2 SAMUEL 7 - KHYINGEI PU'TLOU Bible (BSI)

David'ne Pucheem Sabaangnanungei Marshikkur

¹ Asinungri asitoubi hungthukkura, Krung heiwane Krungkullei rilla kyingni paalbi leiyura, heirou Umpune ayari ram bi kantangra, heirou yeekna thimirap nam'rouwei lhangai-karbilni ngaaksilpibi khoupiwurla.

² Heirouri Krungne Thimkhuiwa Nathan'ya shun, “Thilak, asinungri keiri Cedar heengni sabaangkur Krungkul rilla kying-nungkngaini thrungbine leiyura, heiya Dunpuei Theengkungri khuiluphi cheemcha rilla khoubine leileihui.”

³ Heirou Nathan'ne Krungnung loumallangbi kyun, “Neiyei solungra ningchakur lhourap namma heiya toulaka, ngamri Umpune neiya kalhonpilei.”

⁴ Heiya heiniyei masahaknung Umpuei tloulhangni Nathan'nung yongbine atoubi loushunkur:

⁵ “Keiyei shikrui David'nung wabine atoubi shunpilaka, ‘Umpune atoubi shunpilei: Nangne Keiyei leinanungei Cheemya sarou dako?’

⁶ Kouweiyo toulanungri, Israellei chanao rapya Keine Egypt'rouwei ruithutloukur tlainirouei waiyoubi, angtu'rampharou Keiri kou Cheemtang khatroukhi leikhoumakhui; heiya Keiri bi'kantangra khuiluphiyei cheemra, heirou Tabernacle Pucheemra yenleiheiwurla.

⁷ Keine Israellei chanao raple bi kantangra yenchaheiyeinung, Keiyei thimi Israel rapya silpi-ruipina'nungei chay piwurkhou Israel rapbei picharpu hukhatnungeikhi, ‘Koutounei nani Keiyei leinanungei cheemya Cedar heengni sabaangmakko’ toubine yunwurkhou leiyurako?”

Dunpune David'kou Mardingkril

⁸ “Ngam heineri, asinungri, nangne Keiyei shikrui David'nung asitoubine shunpilaka, touri Thangwan-Shimleiyei Pu Umpune asitoubine shunlei: ‘Keine neiyari, ramhangrei yaosilbi leinarouwei ungloubine, Keiyei thimi Israel rapbei doura Krung hoinanungei ruithutloukur.

⁹ Heitoubi Keine neiyei chana-hungna bi kantangra kalhonpikur, heitoubi Keine neiyei yeekna thimirap namyerwaya neiyei maibong'rouwei hatdurpila, heitoubi Keine neiyari, tlaipangpallei min chakhou thimi rap'naksine, Keine neiya mincha thimi khat hoiyerrouwa.

¹⁰ Heirou Keiyei thimi Israel rapnungei Keine ram bikhat khalthutpirou, heitoubi bi heitamrou yaya leiyerpirou; heiyanungri yani yairamra leibine, ramdeira hanui kallengni chutchamarou; heirou lhangai thimi rapne tirrei marhotbi lahyerkur heinaksiri hanui kallengni marhotbine lahyerpimarou.

¹¹ Keiyei thimi Israel rapbei doura Pichar pu rapya khalthutbine, heitoubi Keine yaya chay pibi ruiyerkhou heinaksiri touyermarou, heirou Keine neiyari yeekna thimirap nam'rouwei kalpirouwa. Umpune neinungei cheem khat sabaangpirouwa.

¹² Heirouri neiyei roshukni hungluilhakbi, heirou nangne hiyanungri Keine neihilla hungrou kyou neiyei yu-cha raprouwei khatya khalthutbine heitoubi Keine aiyei Krungbomya phunbaangpirou.

¹³ Heirouri ani Keinungei Cheem khat sabaangpirou; heitoubi Keine aiyei Krungkulla kalui naimakne Krungbom phunbaangpirou.

¹⁴ Heirouri Keine aiyei pa hoirou, heitoubi ani Keiyei chanapawa hoirou; heirouri ani klallei lhouya touyei kheenrou, Keine aya thirrei shungkrokni phitkurnaksine tanti piheirou, heirou tlaipangei lim rapya watyilbi aidoura marhotyerheirou.

¹⁵ Heiya nai maibongrei Keine Saul'ya louthutkur heinaksiri Keiyei malungshi-kringpikhei heiri airouwei louthutdurmakrou.

