2 SAMUEL 23 - KHYINGEI PU'TLOU Bible (BSI)

David'ne Luilhaknara Yunkhou Tlourap

¹ David'ne luilhaknara yunkhou tloulhang rapri asitoubi klei: Jesse'yei chanapawa David'ne atoubi paothutlei: Yerrou Choudui Pu Dunpuei mathumbangpikur thimine atoubi kanyerkhoulei; Jacobei Dunpune shirek teipiwurkhou, Israellei Laarungei laa rapri asitoubi leilei.

² “Umpuei Lhawaine keiya yunthutkyer; heirou Aiyei tloulhangrap heiri keiyei maleidoura leilei.

³ Israel rapbei Dunpune shunpilei, heirou Israel rapbei Thlungtangne keinungei shunpilei; Dunpuya chi-rikraile kalhonne, thimi rapbei doura tharmu chini thrungpikur Krung heirime.

⁴ Ane yaidoura ningshun Kinni kathuktirrei kat'alkur kwar'naksine alpilei; heirou ningshun rameini loumallemak nungsha'naksilei. Heirou nungham hillei Kinni alna tlaira, thleirei tingtou mar'emni katmanbokur heinaksilei.

⁵ Tanghakpane keiyei cheemya Dunpune ophobpikhou nimaka? Ngamri, Ane keinungei klui naimakei tloubomya mardingkhoupi. Heitounei ngamrou, keiyei madukhou namyerwaya waiknaini leiyerbi koukhatkhi shuikngam thukyerpimakne ani tangbaang-choubaangyerkur nimakka?

⁶ Heiya Dunpu yaomak thimi rapyari koukhi karsukmak thru'naksine khingurheirou; ngamri yayari hutne pal yamak.

⁷ Heiya huhuni thruiya pallou dawanungri, hutra thir'hutsuwei kangkui shinbine, nimanung cheitaang shinbine kutmarkumrou da; heitoubi ya'rapya bi khatra baimarkumrou da, heitoubi meiwaira khinglhakbine yertlengwa hongmathairou da.”

David'yei Hutmantrang Raalluirap

⁸ David'yei hutmantrang raallui lhouwa rapbei minri: Tahchemonia cheemkhurrei Josheb-Basshebeth(ayari, 'Ishbosheth' toubikhi mu'kna), ari raallui pu napung-khyummei doura lu khoi; (ayari Eznia'yei Adoni toubikhi mu'kna); ngamri ani raalbomra hanuitomrou aiyei raalcheine raallui yeekna macha'chot thunhatkur lhouwa khat.

⁹ Heitoubi aiyei thangrari Ahohia cheemkhurrei Dodo'yei chanapawa Eleazar'ne raallui lhouwa khoine klei. A heiwakhi, Israel rapne Philistia raple raal kardourilyeinung, Israel rapne raal bom'rouwei hil karshonkur kheenrou, Davidle kalhonne raal heikardourilthung lhouwa napung-khyumei hangrei lhouwa khat.

¹⁰ Ane chunkanthoubi, hutbangne mashewurbi raalshonra aihut marebpapkur ramphane Philistia rapya raal kardourilbi shaat'hatrilkur; heisitoubi heiyei tlainirou Umpune tangne raal maniyerkur; heitoubi raallui rapne Eleazar'yei hilla heikallenglhakthu; heiya khi'lhungya khulmathairou heichanthungnei tlou tomngei.

¹¹ Heirou aiyei thangrouri Hararia cheemkhurrei Agee'yei chanapawa Shammah'ne lhouwa khoi. Heirou Philistia rapne raal danungei be bilthimne tuklhakbi klei belou khatra kartilbi rungbom sheembine leiyei kheenrou, Israel rapne heiwaya mulhakwurbi chiwurbine trukwurchiya.

¹² Heiya Shammah'ne phailou tlaitamhakra chunlhakbine, aitamtom shatrilbine raal soukur; heitoubi Philistia rapya shaat'hatkur. Heisitoubi heiniroukhi Umpune tangne raal maniyerkur.

¹³ Heirouri trun luklumei kheenrou Philistia rapbei raallui rapne Rephaimei phaikarra rungbom sheembine leiyei kheenrou, raallui upa napung somthumei tlakrei ya napung-khyumni yuchumbine, Adullam thlungpur rilla David'yei leinara yuchangbi murilkur.

¹⁴ Kheen heirouri mantrangkur raalpal rilla leiyeinung, Philistia'yei raallui rapne Bethlehemei palshung pongra rungbom sheembine raal marshikbi leikur.

¹⁵ Heirouri David'ne aiyei ukningra maduni kyun, “Oh, raallui hukounak khatne Bethlehem palshung pongrei klei yuiphumrei yui yushukloubine keinungei pimonglanungri keiyei malung khrahnarou!”

