2 SAMUEL 6 - KHYINGEI PU'TLOU Bible (BSI)

Mardingpina Theengkungya Jerusalem'ra Yenmallengthu

¹ Asinungri David'ne hanui Israellei raallui rapya khumtilbine, lhouwa napung lishing somthum khalthutdurthu.

² Heitoubi David'ne kanthoubi, akou kalhonkur thimirap nammale touri Baale-Judah'ra wabine, heitoubi bi heirouweine Cherubim tlakra Krungbom omna sheembine minthulkur thangwan-Shimleiyei Pu Umpuei Mardingpina Theengkung heiwaya yenbaangnanungei marshikkur.

³ Heitoubi yani Dunpuei Theengkung heiwaya lhungdou ramrei klei Abinadabei cheem'rouwei hal'kaarira khangbaangbine put sheembi, heitoubi Abinadabei chanaorap Uzzah'le, Ahio yakhu-teinaoya hal'kaari ran heiwayei maibongra lamruibi yenheikur.

⁴ Heisitoubi yane Dunpuei Theengkung heiwaya, lhungdouram yultlairei klei Abinadab aiyei cheem'rouwei yenheikur; heirou Ahio'ne Theengkung heiwayei maibongra louchabine yentlungkur.

⁵ Heirouri David'ne Israel cheemkhurrei thimirap nammale kalhonne Umpuei maibongra yaiyei mantrang namma kyaoni, laa shabine phung'le daar'le, pengkul'le paasi'le, taari'le toutli, tonsi'le sengshek'le, thirkhungtring'le marhukbine hakrao-langthouni nuykur.

⁶ Heiya yani Nacon'yei cha'umna ruitlaira hungtlungei kheen heirouri, Uzzah'ne Dunpuei Theengkung heiwaya aihutne katlambine churphopbi khoukur; kouweiyo toulanungri, halparap heiri tapanwurbi, hal'kaari heiwari holfletdurou beingeiya.

⁷ Heirouri Umpune Uzzah'yei doura meithukni malungkhawurbi, aiyei Umpuya rikrai khrumkna yaomakei lhoutoukur heingammei Dunpune aya umtluiwurbi hatkur, heisitoubi Uzzah heiri Mardingpina Theengkung pongra kanellhakbine hikur.

⁸ Heirouri Umpune Uzzah'ya umhatdurnei ngamrou David'ri kalthi malungkhawura; heitounei bi heiwaya Perez-Uzzah touri Uzzah'ya tanti piwurna bi toubine angtu ramphane munabi leileihui.

⁹ Heisi tounarouri David'ne tlaini heirouri Umpuya kalthi chiwurbi, heirou ani kyun, “Umpuei Theengkungya keinungei urlhakbi koukumma keine watlhou touserouwo?”

¹⁰ Heitounei ngamrou David'ne Umpuei Theengkung heiwaya aiyei Krungkul rilla urlhakbi ale kalhonne khounimakura; heiya David'ne heiwaya Gittia cheemkhurrei Obed-edom'yei cheemra theiwurbine khouyerkur.

¹¹ Heisitoubi Umpuei Theengkung heiwari Gittia cheemkhurrei Obed-edom'yei cheemra tangla tlunkhyumbil khouyerkur; heirouri Umpune Obed-edom'ya, heirou aiyei cheemkhur-bommai namyerwaya phor pikur.

Umpu ei Theengkung Heiwari Jerusalem'ra Yenlhakkur

¹² Asinungri David'nungei pao atoubi shunpiwurla, “Umpuei Theengkung khoulhakwurnei ngamrou Obed-edom'yei heirou aiyei cheemkhur-bommairap namyerwaya Umpune phor piwurlame.” Heirouri David'ne Dunpuei Theengkung heiwaya Obed-edom'yei cheem'rouwei walouheibi, heitoubi David'yei Krungkul rilla hakrao-langthouni yen-urlhakbi khoukur.

¹³ Heisitoubi Umpuei Theengkungya chungbine urloukur thimi rapne hokar thruktamcha heikarchutle, David'ne halpa khatle yaoshun marnam khatkhi malanput khoine makatkur.

¹⁴ Heirouri David'ne aiyei ukning-lhawai namma kyaoni, phaikhring punya upbine Umpuei maibongra nuykur.

¹⁵ Heisitoubi David'le Israellei thimirap nammane hakrao-nungkngaile kalhonne ungraochabi, pengkul houle toubi kalhonne Umpuei Theengkung heiwaya yenheikur.

¹⁶ Heirouri asitoubi thukkura, touri Umpuei Theengkung heiwaya David'yei Krungkul rilla yen'urlhakei kheenrouri, David'yei nu, Saul'yei chanapuiya Michal'ne khamputra louthinarouri, Krung David'ne Umpuei maibongra chunchani nuykurya ani mulhakkur; heirouri aiyei ukningra David'ya kalthi karhalni ningchakur.

¹⁷ Heisitoubi yani Umpuei Theengkung heiwaya yenlhakbine, heitoubi David'ne heiwaya khounanungei toubi sabaangkur khuiluphiyei cheem rilla urlhakbi dunkhoukur; heitoubi David'ne Umpu'nungei meira pumni hongbine malanputle, malung-khrahyerna putrapya makatkur.

¹⁸ Heirou David'ne pumni hongbine malanput makatle, heirou malung damyernei malamput makatya luikurle, thimi rapya ane Thangwan-Shimleiyei Pu Umpuei minra phor pikur.

¹⁹ Heiya duinarakhi ane thimirap nammanungei, heirou Israellei kulyomrap, napawa-napuiya koulhuimakne, mumtol tum khatsolle, kangwoihei pum khatsolle, heirou darkha hei bom khatsolle thimi napung-kantangnung yerpikur. Heihillouri thimi rapne ai'aiyei cheemranung shaalkarkhaikur.

²⁰ Heiya David'ne aiyei cheemmai-bommaiyei thimi rapya phor pinungei yenkallengei kheenrouri, Saul'yei chanapuiya Michal'ne aya murilnanungei louchanrokur, heitoubi ani loushun, “Angturi koutoubi Israellei Krung khatne aiyei shokpuiya rapbei maibongra rikraikhi mumakne, tulmalip thimi rapne lingkhamkhi ningthutmakne rikrai naimakne knuynaksine nuykurya koutouneiyo?”

²¹ Heisi tounarouri David'ne Michal'ya shun, “Keiyei knuy heiwari, neiyei pawaei doura heirou aiyei cheemkhur-bommairap nammaei doura, heirou Umpuei thimi Israel rapbei Krung hoinanungei keiya khalthutbi bom lhakpikur Umpuei maibongra nuykura; ngam heineri keine Umpuei maibongra langthouni mathangrou.

²² Heirou keine ayakhi duine rikraiknayei lhouya touheirouhui, heirou neiyei mithrilnara rikrai piyeirouhui, heiya neiyei kyun shok-napuiya rapneri keiya choune rikrai khrumheirouhui.”

²³ Heirou Saul'yei chanapuiya Michal'ri khiphane chanao pukkhoumakne hikur.