AMOS 5 - KHYINGEI PU'TLOU Bible (BSI)

Ukning Hungnanungei Ungpi

¹ Israel bommaiyei thimirap, Keine nai ngamrou kanrel-laasherle kalhonne shunkur tlouya louninglaklo.

² “Israellei karyuikna nangak chaan heiri thleira kimsundawura, a heiri hanui kallengni kanthoukhoumakrou; heirou aiyei pukna ramnekhi ayari horthutdurla; hunikhi ayari khulkanthoupirou makkarou.”

³ Kouweiyo toulanungri, Umpu Dunpune asitoubi shunlei, “Israel rapbei khukarthil'rouwei raallui lishing khat malhetthutdurbi, machatom himaleithung, heirou khukarthil heirouwei lhouwarap macha'khat malhetthutdurbi napungchiptom Israellei cheemra yenkallengkur.”

⁴ Kouweiyo toulanungri, Umpune Israellei bommainung asitoubi shunlei, “Nane Keiya raphalak, heitoubi ringlak.

⁵ Heiya nani Bethelyari raphamak, heitoubi Gilgal'rakhi wachangmak; heirou Beer-sheba'rakhi heiraalbine chamak; kouweiyo toulanungri, Gilgal'ri mine raal manlouheibi kul chalphoprouwa, heirou Bethel'ri koukhatkhi karsukmakne mangrouwa.”

⁶ Umpuya raphalak, heiyanungri nani ringrou; heinimanungri Josephbei bommai doura Ane mei yukmalhetsundabi kaangtlumyerou, heinaksi meini kanglanungri Bethel'ya hunikhi kalpirou makne leirouwa.

⁷ O Dunpuei picharya shimlim khanakni khayerkur thimirap nari, heirou tharmuei tlouya thleira khingsundakur thimirap nariyo!

⁸ Aya raphalaklo, touri chukhrukya heirou kaflayakhi sheempipu, heirou khiyei lhimyakhi ningshun kulkanakni waaryerchang Pu, heirou nunghangyakhi masa kmeh holyerkur mani Pu, heirou samadrura nung ungsundapi Pu, heitoubi thleimai doura nung rosundayerpi Pu, Umpu heiri Aiyei Choudui minhoume!

⁹ Ane mantrangkur Krung rapya karhane, klah-knang deekbai thukkur rapya mantrangyerou; heirouri klah-knang deekbai thukkur rapne mantrang Krung rapbei doura maneheirou.

¹⁰ Nane pichar bomra chimni pichar toupi thimiyari machinpilei, heirou tharmu chimmei tlou kyun thimiyari nane horthibi yanimaklei.

¹¹ Ngam heineri, kanring-kanwai rapya nane tatphopbine marhotpiliyen, heirou yairouwei chaei rui heirou tsaiyei rui kabom thukyakhi duine namduibi rui thouleiyenri, heiyei ngamni nani thlung kwaarni cheem shangkaikhi sabaangkur manirou, heiya heinaksi cheemra nani leikhoumakrou; nane darkha hei yekulkhi lhangai-karyuini lingpukbine trunthutrou, heiya heiwayei hutlha heiyuiri nane mongmukhoumakrou.

¹² Kouweiyo toulanungri, naiyei heinak chungkur borhya, heirou klalyei lhourap kounakya Keine muchilei; ngamri nani tuy chanei lhou toulei, heirou tounaram makthimi rapyakhi pura ilthutdurpibi chimmei tlouya yunthutyermaklei.

¹³ Ngam heineri khyalda thimiri heinaksi kheenrouri koukhatkhi yunthungmakrou; kouweiyo toulanungri, kheen heiri lhangaimakme touri ane kmu.

¹⁴ Lhangaiya raphalak, heirou klal lhou toumak; heiyanungri nani ringrou, heiyanungri naiyei yunthutkur heinakrimni Thangmun-Shimlei khintamyei Pu Umpu, Dunpune naya kalhonpirou.

¹⁵ Lhangaimakya machinlak, heirou lhangaiya malungshilak; heitoubi pichar bomra tharmu chimmei picharya toupilak; heiyanungri thangmun-Shimlei khintamyei Pu Umpu, Dunpune Josephbei maleithung yu-cha rapya kringpikheini kalhonpirou.

¹⁶ Heiyei ngamni thangmun-Shimlei khintamyei Pu Umpu, Dunpune atoubi shunlei, “Khukarthillei khullam kantangra, lamtlunthung kna'nrinei houni kartlinrou, heirouri thimichung kartilna bungtungna bi kantangrou yani ‘Ulleiyo! Nuwiyo, asueiyo!’ toubine ungraochane kanrel laasherne chapbeirou. Heirouri loutrun thimi rapnekhi kanrel laasherbi chapkur heiwani yaiyei lhou hoinarouwa.

¹⁷ Heitoubi yekul kantangrakhi klah-knangei nrinei houni thim'rouwa, kouweiyo toulanungri, Keine naihangra yenchangheirou,” toubi Umpune shunlei.

Umpu ei Tlaini

¹⁸ Umpuei Tlainiya mu'kniyei karngei thimirap nanungeiri laknayei lhoume. Umpuei Tlaini heiwani nanungei kouya tounaeirouwo? Tlaini heiwari kwaar touri yaomakrou, heirou kmeh masa naksine hoirouwa.

¹⁹ Tlaini heiwari thimi napung-khatni yangkong chinei truknarou yekthrum truk'karthang naksini hoirou; nimanung thimi heiwane cheemwaira polhakbi rapthang nanchani klah mathrilyeinung frulne aya louchikpikur heinakrimne hoirou.

²⁰ Heinakrimni Umpuei Tlaini heiwari kmeh hoimakrouko, heirou kwaar touri tekkhi makrou nimakeiya? Tlaini heiwari kmehyei kmeh hoiwurbine kwaar touri koukhatkhi almakkarou nimakka?

²¹ “Naiyei khul-chaak khaangnei Kneitang heinakri Keine machinkna, heirou yanimak; heirou naiyei lhoutang-laatang tounei kulyom kartilnei lhou heiyakhi Keine koukhi madupimak.

²² Nane Keinungei trunwai hutlha hei rapya makatbikhi, heirou thuinaput khoine mroh kun ikbi makatbikhi heiwaya Keine loulhakpimakrou; heirou naiyei yaoshun-halshun marnam khalthutbi thuinaput khoine makatbinekhi heiwarou Keine mit'thrilpimakrou.

²³ Nane Keiya kanyerpinei laa shanei houkhi Keirouwei louthutdurlaklo, heirou taari tangkhungnei houri Keiri ningnimakura.

²⁴ Heiya chimmei pichar heiwari kungrei tuysirnakni kungsundalaksu, heirou tharmu chimmei lhoutou heiwari kungtangrei tuywoknakne yenpahoilaksu.

²⁵ “Nane ramthingra leiyeikalnung Keinungei malamput raple thuinaput rapya kum somli makatkhou nimakka, O Israellei bommairap?

²⁶ Heiya asinungri nani Moloch'ra klei Pucheemra dunbi khoukur nai Krungei runglha Sakkuth'ya, heirou Kaiwan touri Chiun sorwalha rapya nani naitamyei kningni sheemthut-sathutbine, heirapya nane thrai khoine chouni mathangbangbi kanyernalei.

²⁷ Heingammei Keine nayari raal manloukur thimirap khoine Damascus kraalne malhetrouwa,” toubi Umpune shunlei. Aiyei minri Thangwan-Shimlei khintamyei Pu Dunpume.