2 TIMOTHY 1 - KHYINGEI PU'TLOU Bible (BSI)

¹ Dunpuei kningne Christa Jesuei Paocha thimi Paul keirouwei, kane Christa Jesu'ra marapbi leinei ngamrou phakur kantompikhou rongchanyei Pao-laaya shunthutpinei tlouya manthunthunglei-

² Keiyei malungshi'kna chanapawa Timothy'nung bethungkniri: Pawa Dunpune heirou kaiyei Pu Christaei kringpikhei, malungshipi heirou kying heiri neidoura leipiniyasu.

Mathangpi Heirou Ukning Thoubaangpi

³ Kheenserou keine shuncha'yei kalnung neiya karyomne ningthutbine, keiyei nutar-patar rapbei watlhou toukhounakne keinekhi watlhou toubi klei Dunpuya neinung'tlim masa-nunghang naimakni mathangbi leilei.

⁴ Neiyei mityui dakur heiya keine ningthutlei, heingammei keine neiya khrangni murilkni, heiyanungri keiyei ukningra nungkngaini thimrouwa.

⁵ Neiyei malungamkna khoine klei uklum heile, neiyei nutar Lois'le heirou neipui Eunice yakhunungei klei uklum heiya keine ningthutlei. Keiyei ningchanarari neinungkhi heinaksi uklum louleirou.

⁶ Ngam heinung'tlim keine neidoura hut khaangbaangpiyei kaalnung Dunpune neinungei piwurkhou hutthul heiya mityermaknanungei neiya ningthutkyer.

⁷ Kouweiyo toulanungri, Dunpune kanungei pikur lhawai heiri kaya chi'kyer lhawai nimak, heiya aiyei lhawai heine kaya mantrangkyer, malungshi'kyer heirou kai'msha-kaitamya ukning manphopkyer.

⁸ Heiyanungri, kaiyei Pu Jesunung'tlim mayungbi tlou yunyeinung nangne rikraimak; heirou Christa'nungtlim kulrilla chalphopbi klei Paul keinung tlimkhi rikraipimak. Heinungchumri, Dunpune neinungei pikur mantrang heine, Lhangaiyei Pao-laa'nungtlim nangne klah-knangya siruk donglak.

⁹ Ane kayari aiyei thimirap hoiyernanungei ungthutpiwurbi kalpiwurla, lhou ari kane lhangaiya touwurnei ngammei nimak, heiya ari aiyei kning heirou aiyei kringpinei ngammeime. Tlaipangpal kanrebongei waiyoubi aiyei kringpikhei heine Christaei ngamne kanungei piwurla;

¹⁰ heiya asinungri kaya Kalpipu Christa Jesuni yongpikur heirouwei aiyei kringpikhei heiya mutpiwurla. Heitoubi ane khiyei mantrangya suidongurla, heirou Lhangai Pao-laayei ngamne klui naimak chaanya mutpiwurla.

¹¹ Dunpune keiyari Lhangaiyei Pao-laaya shunthutpina'nungei Paocha thimi heirou marnopipu khoine khalthutpibi lhou lhakpikur,

¹² heitounei ngamrou keine heinaksi klah-knangya doukura. Heiya keiri rikraikna koukhi mak, ngamri keiyei malungam thimni leilei, kouweiyo toulanungri, keine uklumbi klei Pu heiyari keine kanreni mulei, heirou Tlaini hei hungtlungbongyen Upawane keinungei shilnakur lhourap namyerwa heiya Ane ngaakshilpiroume toubi keine mulei.

¹³ Heineri keine neinung marnopikur chimmei tlourap heirou neiyei mulouheinung shunmatupikur namma heiya chetni rkolphoplak, heitoubi kane Christa Jesu'ra marapbine uklum heirou malungshiyei chaanra klei neinakne nangnekhi hilthungbi leiyalo.

¹⁴ Heirou kaiyei rilla ringbi klei lhawai Khyingei ngamne neinung shilnakur lhangaiyei lhou rapya khoulak.

¹⁵ Phygelus heirou Hermogenes yakhuntakhi kyaoni Asia khokulrei klei thimi rapne keirouwei khreithutkur heiri nangnekhi kmu.

¹⁶ Heiya Onesiphorus'yei bommai'yari Dunpune phor pilaksu, ngamri ane keiya karyomne houlumyerbi klah mathrilkyer. Heirou keiya thir'ruini phonphopbi kulrilla khouwurnei ngamnung'tlim ane kou khatkhi rikraipimak.

¹⁷ Heiya ane Rome'ra wa'tlungkurle tallengni keiya raphamubongyen thiphakur.

¹⁸ Puei Tlaini heirouri Dunpune anungei kringpi phayerniyasu! Heirou ane keiya Ephesus'rakhi kounakbil lhangaini watlhou toupikuro touri nangnekhi kmu.