AMOS 6 - KHYINGEI PU'TLOU Bible (BSI)

Zion'yei Kying-nungkngai

¹ Zion'yei kying-nungkngaiya raphabi, Samaria'yei molshangya kallengnungei malungambi klei thimirap, tlaipang lim rapbei karsilkna Israel bommaiyei yama krung uparap, nanungei, lhawai lah'knaei lhoume!

² Nane Calneh toubi ung khukarthil heiralbine wathilak, heitoubi bi heirouweini ri'karchunnakhi naimakna khukarthil Hamathra nani ram wathrillak; heirouweini nani Philistine'yei khukarthil Gath'ra yubine heithrilthilak; yairam heiwini naiyei Krungkulya duini nungwaileiko? Nimanung yairam heiwini naiyei ramya duini tangleiko?

³ Lhangaimak thuithikur tlainiya nani tlatni loutheiwurbi, heenai darilni hatrilnei bomya yennakyerbi leithulei.

⁴ Saiha'ne mansambaangkur ipna khumdoura, hut-ho shungbine ipkarngabi klei thimi, heirou yaorul hangrei yaoshun marnamya hatmaibi klei thimi, heirou halshangrei halshun marnamya khalthutloubi hatmaibine klei thimirap yanungeiri lah'knaei shakrungme.

⁵ Taariya marhui-marhuiyei houni taangkhungbine, yaitamne laakhi shanimakmamane shabine klei thimirap, heirou David'yei naksine yaitameinung touri taarikhi toutlikhi chungwani sheemthutbine klei thimirap, yanungeiri lah'knaei shakrungme.

⁶ Lhangaiyei daarkepra darkha yui fleithutbine mongbi klei thimi, heirou manklu muiknam shirekya yaiyei lu, hut'ho, heirou sharungrakhi lhuimakne teiphaangbine leilei, heiya Josephbei bommaine klah-mrimkurya koukhi lhawai lahpimakne, kanrelpimakne leikur thimirap, yanungeiri lah'knaei shakrungme.

⁷ Ngam heineri yarap heiri raal manloubi kul chalphopkur thimi rapbei hangrari yani lamkri hoirouwa; heirou yaiyei yunnungei makne nungkngaini leiwurkhou chaan heiwakhi luirouwa.

⁸ Pu Umpu Ahakpane kantomlei touri Thangmun-Shimlei khintamyei Pu Umpu, Dunpune shunlei, “Jacob'ne tangchabi kanyerchakur heiwari Keiri machinkna; aiyei maleh'kheiyei sabaangkur raalpal heiwakhi Keiri yanimaklei; ngam heineri khukarthil heiwale, heiyei rillei klei thimirap heirou lalthumrap nammaya yeekna thimi rapbei hutra Keine pilhakrouwa.”

⁹ Heirouri asitoubi hungthukeirou, touri bi heitamrou cheem khatrou napawa napung-chipchatom ringbi louleiyanungkhi, yari hirouwa.

¹⁰ Heirou khi thimiwaei cheemkhurthuk khatni khi ruinungei cheemwaira khi'lhungya louthutrou wachangeinung, heirou ane, “Nangkou thimi deikhi leileihuiko?” toubine heingaithieirou. Heirou ani, “Hukhatkhi makkurame,” toubi loumallangrou. Heirouri ani heishunrou, “Mulleiriya, kouweiyo toulanungri, kane Umpuei minya palnungei yamakrou!”

¹¹ Kouweiyo toulanungri, Umpune chay piwurla, touri cheemtang rapkhi haar'haar dane umbairouwa, heirou cheem mandicha rapkhi rahui holchirouwa.

¹² Sapuk rapne thlung doura chanchangrouko? Heirou huni yuinalira halput shinbine louhui youknako? Kouweiyo toulanungri, chimmei picharya nani khru hoiyerwurla; heirou tharmu chimmei lhou heiyari nani simlimkhanak hoiyerwurla.

¹³ Koukhi nimakne Lo-debar'ya manebi loulhakkurme toubi naitamni yunkanthangnabi, “Kaiyei mantrangni Karnaim'ya manekur nimakka?” toubine kanyerchabi nungkngai thimirap nari muheiyalo.

¹⁴ “Heiya thilak, ‘Keine naidoura karhane raal younanungei lim khat sheembaangrouwa, O Israel,’ toubi Umpu, Dunpune shunlei; heitoubi yane nayari Lebo Hamath'rouweini Arabah'yei phaikar wa'tlungphane klah-mrimne marhotdeirou.”