2 SAMUEL 24 - KHYINGEI PU'TLOU Bible (BSI)

David'ne Raallui Rapya Mshing Kansherkur

¹ Heirouri hanuikhi Umpune Israel rapbei doura meithukni malungkhawurthu; heitounei ngamrou ani David'ya toufyoubine, “Chabine, Israel raple, Judah'yei thimi mshing kansherlaka,” toubine shunpikur.

² Heisi tounarouri Krung David'ne akou kalhonbi klei Joab'le raallui upa rapya shun, “Asinunghak chabine, Israel lim rapbei thimirap nammaya, Danrouwei waiyoubine Beer-sheba waphane thimi mshing kansherbine mayebaanglaka; heiyanungri thimi mshing heiri kounak chungo touri keine mumanerou.”

³ Heiya Joab'ne krungnung mallangbine loukyun, “Keiyei krungni ringei kalnang mubi klei thimi mshing heiwarouwei neiyei Dunpune siruk-macha duinekhi duibangyerlaksu; heiya kouya tounanungei keiyei krungwane heiwirou heinakne ukrei tlou khoine loukurrawo?”

⁴ Heiya krungei chay pikur heiwane Joable raallui uparap deiyakhi manikur. Heitounei ngamrou, Joab'le, raallui upa rapne Krungei maibongrouwei wathukwurbi, Israel rapbei thimi mshing kansherbi mayebangnanungei chakur.

⁵ Heirou yani Jordan kung heiralthutdurbi, heitoubi Aroer'rouweine khukarthil heirouwei khate lhangra thimi mshing kansheryoukur; heitoubi Gad'yei phaikar yukna lailamrakhi, heirou Jazer yuphane kansherkur.

⁶ Heithangrouri yani Gilead'ra wabine, heirou Hittia rapbei ram Kadesh'rakhi, heirou Dan'rale, heirou Sidon karhilni klei ramrakhi mshing kansherkur.

⁷ Heitoubi yani raalpalni kuikoolbi klei Tyre khukarthille, heirou Hivia rapbei khukarthilrap namyerrakhi, heirou Canaania rapbei ramrakhi thimi mshing kansherkur; heitoubi yani Judah'yei khate lhangra, Beer-sheba'rakhi yubine thimi mshing kansherkur.

⁸ Heisitoubi yani tangla tluntakole, tlaini somnibil ram namma karyouni yenchakhoubi Jerusalem'ra yenkallengkur.

⁹ Heirou Joab'ne thimi mshing kansherthiwurnei mayethutkur heiwaya Krungnung hungmalanpikur. Heineri kheen heirouri Israel rapbei hangra raalshon shinmani napawa nammari lishing macha'chotbil tlung; heirou Judah'rari napawa lishing macha phangabil tlungne louklei kanshermukur.

¹⁰ Heirou asinungri David'ne thimi mshing kansherbi thikur hillouri aiyei ukningra malungthrammakura. Heingamei ane Umpunung shunchakur, “O Umpu, kringpibi Neishok keiya kukpilaklo; kouweiyo toulanungri, keiyei lhou tounara beimak tangwane lalwurame. Ngamri keine yuntlungmakei lhouya touwurlame.”

¹¹ Heirou David'ne ningshun kanthouyei kheenrou, Umpune David'yei Pu'tlou shunthutpi pu Thimkhuiwa Gad'nungei Aiyei tloulhang rapya shunpikur.

¹² Umpune Gad'nung shun, “Wabine David'ya atoubi shunpilak, ‘Umpune asitoubi shunlei: Keine neinungei tloubom khyumtam malanthutlei; heirapbei tlakrei neinungei khoine khatya khalthutlak, heiyei doura keine neinungei lhou toupirou.’ ”

¹³ Heisi tounarouri Gadni David'nung wabine shunpikur; heirou ani atoubi kyun, “Neiyei Krung ramra kum'khyum butam thukyerserouko? Nimanungri nangne tlaini khyumni neiyei yeekna thimi rapbei maibongra loutrukcharouko? Nimanungri, neiyei ramra tlaini khyumni pharthraini chansher dayerserouko? Asinungri nangne tirithilaka, heitoubi keine kallengbi keiya heimalhetpi Punungei kouya hungshunpiserou?”