¹⁶ Heirouri neiyei cheemmaile, neiyei Krungbom heiwari Keiyei maibongra kalui naimak-trim naimakne leirouwa; heirou neiyei Krungbom omna heiwakhi kalui naimakne phunbangkhourouwa.’ ”

¹⁷ Heisitoubi paothutpikur tloubom namma heirou kar-anbi muyerpikur namyerwa heiyei hilthungni Nathan'ne David'nung yertlengwa shunpikur.

David'ne Shunchakur

¹⁸ Heirouri Krung David'ne cheemwaira hungchangurbi heitoubi Umpuei maibongra ombine ani shunchakur, “O Pu Dunpu, Nangne keinungei asibil toupikur awaya kei awaya huwo'touneiyo(kounaksi thimi touneiyo)? Keiyei bommairi koukhi nimakme!

¹⁹ Nangne keinungei heisibil toupikuryakhi bangmakne, Nangne hanuikhi Neiyei shikrui keiyei bommai'ya hillei hungrou kyou chaan heinungeikhi shunthutpiwurlame, O Pu Dunpu! Anaksiya tlaipang thimiyei youkna lammitko awaya, O Pu Dunpu!

²⁰ Heirou David keine Neinungei awaya duinara kouya hanui yunchangeirouwo? Kouweiyo toulanungri, Neiyei shikrui keiyari Nangne yertlengwa kmu heiriyame, O Pu Dunpu!

²¹ Neiyei kning hilthungni, heirou Neiyei tloulhang rapya tlungyernanungei, anak tangkur lhou rapya touthutbine Neiyei shikrui keiya muyernanungei toukurame!

²² Heitounei ngammei Neiyei thang'al tangleime, O Pu Dunpu! Kouweiyo toulanungri, Nangnaksiri dei Pu hukhatkhi makme; heirou kaiyei khnara mayekkur hilthungneri Nang nimakne Pu Dunpu deiri hukhatkhi makme.

²³ Heirou tlaipangpalla Neiyei thimi Israellei limnaksi, deilim rapbei hangra changbine Aiyei thimirap hoinanungei kalthutbine, Aiyei Min-thang'alnung'tlim lim khat khoine yanungei sheembangpikur lim deiri hu leileiyo? Heitoubi Neiyei thang'alnung'tlim, heirou, Neiyei thimi rapya Egypt'rouwei, heirou lim dei rapbei maibong'rouwei, heirou yaiyei thrailha rapya khrumnarei kngak khat khoiyei chi'kna shakrung khoine Nangne yaya kalthutpikur heinaksiri dei huinungei touwurkhoulawo?

²⁴ Kouweiyo toulanungri, Nangne Israel rapya kalui naimakne Neiyei thimirap hoinanungei limkhat khoine phunkanthouwurla; heitoubi Nangne yaiyei Dunpu hoiyurame, O Pu Dunpu!

²⁵ Ngam heineri, asinungri O Dunpu, Umpu; Neiyei shikruiyei ngamrou, heirou aiyei cheemmai-bommaiyei ngamrou Neiyei shunthutkur tloulhangrap heiwaya baiyermakne khoupilaklo. Heitoubi Neiyei shunthutkur hilthungni lhou khoine touthutpilaklo!

²⁶ Heiyanungri, ‘Thangwan-Shimleiyei Pu Umpune Israel rapbei Dunpume, heitoubi Neiyei shikrui David'yei cheemkhur-bommai heiwari Neimaibongra phunbaangkur hoilakasu,’ toubi yunbine Neiminya thang'al hoiyerrou.

²⁷ Kouweiyo toulanungri, O Israellei Dunpu, thangwan-Shimleiyei Pu Umpu; Nangne keinungei, ‘Keine neiyei cheemmai-bommai'ya phunkanthoupiroume,’ toubi shunthutbine muyerwurlame; ngam heineri Neiyei shikrui keine Neinungei asitoubi shuncha manikurme.

²⁸ Heine asinungri, O Pu Dunpu, Nangri Dunpume, heirou Neiyei tloulhang rapkhi chimthillangme; heitoubi Nangne lhangaiyei tlou awaya Neiyei shikruinungei kantom'piwurlame.

²⁹ Ngam heineri asinungri, Nangne kringpibi Neiyei shikrui keiyei cheemmai'ya phor pipikur hoiniyasu; heiyanungri Neiyei bomra kalui naimak kmit naimakne pallakasu. Kouweiyo toulanungri, O Pu Dunpu; Nangne shunthutdurkhoula touri, Neiyei phorni Neiyei shikruiyei cheemmaira kalui naimak trim naimakne thrungrouwa.”