AMOS 2 - KHYINGEI PU'TLOU Bible (BSI)

MOAB

¹ Umpune Moab'nung asitoubi shunlei: “Moab'ne khyumbui-phalibui kallengni borh touwurnei ngamrou, aidoura klei tanti heiri Keine thikmallengmakrou; ngamri ani Edom Krungei thru-khrongya rikrai khrumpikhi makne meira ut holni hongkur.

² Heiya Moabei doura Keine mei malhetsundarou; heitoubi Kerioth'yei Krungkulya meini tlungne kaangtumyerrou; heirouri Moabei thimi rapri raallui rapne raalbomra raalsone ungraochanei houle Pengkul houya chi-kanchunbi hichirouwa.

³ Heitoubi Moabei Pichar pu raple yama Krung rapyari Keine raalshonra hiyerchirou,” toubi Umpune shunlei.

JUDAH

⁴ Umpune Judah'ya asitoubi shunlei: “Judah'ne khyumbui-phalibui kallengni borh touwurnei ngamrou, aidoura klei tanti heiwari Keine louthutmakrou; ngamri yani Umpuei chaylamya tlou khoine loupimakura, heirou Aiyei chaytlouya chanthungmakura; ngamri bongei yai nutar-patar rapbei khrumkhou thrailha rapya yani khrumrilbi chakhouna lamra chawurchiya.

⁵ Heiya Keine Judah'yei doura mei malhetsundarouwa, heitoubi Jerusalem Krungkullei raalpalya tlumne kaangtumyerrouwa.”

Israellei Doura Umpu ei Pichar

⁶ Umpune atoubi shunlei: “Israelne khyumbui-phalibui kallengni borh touwurnei ngamrou, Keine aidoura klei tanti heiwari louthutmakrou; ngamri yani tharmu chim thimi rapyari sina-lapa'nungtlim yorwurla; heirou kwat'samni tounaram makkur thimi rapyari khorkhang pu khatnung'tlim karlhengpiwurla.

⁷ Heirou kanring-kanwai saracha rapyari lura hopaakni tatphopbine, rahui hangra tatmanuipiwurla; heitoubi ukning khying thimi rapyari lamruira ilthutdurbine marhotdurla; heirou Keiyei khying minya marmokyernungei chawale pawale yarilbine chorit naimak napuiya khatpiya ippiwurla.

⁸ Heirou yaiyei laltullei khlang'nungei matkhou punshel rapya yani khrahpal holira myerpaakbine neinawurla; heitoubi leichuinei darkha yui rapya yani Pukhrumna Cheemra urlhakbine mongurla.

⁹ “Heiya thilak, tang-lamchounara Cedar heengtrung naksine, heirou mantrangnarane bok'heeng naksine paalkhou Amoria'ya Keine naiyei maibongra maangyerwurla; heirou aiyei yrung kyaoni phukthutdurbi, aiyei hei ramphayakhi taaryerwurla.

¹⁰ Heirou Keine nayari Egypt'rei ruithutpibine, Amoria'yei ramya naiyei ram hoiyernanungei toubine Keine naya ramthingra kum somlibil ruichawurkhoula.

¹¹ Heirou naiyei chanaorap thayari Keine thimkhui hoiyernanungei ungthutpikur, heirou naiyei cha kartlang douwarap thayari Keine Nazirite hoiyerkur. Tanghakpani Keine heisibil hoiyerkur nimakko, O Israellei thimirap?” toubi Umpune shunlei.

¹² “Heiya naneri Nazirite rapyari tul pimong'mlipkur, heitoubi thimkhui rapyari, ‘Pu'tlou shunthutnungei yamakrou,’ toubine shunkhamkur.

¹³ Thilak, hal'kaarine chaput khritni yuknannei louputlhakkur heinakni, nayari Keine nainaiyei mrallei rilla namtakutlhak'rouwa.

¹⁴ Heirouri chankhyang thiminekhi chansochangmakrou, heirou mantrang lhangai thiminikhi aiyei mantrangya kantrumloukur manemakrou. Heirou lhouwa rapnekhi yaitamei rongchanya kallouchangmakrou.

¹⁵ Malaa-taak shin thiminekhi loumayungchangmakrou, heirou chankhyang thiminekhi loutrukchang'makrou, heirou sapuk'tung thimi rapnekhi loukarlhei'changmakrou.

¹⁶ Heitoubi tlaini heirouri lhouwa rapbei hangra khrilkha heiwanikhi aiyei hutsu khingurkhoubi hakthilni loutrukrouwa,” toubi Umpune shunlei.