2 SAMUEL 3 - KHYINGEI PU'TLOU Bible (BSI)

David'ya Hut Mantrangyerkur

¹ Asinungri David'yei cheemkhur-bommai'le, Saul'yei cheemkhur-bommai'yei tlakra kum tlani raal tourilbi leiwurkhoula. Heiya David'ri hutmantrang thang-thang katduilhakur; heitoubi Saul'yei cheemkhurri thang-thang mantrang yenkanthritkur.

David'yei Chanapawa Deirap Pukkur

² Hebron'ra David'nungei pukpikur chanapawa rapri: Jezreel nyul Ahino-am'ne anungei chanapawa Amnon'ya pukkur;

³ heirou Carmel'rei Nabal'yei trulmeiwi Abigail'ne anungei khintam tlung chanapawa Chileab pukpikur; heitoubi Geshur'yei Krung Talmai'yei chanapuiya Maacah'ne anungei khyumtam tlung chanapawa Absalom'ya pukpikur;

⁴ heirou Haggith'ne anungei phalitam tlung chanapawa Adonijah'ya pukpikur; heitoubi Abital'ne anungei phangatam tlung chanapawa Shephatiah'ya pukpikur;

⁵ heirou David'yei nu Egla'ne anungei thruktam tlung chanapawa Ithre-am'ya pukpikur. Chanapawa ya napungthruk heirapya Hebron'ra leiyei kheenrou David'nungei pukpikur.

Abner'ne David'nung Chanphabi Anungei Yaothungkur

⁶ Heisi toubine Saul'yei cheemkhur-bommai'le, David'yei cheemkhur-bommai khintamni yarilmakne ngalrilyei kheenrouri, Abner'ne Saul'yei thimi rapya raallui upa khat khoine hutmantrangni ruibi leikhou.

⁷ Saul'ne Rizpah toubi ung Aiahyei chanapuiya heiwiya nukhu khoine loukhoubi nukhu-nyal dunkhou; heirou Ish-bosheth'ne Abner'ya, “Koutounei nangne kai pawaei nukhuwi leinara wachangbine rkhum iptilkurro?” toubine shunkur.

⁸ Heirouri Abner'ne Ish-bosheth'yei kyun tlou doura beimakne malungkhakur, heitoubi aya loushun, “Kei awari Judah'yei ui'luko? Angtu rampharou keine neiyei pawa Saul'yei cheemkhur-bommaiya, heirou aiyei palui-teinao rapyakhi rikrai khrumknale kalhonne watlhou toubine leileihui; heitounei ngamrou keine neiyari David'yei hutra pilhakmakne khoupilei; heiya angturi nangne keiyari napuiya heiwiyei ngamrou keidoura sowal khingbaangbi theibaangurlano!

⁹ Heisiyanungri lhangaiya, Dunpune David'nung kantompikur tlou rapya tlungyerpikur manemanungri, Umpune Abner keiyei doura duine klah'knang dayerlaksu!

¹⁰ Heitoubi Saul'yei Krungbomya David'nungei thullhakwurbi, Israelle Judah'yei doura David'yei Krungbom phunkanthoubi thrunglaksu; heirou Dan'rouweine Beer-sheba wa'tlungne ani thrunglaksu!”

¹¹ Heisi tounarouri Ish-bosheth'ne Abner'yei maibongrari koutlou khatkhi mallangbi yunchangmakura; ngamri ani Abner'yari beimakne chikur.

¹² Heirouri Abner'ne David'nung Hebron'ra aiyei rungkhlangra paocha thimirap heimalhetbine wangaikyer, “Ram awari huweiyo? Huni Krung khoine thrungrou youleiyo? Nangle keile yakantlangrilbine kantomkril khoupilaklo; heirou thilak, Israelrap nammaya pulyernanungei keinekhi neiya trungpibi, Israel rapya neidaakra yenlhakyerrouwa,” toubine pao shunyerkur.