¹⁴ Heirouri David'ne Gad'ya loushun, “Keiri beimak lhawai lahwura. Kayari Umpune tanti pilaksu, ngamri beimakne kringpikhei heiya tlaipang thimi rapne keiyei tanti pimakniyasu.”

Pharthraine Chansher Dakur

¹⁵ Heisitoubi Umpune heiyei tlaini ningshunrou waiyoubine kartinkur trumbil Israel rapbei doura pharthrai yenmalhetdurbi chansher dayerkur; heisi tounarouri Dan'rouweine Beer-sheba'ra klei thimi lishing somret chansherne hikur.

¹⁶ Heirouri Thangringne Jerusalemei doura maangyernanungei aihut mlambine leiyei kheenrouri, thuithine chansher thukkur heinung'tlim Umpune malungthrammakurbi, ani deekbai thukyerbi klei Thangring heinungei heishun, “Awari rowarou, donglaka! Neihut laksundawurlaka!” Kheen heirouri Thangring heiri Jebusia Araunah'yei phailou ruitlai pongra louklei.

¹⁷ Heirouri Thangringne chansher knani thimi rapya hiyerbi klei heiwaya David'ne mulhakkur heirouri ani Umpunung shun, “Thilak, borh lhou toukurri keihoume, heirou klalyei lhou toukur thimiri keihoume; heiya yaorap heini kou touwurlawo? Kringpibi Neiyei hut heiri keidoura heirou keiyei pawaei cheemmai'yei doura karhane leiyerlaklo.”

David'ne Khrahpal Khat Sabaangkur

¹⁸ Heirouri heiyei tlainirou Gad'ne David'nung wabine atoubi washun, “Kanthoulaklo, heitoubi Jebusia Araunahyei phailou ruitlai pongra Umpunungei khrahpal khat sabaanglaklo.”

¹⁹ Heisi tounarouri, David'ne loukanthoubi, Umpune anungei chay pikur hilthungni, Gad'yei tlouya chanthungbine kakur.

²⁰ Heirou Araunahne wathukbi yukthrilnarouri, Krungle, aiyei shok rapne aiyei leinaranung kakur heiwaya ani loumulhakkur; heirouri Araunah'ne louchanrobine, heitoubi krungei maibongra aiyei mai thleira sikhuplhakbine loukhrumkur.

²¹ Heitoubi Araunah'ne kyun, “Kounungei keiyei krungwane neishok keiyei leina biranung wakurrawo?” Heirou David'ne loukyun, “Umpunungei khrahpal khat sabaangnanungei, neiyei ruitlai heiwaya lorou tounei wakurrame; heiyanungri, thimi raprouwei chansher dakur heiwaya louthutdurpirou.”

²² Heirou Araunah'ne David'nung loukyun, “Keiyei upawa krungni heiwaya loubine, heitoubi Aiyei mithrilnara lhangairoume tou heiwaya heisi makatlakalo. Thilak, malanthut put khoine makatnungei halpa rapkhi leiyura; heitoubi heiya hongnanungei ruitlai markamna heengpeek rapkhi heirou halpa rapbei putpu rapkhi leiyurame.

²³ O Krung, putlamrap namma heiri Araunah keine neinungei pithutkur ariyame.” Heirou Araunah'ne Krungnung asitoubikhi yunthu, “Neiyei Dunpu, Umpune neiya loulhakpilaksu!”

²⁴ Heisiya hoiyanungkhi, krungni Araunah'nung loushun, “Heisi nimakme, heirapya keine neinungei man pibine loroume; kouweiyo toulanungri, keiyei Umpunungei koukhi man naimak malanthut put rapya keine makatmakrou.” Heisitoubi David'ne ruitlai heiwale, halpa rapya kulshan tuy shekel somnga pibine loloukur.

²⁵ Heitoubi David'ne bi heitamrou Umpunungei khrahpal khat sabaangkur; heitoubi heiyei doura meira pumni hongbine malamthut putle, malungdamna khrumna putya makatkur. Heisitoubi Umpune ram heiwaya kringpiwurbi, Israel'rouwei chansher louthutpikur.