani Keiyei mit'thrilna'rouwei samadru mayura louyulbinekhi, bi heirouwei Keine phrulya chay yukpirou, heitoubi ane yaya louchikrou.

⁴ Heirou yaiyei yeekna thimi rapne raalla manlouheibine kul chalphopbi leiyeinungkhi, bi heitamroukhi Keine chay pibine yayari hatduryerou, heirou Keine yaidoura lhangainanungei mit'thril nimakne mangnanungei thuithiyei mit'thril khourou.”

⁵ Thangmun-Shimlei khintamyei Pu Dupune tlaipangpalla ho trummurla, heitounei tlaipangpalri yui khoine yasundarouwa; heirou heiyei rilla paalbi klei thimirap nammani klah-mrimne kanrelbi leiwurchiya, ngamri tlaipangpalri Egyptrei Nile kungrei yuitangni dumphopkur heinaksine namma dumphopbine martlaochila.

⁶ Umpune Aiyei Sinayei Shangkai heiwaya thangwan katokne sabaangkhoulei, heitoubi heiyei cheemmunri Tlaipang thleidoura dunbine sabaanglei; heitoubi tlaipang thleimai doura nung rosundayerpilei. Yerrouwei Choudui Pu, Umpu heiwari Aiyei minhoume.

⁷ Umpune shunlei, “Nari Keinungei Ethiopia'yei chanao rapnaksi nimakeiko! O Israellei chanaorap. Israel rapyari Keine Egypt ram'rouwei ruithutloukur nimakko? Heitoubi Philistia rapyari Caphtor'rei, heirou Syria rapyari Kir ram'rouwei Keine ruithutdurkhou nimakko?

⁸ Thilak, asinungri Pu Dupuei mit'thrilri borh thimi rapbei doura leiyura; heitoubi yayari tlaipang dourouwei mangyerrouwa, heirou Jacobei bommai'yatom Keine kalpirou,” toubi Pu Umpune shunlei.

⁹ “Kouweiyo toulanungri thilak, leikhora cha homthaikur heinakni, Israel rapya Limdei rapbei hangra homlhakurnanungei Keine chay pirouwa; heiya thleira khatchtomkhi leithungyermakrou.

¹⁰ Heirou Keiyei thimi rapne, ‘Kaidoura kounikhi klah dayerchangmakrou, heirou koukhatnikhi kayari louthingchangmakrou’ toubi yunbinekhi, borh thimirap nammari raalshonra hichirouwa.”

Israelya Hillouri Kalpi Phayerrou

¹¹ “Heirouri tlaini hei hungtlunganungri, kanelkur David'yei Pucheem heirou aiyei Krungkul deekbaikur rapya Keine khulkanthoubi sabaangpirou, heitoubi deek'baisundakur aiyei Krungkullei raalpal rapkhi Keine khulkanthoubi bongei nakrimni sabaangpithurou, heitoubi mallenglhakpirou.

¹² Heirouri yani Edom'yei maleithungkur ramya loulhakbi, heirou uklumbine Keiya mintlangbi ungbi klei Lim deiyei thimi rapyakhi Israelni kul chalphopbeirou,” toubi Umpune shunlei.

¹³ “Thilak, tlainirap heiri hungurame,” toubi Umpune shunlei: “Trunluk thimi rapne lukchichangmak ramphane lungtuk thimi rapne tuklhakbi katpukthutdura; heirou darkha heiyui shumchichangmak ramphane yekul trun thimi rapne darkha yam lingpukbine kat'heiyura; heirou lhungdourei darkha heiyui ranyathil yenkungsundarouwa; heirou lhungpumcha raprouweikhi darkha yui yenyasundarouwa.

¹⁴ Heirouri Keiyei thimi Israel rapya kul chalphopbi khounarei Keine yenruimallengthurou; heitoubi yane yaiyei deekbaisundakur Khukarthil rapya yane hanui sabaangthurou; heitoubi heirapbei rilla yane thrungbine heirou darkha yekulrap trunbine, heirouwei yane darkha yui shummongeirou, heitoubi yane yekulkhi trunbine heirouwei chamairou.

¹⁵ Heisitoubi yayari Keine yai ramra paalyerrouwa, heirouri Keine yanungei pikur ram'rouwei yayari hanui kallengni tangthutlouyermakrou,” toubi naiyei Pu Dunpune shunlei.