2 SAMUEL 4 - KHYINGEI PU'TLOU Bible (BSI)

Ish-bosheth'ya Hatkur

¹ Asinungri Saul'yei chanapawa Ish-bosheth'ne Abner Hebron'ra hiyurame tounei paoya mayekurla, heitounei ngamrou aiyei ukningra malung-thrimmakura; heirouri Israellei thimirap nammakhi ukningra plangurchiya.

² Heirou Saul'yei chanapawa Ish-bosheth'yei raalluira raallui upa napawa napung'khni kyao; raallui upa khatpayei minri Baanah toubine ungkhou, heirou napawa khatpayei minri Rechab toubine ungkhou. Ya napung'khni heiri Benjamin cheemkhurrei Be-erothia napawa Rimmon'yei chanapawathil. (Be-erothia rapkhi Benjamin cheemkhur banrei thimi rapme toubi klou).

³ Ngamri Be-erothia rapne Gittaim'ra heitrukwurbi, heitoubi yani bi heirou angtu rampha ramtaangbi paalkur.

⁴ Asinungri Saul'yei chanapawa, Jonathan'yei chanapawa hodeekcha khat klei. Heirou Jezreel'ra Saul'le, Jonathan yakhu-pacharek hiyurame tounei paoya hungshunpiyei kheen heirouri nao heichari kum phanga tomngeihui. Heirou khipaoya loumayeknarou, naoruiwi heini nao heichaya munne polouheibi truknarouri, lamrakra kanelwurbi seowurnarouri, naoho khintam'rekpa seodeekkur. Naocha heiyei minri Mephibosheth toubine ungkur.

⁵ Heisitoubi Be-erothia Rimmon'yei chanapawa Rechab'le, Baanah yakhu-teinaoni, Ish-bosheth'ne nunghang-tlaikal nungsha kalyei kheenrou daikallimra mathrilbi leiyeikaalnang, aicheemra wachangkur.

⁶ Heirou yasine cheemwaira gehu louthutnungei wachangkur'nakrimne toukarsabi cheemwaira wachangbine, yani Ish-bosheth'ya ipbine louleiyeinang yaipungna onhimra umbine hatdurpi; heitoubi Rechab'le, aiyei naowa Baanah yakhu-teinao munne kartleiwurbi trukyulkur.

⁷ Heisitoubi yani cheemwaira wachangei kheen heirouri, Ish-bosheth heiwari aiyei bomtho rilla ipna khumdoura ipbine louleinarouri, yani aya hatdurpi, heitoubi aiyei lu dintatkur. Heitoubi yani aiyei lukhrong heiwaya shinlouheibi Arabah'yei phaikar kraalni masantan yentrukbi hungkur.

⁸ Heitoubi yani Ish-bosheth'yei lu'khrongya yenheibine Hebron'ra David'nung yenmalanpikur, heitoubi yani Krungnung hungkyun, “Neiya hatnungei hulchakhou, neiyei yeekna thimi Saul'yei chanapawa Ish-bosheth'yei luri areisuei, yukthilak; angturi asitoubi Umpune kaiyei upawa Krungya yeekna thimi Saul'le, aiyei yuwa-chawa rapbei doura khlang lhakwurlame.”

⁹ Heirouri David'ne Be-erothia Rimmon'yei chanapawarap Rechab'le, aiyei naowa Baanah'ya loushunkur, “Keiyei klah-mrim chaan kounakrouwei kalthutpikur Umpune ringleiyenri, Ane mupilaksu;

¹⁰ thimi napung'khatne pao lhangaiya shunpikurnakni ningchabine keinungei, Thilak, Saul'yari keine hatdurlame toubine hungshun; heirouri keine aya pao heiwinung'tlim lhangaiyei klah'manya loupirou marbubine ane ningchakur, heiya keineri aya manbine Ziklag'ra hatdurpi.

¹¹ Heiyanungri tharmu chim thimi khatya aiyei cheemwaira, khumdoura ipbine leiyeinang hatkur khril lhangaimak thimi heiyari kounak thuithine toupirou dawo! Heineri keine neiyari heiyei hee rungkhlang loubine, tlaipangdou arouwei toumaangbom thukmakrouko?”

¹² Heirouri David'ne kartlang douwa rapya chay pikur, heirou yane yakhunta teinaoya hatkur, hutkhi-hokhi dintatdurbi, heitoubi Hebron'yei yuiphum pongra heengdoura mankhaibine khoukur. Heiya yane Ish-Bohseth'yei luya louheibine heitoubi Hebron'ra Abner'yei lhanra phumkur.