AMOS 1 - KHYINGEI PU'TLOU Bible (BSI)

¹ Tekoa yultlaira leikhou, yaosil pu rapbei hangrei Amos toubi ung Thimkhui khatni, Judah'yei ramra Uzziah'ne Krung hoiyei kheenrou, heirou Israellei ramrani Joash'yei chanapawa Jeroboam'ne Krung khoine thrungei kheen, linglang khngaakbong kum-khniyei maibongrou, Israel rapbei ngamrou ane atoubi pao shunthutkhou:

² Aiyei shunthutkhouri: “Umpune Zion'rei yaatang'naksine yuk'ungraolei, heirou Jerusalem'rei hou chouni paobine: Yaosil thimi rapbei namh pishaina ramthingkhi kanrel-laasherna bi hoirouwa, heitoubi Carmel lhungdoukhi yentarchirouwa,” toubi yukshunrou.

Israelle Ri'karchunkril Lim Rapya Umpu ei Pichar: SYRIA

³ Umpune Syria'nung asitoubi shunlei: “Damascus'ne khyumbui-phalibui kallengni borh touwurnei ngamrou, Keine aidourei klei tanti heiwari louthutmakrou; ngamri yani hallei cheirung shinbine Gilead'ya cha'umnakni phitmnuiwurkhou.

⁴ Ngam heineri Hazael'yei cheemmai-bommai'yei doura Keine meirul yukmalhetsundarou, heitoubi Ben-hadad Krungkullei raalpal rapya tlungne kaangtlumyerrou.

⁵ Heitoubi Damascus'yei Palshung shumtrum heengya Keine namdeekrou; heitoubi Aven Phaikarra yuldabi klei thimi rapya Keine hatchirouwa; heirou Beth-Edenra pu khoine thrungbi klei heiwayakhi louthutrouwa; heitoubi Syria'rei thimi rapya Kir toubi ung ramra raal manloubi kul chalphoprouwa,” toubi Umpune yunlei.

PHILISTIA

⁶ Umpune Philistianung asitoubi shunlei: “Gaza'ne borh khyumbui-phalibui touwurnei ngamrou, yaidourei klei Keiyei picharei tanti heiri louthutmakrou; ngamri yani Lim nammaya raal manlouheibine, Edomra yorlhaknungei urlouheikur.

⁷ Heineri Keine Gaza'yei raalpal doura mei malhetsundarou, heitoubi Gaza'yei Krungkulri meini kaangtlumyerouwa.

⁸ Heitoubi Ashdod'ra yuldabi klei thimi rapya raalshonra hiyerrouwa; heirou Ashkelon'ra pu khoine thrungbi klei heiwayakhi louthutrouwa, heirou Keihut awari Ekron'yei doura karhane khangbaangrouwa; heitoubi Palestine'yei himalei thimi rapkhi himangchirouwa.”

TYRE

⁹ Umpune Tyre'nung asitoubi shunlei: “Tyrus'ne khyumbui-phalibui kallengni borh touwurnei ngamrou, aidoura klei tanti heiwari Keine louthutmakrou; ngamri yane Limrap namtomya Edom'ra raalman khoine kul chalphopyerna'nungei malhetlhakurla, heirou yani palui'teinao khatnakni ya'kril tlou kantom heiwaya ningthutpimakura.

¹⁰ Heiya Keine Tyrus'yei raalpal doura mei malhetsundarou, heitoubi Krungkul rapya tlungne kaangtumyerbi maangyerouwa.”

EDOM

¹¹ Umpune Edom'ya asitoubi shunlei: “Edom'ne khyumbui-phalibui kallengni borh touwurnei ngamrou, Keine yaidourei klei tanti heiwari louthutmakrou; ngamri ani aiyei teinao Israel rapya kringpikhei koukhatkhi yaomakne raalshon shinbine hulchawurpi; heirou aiyei ukningra karyomni malungkhabithil klei, heirou aiyei malungkhakur heiwari mitramkurkhi naimakne meithlan naksini trim naimaklei.

¹² Heineri Tenan'yei doura Keine mei malhetsundarou, heitoubi Bozrah'yei Krungkullei raalpal heiwaya meini tlungne kaangtaakyerbi maangyerouwa.”

AMMON

¹³ Umpune Ammon'nung asitoubi shunlei: “Ammon'yei chanao rapne khyumbui-phalibui kallengni borh touwurnei ngamrou, yaidourei klei tanti heiwari Keine thikmallengmakrou; ngamri yane yairamya tanglhakyernanungei toubine raal tounarou, Gilead'yei nao-ur napuiya rapya ukra nao kyaoni shaat'hatdurkhou.

¹⁴ Heineri Rabbah'yei raalpal doura Keine mei shupoprouwa, heitoubi meirullei hou heiwari raalbomra raalsobi kardourilnei hounakni, nung-martheele kalhonni dirdir kartleenni katfyoubi Rabbah'yei Krungkulya tlungne kaangtaakbi maangyerrouwa.

¹⁵ Heirouri yaiyei Krung heiwari raal manlourouwa; heirou Krungle aiyei chanao rapya raal manlouheibi kul chalphoprouwa,” toubi Pu Umpune shunlei.