¹⁶ Heisi tounarouri raallui lhouwarap napung-khyumni Philistia rapbei tlakra rungbom lhangra tonlhakbine wachangkur; heitoubi Bethlehemei palshung pongrei klei yuiphum heirouwei yuiding thacha washukloukur; heitoubi yuiding heiwaya yani David'nung yenmalanpikur; heiya David'ne yui heiwari mongmakkur, heiya ani yuiding heiwaya Umpunungei yuikhying khoine bunsundabine mathangkur.

¹⁷ Heitoubi ani kyun, “Awari keine mongchangmakrou, O Umpu; awaya keine monglanungri, yaiyei lhawaiya hutmaira lhakbine yui washukthutkur thimi rapbei heeya mongkurnaksi hoirou!” Heitounei ngamrou ani yuiding heiwaya mongmakur. Asitoubi lhouwa napung-khyumni heisibil lhou touwurkhou.

¹⁸ Heirou Zeruiah'yei chanapawa, Joabei naowa Abishai'ne raallui uparap napung somthumei chaylampu hoikur. Heirou ane aiyei raalcheini Philistia raallui rapya napung macha-khyumya thunhatkur; heisitoubi akhi lhouwa napung-khyumyei tlakrei lhouwa khat hoikur.

¹⁹ Ayari raallui uparap napung-somthumyakhi duine rikrai khrumpikur; heitounei ngammei a heiwari yaiyei doura raallui upa khat hoikur; heisiya hoiyanungkhi, ani ya lhouwa napung-khyumyari traiduikhoumak.

²⁰ Heirouri Kabzeel'rei sireikhei raallui Jehoiada'yei chanapawa Benaiah'nekhi, Moab'rei Arel'yei chanapawa napung'khniya hatdurbi lhouwa thukei kallou lhoutang touwurkhou. anikhi thurdaei tlainirou thlungkhura yuchangbine heitoubi yangkong umhatkur.

²¹ Heirou ani Egypt'rei sharung lhangai, tang-lamchou napawa lhouwa khatyakhi hatdurpi. Kheen heirouri Egypt'rei lhouwa heiwane aihutra raal cheipak khat shinbine louklei, heiya Benaiahni aihutra shungkrok khat shinbine, heitoubi aiyei maibongra trailhakbine Egypt'rei lhouwa heiwayei hutrei raal cheipakya lungloukur, heitoubi aya ai'mshaei raalcheipaakni thunhatkur.

²² Heisitoubi Jehoiada'yei chanapawa Benaiahni heinaksi lhou rapya touthutdurkhou; heitoubi raallui napung somthum naksine lhouwa khat khoine min chakur.

²³ Ayakhi lhouwa napung somthumei hangra rikrai khrumpikur, heiya lhouwa napung-khyumyari ani duikhouchangmak. Heitoubi ayari David'ne Krungsilpi raallui rapbei doura pu hoiyerkur.

²⁴ Heirou Joabei teinaowa Asahel'khi raallui upa napung somthumei hangra kyao. Heirou Bethlehemrei Dodo'yei chanapawa Elhanan'khi;

²⁵ Harodirei Shammah'khi, heirou Harodi'rei Elika'khi;

²⁶ Palti'rei Helez'khi, Tekoa'rei Ikkesh'yei chanapawa Ira'khi;

²⁷ Anathoth'rei Abi-ezer, heirou Hushathi'rei Mebunnai'khi;

²⁸ Ahohia Zalmon, heirou Netophathi'rei Maharai'khi;

²⁹ Netophathi'rei Baanah'yei chanapawa Heleb'khi kyao; Gibe-ah'rei Benjamin cheemkhurrei Ribai'yei chanapawa Ittai'khi;

³⁰ Pirathon'rei Benaiah, Gaash kungban pongrei Hiddai;

³¹ Arbathi'rei Abi-albon, Bahurimrei Azmaveth;

³² Sha-albon'rei Eliahba, heirou Jashen'yei chanapawa rapkhi, Jonathan;

³³ Harari'rei Shammah, Harari'rei Sharar'yei chanapawa Ahiam;

³⁴ Maacah'rei Ahasbai'yei chanapawa Eliphelet, Gilo'rei Ahithophel'yei chanapawa Eliam;

³⁵ Carmel'rei Hezro, Arbia'rei Paarai;

³⁶ Zobah'rei Nathan'yei chanapawa Igal; Gad'rei Bani;

³⁷ Ammonia'rei Zelek, Beruiahyei chanapawa Joabei raal-shamb putruiwa; Be-erothia'rei Naharaj;

³⁸ Ithria'rei Ira, Ithria'rei Gareb;

³⁹ Hittia'rei Uriah; yarap napung somthumle'eni tlunglei.