2 SAMUEL 5 - KHYINGEI PU'TLOU Bible (BSI)

David'ne Israelrap Nammaei Doura Krung Hoikur

¹ Heirouri Israel limyei thimirap nammane Hebron'ra David'yei leinara wabi, heitoubi yani wa'kyun, “Thilak, kari neiyei thru, heirou neiyei mitee(neiyei yu-cha) rapme.

² Lamkrini Saul'ne kai doura Krung khoine thrungkhouyei kheenrou, Israel rapya ruithut-ruilhak toupikhouri nanghoume. Heirou Umpune neinungei, ‘Nangne Keiyei thimi Israel rapya silpipu hoipirou, heitoubi nangne Israel rapbei doura Krung khoine thrungeiroume,’ toubine shunpikhou.”

³ Heisitoubi Israel rapbei yama uparap nammane Hebron'ra Krungei leinara wabine, heitoubi Krung David'ne Hebron'ra Umpuei maibongra yakou kalhonne tloubom khat kantombi mardingrilkur; heirouri yani David'ya Krung khat khoine khalbaangbine shirek teipikur.

⁴ David'ne Krung hoiyei kheenrouri ai'mshaei kum somthum tlungura, heirou ani kum somlibil Krung khoine thrungkhou.

⁵ Hebron'ra ani Judah'yei doura kum enile, tangla tlun'thrukbil Krung khoine thrungkhou; heitoubi Jerusalem'ra ani Israelrap nammaei dourale Judah'yei doura kum somthumle-khyumbil thrungkhou.

⁶ Asinungri Krungle, aiyei raallui rapne Jerusalem'ra wabine, ram heirouwei paalbi louklei thimirap Jebusia rapbei doura raal wayounarouri, heirou yani David'ya loushunkur, “Nane kai ram awaei rilla wachangbi raal kyou yamakrou, nimanungri, mitdeo thimirap, heirou hodeek thimi rapneakhi nayari louhulloukur manerou.” Heirou yai khalkurri David'ne yai ramra wachangbi raal kyouri manemakrou toubi manthapimakkur.

⁷ Heisiya hoiyanungkhi, David'neri raalpal choune kuikoolbi louklei Zion touri Jerusalem Khulil heiwaya raal manewurbi lukloukur, heitoubi hillouri David'yei Krungkul khoine sheembaangkur.

⁸ Heitoubi David'ne heiyei tlainirou kyun, “Huhune hodeek heirou mitdeo thimirap touri David'yei yeekna Jebusia rapya raal danungei warou dawanungri, yuisoei tuykungthung wachangbine raal darouda. Heiyanungri ayari yerrouwei raallui upa hoiyerrou.” Heitounei ngamrou yane kyun, “Mitdeo thimi raple, hodeek thimi rapyari Krungkulla changyermakrou.”

⁹ Heisiroubi David'ne raalpal kuikoolna khukarthil rilla paalkur, heitoubi khukarthil heiwaya ‘David'yei Krungkul’ toubine min thulkur. Heisitoubi David'ne raalpal rillouwei touri Millo'rouwei waiyoubine purakhi karhilni raalpal sakhalbine kuikoolkur.

¹⁰ Heirou David'ri nungkhat'nuinuiyei mantrang katduilhakur, ngamri Thangwan-Shimleiyei Pu Umpune aya kalhonpikur.

¹¹ Heirouri Tyre'yei Krung Hiram'ne David'nungei cedar heengkhi heipithungbine, heengchur thimirap, thlungchur thimirap, heirou cheemsa thimi rapkhi heimalhetbi, heitoubi yani David'yei cheem sabaangpikur.

¹² Heirouri Umpune David'ya Israel rapbei doura Krung khat khoine khalbangurbi, Krungbom phunbaangpiwurlame touri ani ningmuwurla; heitoubi Umpune David'yei Krungbom heiwaya Aiyei thimi Israel rapbei doura tangbaang-choubaangyerwurla.

¹³ Heirou David'ne Hebron'rei heihunglhakur hillouri, Jerusalem'ra leiyeinung nu chungwane loulhakbine nukhu-niyal dunkur; heitoubi David'nungei chanapawa rapkhi heirou chanapuiya rapkhi chungwane pukpikur.

¹⁴ Jerusalem'ra leiyei kheenrou anungei pukpiwurkhou chanapawa rapri: Shammu-a, Shobab, Nathan, Solomon;

¹⁵ Ibhar, Elishu-a, Nepheg, Japhia;

¹⁶ Elishama, Eliada, heirou Eliphelet, yarap heiria.

Philistia Raple Raal Kardourilkur

¹⁷ Asinungri David'yari Israel rapbei doura Krung khoine khalbangurlame tounei pao heiwari Philistia rapne mayeklhakwurla; heirouri Philistia rapne kathukbine David'ya raphakur. Heiya David'ne heiyei paoya mayeklhakbi, khukarthillei raalpal khur rilla yuchangbi yulkur.

¹⁸ Kheen heirouri Philistia rapne yaitam yerchekbine Rephaim phaikar karyouni rungbom sheembi raal mrimkur.

¹⁹ Heirouri David'ne Umpunungei tlou loubi ngaithikur, “Philistia rapbei doura keine raal daserouko? Nangne yayari keihutra pilhakrouko?” Heirou Umpune David'nung loushunkur, “Kawalo, heitoubi raal dalaka, kouweiyo toulanungri, Philistia rapyari Keine neihutra pilhakrou.”

²⁰ Heisitoubi David'ne Baal-Perazim'ra kabine raal dabi, bi heitamrou yaya nambaibi raal manikur; heirouri yani kyun, “Yuitangne tonbaikur heinaksine, Umpune keiyei yeekna thimi rapya nambaibi raal maneyerpila.” Heingammei David'ne rambi heiwaya ‘Baal-Perazim’ toubine min thulpikur.

²¹ Heirouri yani bi heitamrou yaiyei thrailha rapya khingurkhoubi trukkur; heisi tounarouri David'le, aiyei raallui rapne thrailha rapya markumloubine shaalkur.

²² Asinungri Philistia rapne hanuikhi kabine Rephaim phaikarra karyouni yerchekbi rungbom sheembi leiwurthuwa.

²³ Heirou David'ne Umpunung tlou loubine ngaithithunarouri, ani loushunkur, “Nangne yaileinara tampokpane kabi raal damakrou da; heiya hil'lhangra kachangbine yaya karhilni kuikoollurbi, heitoubi phaikhlungchak(mulberry) heengyao hangra touri maishuk lhangra raal kardourilak.

²⁴ Heirouri asitoubine hungthukheirou touri phaikhlungchak heengyao hangra raalsonei hounaksi nani loumayekrou, heirouri nane malungkringni, heirou khrangni toubine raal dalaka; kouweiyo toulanungri, Umpune naiyei maibongra wathukbi Philistia'yei raallui rapya ane shaat'hatrou.”

²⁵ Heirouri David'ne Umpune anungei chaytloune shunmatupikur heisibil lhou touwurbi, heitoubi Philistia rapya Geba'rouweine Gezer waphane shaat'hatkur.