¹³ Heirouri David'ne loukyun, “Heiyanungri lhangaiya, keine nangkou yakantlangrilbine tlou kantomrillouwa; heiya keine neinungei bucha'kniri, ‘Nangne keileinara wayeinung Saul'yei chanapuiya Michal'ya lamkrini keinungei heiruiheimanungri, nangle keile murilnung yamakeirou.’ ”

¹⁴ Heisi toubine David'ne thimi rapya malhetbine Saul'yei chanapawa Ish-bosheth'nung atoubi washunkyer, “Philistia napawa rapbei sermur un machakhat pibine ngaimankhou keiyei nu Michal'ya keinungei pilaka.”

¹⁵ Heisi tounarouri Ish-bosheth'ne thimi heimalhetbi, Michal'ya aishal, Laish'yei chanapawa Paltiel'yei hutrouwei waruilouyerkur.

¹⁶ Heiya aiyei shalwane akou kalhonne louchanthungbi, chapthothoni aihilla heichanthungbi Bahurim wa'tlungkur. Heirouri Abner'ne aya, “Kallengbi shallaka,” toubine loushunkur. Heisi tounarouri Paltiel kallengkur.

¹⁷ Asinungri Abner'ne Israellei yama upa raple pao kalleirilbine yakou kartongrilbi atoubi kyun, “Youkur kheenrouwei waiyoubi nane David'ya naiyei Krung hoiyernanungei raphawurkhoula.

¹⁸ Heiyanungri, asinung nane ayari naidoura Krung hoiyerlaka! Kouweiyo toulanungri, Umpune David'yei ngamrou asitoubine yunwurkhoula, ‘Keiyei shikrui David'yei hutra Keine Keiyei thimi Israel rapyari Philistia rapbei hutrouwei, heirou yaya yeekna thimirap nammaei hutrouwei kalthutpirouwa.’ ”

¹⁹ Heirou Abner'ne tlou heiwari Benjamin cheemkhurrei thimi rapbei khnarakhi mayekni yunpikur, heirou heiyakhi duinara Abner'ne Hebron'ra David'yei khnarakhi mayekni Israel rapnungei heirou Benjamin cheemkhur thimirap nammanungeikhi lhangainanungei tlouya washunpikur.

²⁰ Heirouri Abner'ne aiyei raallui napung somnile kalhonne Hebron'ra David'yei leinara wabine murilkur. Heirou David'ne Abner'le akou kalhonbi wakur thimi rapnungei chaak-an marshikbine loupichakur.

²¹ Heirou Abner'ne David'ya shun, “Keiya shalyerpilaklo, heitoubi keine Israelrap nammaya keine keiyei upawa Krung neileinara ungmarkumeise; heitoubi yani nangkou yakantlangrilbi tlou kantomrillaksu; heitoubi nangne yaidoura Krung khoine neiyei kning hilthungni thrungpilaklo.” Heisi tounarouri David'ne Abner'ya malhetdurbi kyingni shaalkur.

²² Heirouri thilak, David'yei shok raallui rapne Joab'le kalhonne raal chanarouwei maniwurbi putchei-lalthumrap chungwane luklouheibine yenkallengbi hungtlungkur; heiya Abner'ri Hebron'ra David'kou kalhonne louleimakkura, ngamri David'ne Abner'ya loumalhetdurbi, kyingni loushallura.

²³ Heirouri Joab'ne aiyei raalluirap nammale kalhonne hungtlungkur heirouri, thimi rapne Joab'nung, “Neryei chanapawa Abner'ne Krungei leinara wakhoubine, heitoubi Krungne Abner'ya malhetdurbi, heirou ani kyingni shaallurame.” toubine pao loushunpikur.

²⁴ Heirouri Joab'ne hungchangbi Krungnung kyun, “Neiyei toukurya kouwo? Abner'ne neileinara wakhoubine, kounungei nangne aya hangwalni loumalhetdurbi shalyerkurro?

²⁵ Neryei chanapawa Abner'ne neileinara wakhoukur heiwari neiya mandalpinungei, heirou neiyei wathuk-hungchangbi lhoutou heiwaya muni thilhaknanungei, heirou neiyei lhouya mulhaknanungei wachangkurme touri nangnekhi loumurou!”

