2 SAMUEL 9 - KHYINGEI PU'TLOU Bible (BSI)

David'ne Mephibosheth'ya Kringpikur

¹ Heirouri David'ne yunbine atoubi kngai, “Saul'yei cheemmai-bommairei yuwa-chawa hukounak khat himaleithung yaoleihuiko? Kounakpi klei yaowanungri, Jonathan'yei runghutnung'tlim keine aya kringpikhei mutpiyeise!”

² Kheen heirouri, Saul'yei cheemra aiyei shok khat, aiyei minri Ziba toubi ung napawa khat louklei, heirou yani aya David'yei pongra yen'unglhakpikur; heirouri Krungne anungei loukngai, “Nangri Ziba toubi ung napawa heiriko?” Heirouri ani mallangbine loukyun, “Moi, neishok Ziba touri keime.”

³ Heirouri Krungne heikngai, “Saul'yei bommaira keine Dunpuei kringpi kheiya mutpi kya thimi hukounak khat himaleithung leileihuiko?” Heitounei Ziba'ne Krungnung loushun, “Jonathan'yei chanapawa napung khat, aiyei ho khintamrek deekwurbi himakne leileihuime.”

⁴ Heisi tounarouri Krungne anungei kngai, “Heiyanungri a heiri koura leileiyo?” Heirouri Ziba'ne Krungnung loushun, “Thilak, a heiri Lo-debar'ra Ammiel'yei chanapawa Machir'yei cheemra kleime.”

⁵ Heirouri Krungne thimi heimalhetbi aya Lo-debar'ra klei Ammielyei chanapawa Machir'yei cheemrouei yenruiyerkur.

⁶ Heirou Saul'yei chanapawa Jonathan'yei chanapawa Mephibosheth'ne David'yei maibongra wachangbi, heitoubi thleira aiyei mai shikhuplhakbine rikrai khrumkur. Heirouri David'ne, “Mephibosheth,” toubine louungkur; heirou anikhi, “Kouweiyo Krung? Neishok kei wachangleime!” toubine loumallangkur.

⁷ Heirou David'ne anungei shun, “Nang koukhi chimak, kouweiyo toulanungri, neipawa Jonathan'nungtlim neiyari keine shuimakne kringpikhei mutpiroume; heitoubi neiyei patar Saul'yei ram nammakhi neinungei mallenglhakpirou; heitoubi nangri angturou waiyoubi keiyei lukturng doura keile kalhonne chaak-ankhi chamairouwame.”

⁸ Heirouri ani hanuikhi kanel'lhakbine khrumchabi kyun, “Neiyei shok kei awaya koukhoi touneiyo, ui khiyakhi phamak keiya nangne heinakei kringpi kheiya mutpikurya?”

⁹ Heirouri Krungne Saul'yei shokpa Ziba'ya ungbine heitoubi anungei shun, “Saul'yei lalthum, cheem-kei nammakhi angtu keine neiyei cheempuwaei yuwa-chawa rapnungei pilhakur awariya.

¹⁰ Heirou nangle, neiyei chanao rapne, heirou neiyei shokrap nammanekhi ram heiwaya Mephibosheth'nungtlim trunthutbine, trunwai namma heiri yenmarpeilhakbi, neiyei cheempuwaei yuwane chamainungei khourou da; heisiya hoiyanungkhi, neiyei cheempuwaei yuwa Mephibosheth'ri keiyei lukturng doura karyomne chamairou da.” Kheen heirouri Ziba'yei chanapawa napung chiple phanga heirou shokrap somnibil leikhou.

¹¹ Heirouri Ziba'ne Krungnung shun, “Keiyei upawa, Krungne neishok keinungei chay pibine shunpikur tlourap namyerwa heiya hilthungni keine lhou khoine tourouwame.” Heisitoubi Mephibosheth'ne Krungei chanapawa khatnakni David'yei lukturng doura chamaibine leikur.

¹² Heirou Mephibosheth'yei chanapawa mandicha, minri Mica toubi ung khat leikhou. Heirou Ziba'yei cheemra leimalkna thimirap namyerwa heiri Mephibosheth'yei shokthil.

¹³ Heisitoubi Mephibosheth'ne Jerusalem'ra leiwurkhou; ngamri ane Krungei lukturng'ra karyomne chamalnabi leikur. A heiwari ho khintamrek deek.