AMOS 8 - KHYINGEI PU'TLOU Bible (BSI)

Heikhmin Shangphai Khat Kar'ankmu

¹ Heirouri thilak, Umpu, Dunpune keinungei kar'anyerbi manthrallei heilim khmin shangphai khat muyerpikur.

² Heitoubi Ane heikngai, “Amos, nangri kou'kouya muleiyo?” Heirouri keine loumallangkur, “Manthrallei heilim mintruikur shangphai khat muleime.” Heirouri keinungei shun, “Keiyei thimi Israel rapbei trimna-khamna trum hungura; Keine kouniroukhi yayari tanti pimakne horkhoumakrou.

³ Krungkullei laasha rapkhi heiyei tlainirouri kanrelnei laasherbi nrienei hou heiwani yaiyei laakhun hoirouwa,” toubi Pu Dupune shunlei. Heitoubi bi kantangrou khi'lhung rapne bi thimni dabi leirouwa; heirou yayari kouhoukhi mayekyermakne riprip daini khi ruipirouwa.

⁴ Kyun awaya louningpilaklo, tounaram mak thimi rapya tatmanuipi thimirap nani, heirou kanring-kanwai saracha rapya thuithini marhotbi konmangpi thimirap nakhi louninglaklo!

⁵ Heirou naneri asitoubine yunthulei, “Kane trunwaiyei lung marthumni yorthungnungei tangla khman kouwa luilhakurbi, heitoubi kouninung tangla ranyei tlaini hungtlungrouwo? Heirou gehu yornara ephah shangphai toumandiwurbi tuy duini louthungkur yananungei, heirou serphalara minambi putchei yorthungnungei mathrilna tlaini Sabbath'ri kouninung hungtlungrouwo?

⁶ Heiyanungri kanring thimi rapyari kani tuyni loloukur yarou, heirou tounaram mak thimi rapyari khorkhang pu khatkou kartlengloukur yarou; heitoubi gehu ker kyao rapyakhi mandalbi yorkur yarousame?”

⁷ Umpune Jacobei tangchakurya mubine Aiyei ukningra kantomwurla, “tanghakpani yai touwurkhou lhourap heiwari Keine tekkhi malumkhoumakrou.”

⁸ Heinung'tlim tlaipangpal awari kartlinmakrou leileiko? Heirou tlaipangra paalbi klei thimi kantangne kanrel laa shermakrouko? Heirou tlaipangpal namma kungrei tuywok katpathutkurnakni katpayourouwa, heirou Nile kungei tuylhou mathumbaangbi yendalhakkur heinakni tlaipangpal awakhi thukheirou.

⁹ “Heitoubi heiyei tlainirouri asitoubi hungthukheirou,” Pu Dupune shunlei, “Nunghangei kheenrou Kinniya Keine yongchipyerrou, heitoubi nunghang tlaikallei kheenrou tlaipangpalya Keine masa yantrimnakne mehyerrou.

¹⁰ Heirouri naiyei Kneitang tlunnei chak'khang heiwaya Keine khi'knayei kanrel laashernei trum hoiyerrou, heirou naiyei hakrao-nungkngaiyei laa shanei hourap heikhi Keine lhawai klahne chapnei hou hoiyerrouwa; heiyei tlainirouri Keine nayari nai lu ngoumathaiyerbi, heitoubi phichunya upyerbi, cha mranglam khatpatom leikhoubi hikur pui-payei kanelkhupkhup chapkurnakni hoiyerrouwa. Heitoubi heiyei tlaini heiwari hungdongnara yunnungei makne khakur tlaini hoirou.

¹¹ Thilak, tlainirap heiri hungura,” toubi Pu Dupune shunlei, “Ram heirouri Keine butam thukyerrou, heitoubi ram heirouwei butam thukrou kyou heiwari chamu-maimumakurbi, msul-yuikhat thuknungeiri nimakrou, heiya yane Umpuei paolaaya mayekninei msul-yuikhat hungthukheirou.

¹² Heirouri thimi rapne Pu'tlou ningknine samadru mnaak lhang khat'rouweini khatlhangrakhi heiralthutbi, heitoubi yani khalu lhangrouweini kulkung lhangrakhi kyongle-kale chanfletchani ningpharou, heiya yani kourakhi Pu'tlou mayekphamakrou.

¹³ Heitoubi heiyei tlaini heirouri shal dunmak shakrung lhangai nangakarap, heirou mantrang lhangai kartlang rapkhi yuihatnei meishani kanellhakrouwa.

¹⁴ Samaria'yei thrailha rapya mintlangbi, ‘O Dan, neiyei thraini ringliyenri,’ toubi, nimanung, ‘Beer-sheba'yei thraini ringliyenri,’ toubine malungambi tlou kantombi mayung thimi rapri heisi kanelrouwa, heitoubi yari kouniroukhi kanthoukhoumakrou.”