Joab'ne Abner'ya Chanthungbi Hatkur

²⁶ Heitoubi Joab'ne David'yei maibongrouwei wathukwurbi, ani Abner'yei hilla thimi heimalhetkur, heitoubi yani Abner'ya wa'ungthungbine Sirah yuiso'rouwei hanui yenruimallengthu, heiya David'neri heiyei lhouri muthungmakura.

²⁷ Heisi toubi Abner'ne Hebron'ra heikallengbi bi heirou wa'tlungkurle tallengni Joab'ne aya loukui'rkolloubi, munne tlou kallangrillou nakrimne, palshung shumtrum pura louruithutloukur, heitoubi bi heitamrou aiyei ukra shonlu'msuini thunkalleibi, aiyei naowa Asahel'ya hatdurnei khlanglhak khoine hatdurpi.

²⁸ Heihillouri David'ne pao heiwaya mayekurla; heirou ani kyun, “Keile keiyei Krungbomri Ner'yei chanapawa Abner'ya hatnara koukhatkhi muphamak.

²⁹ Heiyei mralri Joab'le aiyei cheemkhur-bommaiyei doura dalaksu; heitoubi aiyei cheemkhurra chaan khatrekei khoine- hee karsoya hoiyasu, nimanung raichi-paatya hoiyasu, nimanung cheishuni mardouchabi karwaichaya hoiyasu, nimanung raalshonra hikurya hoiyasu, nimanung chaamu-maimumakya hoiyasu, heisi thukkaryomkur hoiniyasu.”

³⁰ Heisitoubi Joab'le aiyei naowa Abishai yakhuntani yaiyei naowa Asahel'ya Gibeon'yei raalbomra hatdurnei ngamrou Abner'ya khlang lhakbine hatkur.

David'ne Abnernung'tlim Khi-kanrelkur

³¹ Heirouri David'ne Joab'le, akou kalhonbi klei thimirap nammanung shunkur, “Naiyei shamb rapya threlwurbi, puntumya upbine, Abner'nung'tlim khi-kanrellaklo.” Heisitoubi Krung David'ne khi'lhung urna hilla heichanthungkur.

³² Heisitoubi yani Abner'ya Hebron'ra khi ruikur; heirouri Krungne Abner'yei lhandoura mayungbi, heitoubi aiyei hou choune ungraobi chapkur; heirouri thimirap nammanekhi chapkur.

³³ Heirou Krungne Abner'ya kanrelnei laa shabine kyun: “Abner'ne yuntlungmak thimiyei khi'naksine hibom thukrouko?

³⁴ Neiyei hutkhi phonphopmakne, neiyei ho rapkhi thir'ruini msuiphopmakne; Yeekna thimi rapbei hutra dakur naksine, nangri dalhakura.” Heisitoubi thimirap nammane hanuikhi anung'tlim chapkur.

³⁵ Heirouri thimirap nammane David'nung wachangbine, Kinni yongchipbongyen David'ya chaak-an chamainanungei toubi malhimkur, heiya David'ne kantombine atoubi loukyun, “Kounakpi Kinni yongchipbongnung chaak-an, nimanung kounak khatya chamailanungri, Dunpune keidoura tanti pibine awayakhi duine klah dayerwurlaksu.”

³⁶ Asinungri thimirap nammane tlou heiwaya ningmuwurbi ukningra khoulhakurla, heirouri Krungne thimirap namyerya malungpilkur heinaksine, yanekhi Krungya malung khrahwura.

³⁷ Heisi toubine heiyei tlainirou thimirap nammane ningmuwurbi, “Krungneri Neryei chanapawa Abner'yari hiyernimakme,” toubi phab dawura.

³⁸ Heirouri Krungne aiyei shok rapnung shunkur, “Angtu tlainirou Israellei Krungcha khat heirou tangthimi lhouwa khat hiyurame touri nane mumakko?

³⁹ Heirou angturi keiyari Krung khat khoine khalbaangbinekhi, keiri mantrang kanthritdurame, heirou Zeruiah'yei chanao rapri keinungeiri beimakne thuithiyura, Heineri khril lhangaimak thimi rapyari ai'aiyei lhoutoukur hilthungni Umpune tanti pibine khlang lhaklaksu.”