2 SAMUEL 8 - KHYINGEI PU'TLOU Bible (BSI)

David'ne Raal Manekur

¹ Heihillou asinungri asitoubi hungthukkura, touri David'ne Philistia rapya raal maniwurbine heitoubi yaya kulchalbi khoukur; heirou David'ne Philistia rapbei hutrouwei lilkhoi khukarthil Metheg-ammah'khi kulchalbine lukloukur.

² Heihillou David'ne Moab'yakhi raal maniwurbi lukloukur, heitoubi heiyei thimi rapya raal manloubine lingshaang khoine thleira neilhakyerkur; heitoubi ani ruifretni tangmarkhebi, lingshaang siruk'khyumrei siruk'khniyei thimi rapya hatkur, heirou siruk khatyari hatmakne khoukur. Heisi toubine Moabei thimi rapne David'yei shok hoiwurbi, yani anungei ruiput katbi hakur.

³ Heirouri David'ne aiyei ram ri karchunna ramya hanui loulhaknanungei Euphrate kungranung wayei kheenrou, Zobah'yei Krung Rehobei chanapawa Hadadezer'ya hatkur.

⁴ Heirou David'ne airouwei sapuk'tung raalluirap lishing khatle macha'eni, heirou hoei raalluirap lishing somnikhi kulchalbine raal manloukur. Heitoubi David'ne kaari tangna sapuk rapya, kaari machatomei kronungei khaithutkhoubi, sapuk deiri namma hatdurpi.

⁵ Heirou Damascus'rei Aramea touri Syria rapne Zobah'yei Krung Hadadezer'ya raal pangnungei wanarouri, David'ne Aramea touri Syria'yei raallui lishing somnile-khnibil louhatdurpi.

⁶ Heirouri David'ne Damascus'ra Aramea touri Syria rapbei hangra raal ngaknanungei raallui rapya khoulhakkur; heisitoubi Aramea rapri David'yei shok khoine leiwurbi, yani anungei ruiputkhi kat'hakur. Heisitoubi Umpune David'ya aiyei chana bi kantangra kalhonpibi trungpikur.

⁷ Heitoubi David'ne Hadadezer'yei urchakhou sinayei chung rapya markumloubine, heitoubi heirapya Jerusalem'ra yenheibi khoulhakkur.

⁸ Heirou David'ne Krung Hadadezer'yei khukarthilrap Betah'rouwei, heirou Berothai rouweikhi kulshan chungwane yenkhumheikur.

⁹ Heirou asinungri, Hamath'yei Krung Toi'ne, David'ne Hadadezer'yei raalluirap nammaya maniwurlame tounei paoya mayeknarouri;

¹⁰ Toini aiyei chanapawa Joram touri Hadoramya David'nungei hakrao-nungkngaiyei tlou karyemyerbi, aya phor pinanungei heiyilkur. Ngamri David'ne Hadadezer'ya raal kardourilbi manipikur. Kouweiyo toulanungri, Toi'nekhi Hadadezer'ya karyomne raal kardourilkhou. Heirou Joram touri Hadoram'ne aihutra kulshanyei, lapathirrei putchei rapya, heirou sinakhi chungwane manruiheikur.

¹¹ Heirou Krung David'ne kulshan raple sina rapkhi namma Umpunungei makatkur; heirou ani limrap nam'rouwei yenlukheikur putchei rapkhi namma makatdurbi marthingthutkur.

¹² Putcheirap touri kulshan, lapathir, heirou sinarap heiri Aramrei, Moab'rei, Ammon'yei chanao raprei, Philistia raprei, Amalek'rei, heirou Zobah'yei Krung Rehobei chanapawa Hadadezer'yei deek'khromkur putcheithil.

¹³ Heisitoubi David'ne Mittiyei phaikarra Aramea'rap touri Syria'rei Edomia thimi lishing chiple-chot hatbine yenkallengnarou, aiyei thang'allei min chayerkur.

¹⁴ Heisitoubi David'ne Edom'ra raalluirap khoulhakbine leiyerkur; heitoubi Edom'yei ram namma karyouni raalluirap khoulhakwurnei ngamrou, Edomia'rap nammane David'yei shok hoikur. Heisitoubi Umpune David'ne yenchaheina bi kantangrou kalhonpibi trungpikur.

¹⁵ Heisitoubi David'ne Israelrap nammaei doura Pu khoine thrungbine, thimirap nammanungei tharmu chimmei picharya toubine watlhou toupikur.

¹⁶ Heirou Zeruiah'yei chanapawa Joab'ne raallui rapbei doura chaylam upa khat hoikur, heitoubi Ahilud'yei chanapawa Jehoshaphat'ne lailik mayesilbang thimi khat khoine lhou toukur.

¹⁷ Heirou Ahitubei chanapawa Zadok'le, Abiathar'yei chanapawa Ahimelech'ne Suipi purap khoine watlhou toukur; heitoubi Seraiahni Pu'tlou maye'thimi khoine lhou toukur.

¹⁸ Heirou Jehoiada'yei chanapawa Benaiah'ri Cherethia raple Pelethia rapbei doura ruipipu upa khoine lhoutoukur; heitoubi David'yei chanapawa rapne namyerwaei doura watlhou silpipu uparap khoine leikur.