2 SAMUEL 22 - KHYINGEI PU'TLOU Bible (BSI)

David'ne Raal Maneyeinung Kanyerkhou Laa

¹ Heirouri David'ne Umpuei maibongra tloulhangrap heiya yunbine, Umpune aya yeekna thimirap namyei hutrouwei, heirou Saul'yei hutrouwei kalthupikur kheenrou asitoubi laa shabine kanyerkhou:

² Ane kyun, “Umpuri keiya lousoupi Thlungtang, keiyei raalpal, heirou keiya Lhukthutpi Pume.

³ Keiyei Dunpu, keiyei Thlungtang; Aiyei kallera keine kallimrou; Ari keiyei chung, heirou keiya shu'khralpina halchee; keiyei kallenabi mantrangkur Raalpal; heirou keiya Kalpipu; Nangne keiya klah'knangrei kalpileime.

⁴ Mathangbom thuk Umpuya keine ungleime; heitoubi keiyari yeekna thimi rapbei hutrouwei kalthutpiwurla.

⁵ Kouweiyo toulanungri, khiyei lhimni keiya kuikoolwurkhou; heirou khiyei kungni keiya koolphopburkhou.

⁶ Sheolyei ruifretni keiya phonphopburkhou; heirou khiyei changni keimaibongra loumankankhou.

⁷ Heiya heinaksi klahyei bom'rouwei keine Umpuya ungphakur; keiyei Dunpuya keine ungkur; Umpune Aiyei Pucheem'rouwei keihouya loumayekpikur; heirou keihouya Aiyei khnara ka'tlungkur.

⁸ Heirouri tlaipangpalla linglang khngaakbi kartlinkur. Heirou nungthou-thangwankhi kanthingkur; ngamri Umpuri malungkhawura.

⁹ Aiyei napurra meikhu heithothutlei; heirou Aiyei takarei meithlan heithothutlei; heitoubi Aiyei maibongra meihal'khring wathuklei.

¹⁰ Ane Thangwan ramya nambaibi yongchumkur; Aiyei hodaakra kmehyei ramei dangle kalhonbi yongchumkur.

¹¹ Ane Cherubimei doura tungbine yentrailei; heitoubi Ane martheeya sha khoine traichalei.

¹² Heirou nungthourei yui'rameine Aya karhilni kuikoolyerbi, heitoubi Aya loumallena bi hoiyerlei.

¹³ Ai'maibongrei alkur kwaar heiwane meihal chokyerbi liptlai alnakne althutyerlei.

¹⁴ Umpune Thangwanrei Marwan yukrangyerlei; heirou Yerrouwei Choudui Umpune yuk'ungraolei.

¹⁵ Heirou ani malaa kaapbine, heitoubi yeekna thimi rapya hulchekkurbi, heitoubi Marwan-liptlai alyerbine yaya tamungyerwurla.

¹⁶ Heirouri Umpune yeekna thimi rapya samlhakkur kheenrouri, heirou Aiyei malungkha heiwane nil khoine sothutyei kheenrouri, tuymakrei yuilhouni katfyoukur, heirou tlaipangpallei thleimai kattaarwurlei.

¹⁷ Ane chounarei Aihut yuklamsundapi, heitoubi keiya tangthutpikur; heitoubi Ane keiyari yuinali yuknarei taangthutpikur.

¹⁸ Keiyari Ane keiyei mantrangkur yeekna thimi raprei kalthutpikur; heirou keiya machinkna thimi raprouwei kalthutpikur, ngamri yarap heiri keinungei mantrangachak.

¹⁹ Keine klah dayei kheenrou yani keidoura raal dakur; heiya Umpune keiya trungpikur.

²⁰ Ane keiyari shuikngam makna bira urthutloupi; heirou Ane keinungei malungamkna khoupinei ngamrou, Ane keiya kalpikur.

²¹ Keine tharmu chimmei lhouya touwurnei hilthungni, Umpune keiya klahman pikhou; heirou keiyei hutne marmokmaknei ngamrou, Ane keinungei klahman mallenglhakpikur.

²² Kouweiyo toulanungri, Umpuei chaytlouya keine ngaakbi chakhou; heirou keine keiyei Dunpuya karhane khril lhangaimak lhouya toukhoumak.

²³ Ngamri Aiyei Pu-watlhouwei lammitrap heiri keimaibongra khoulei; heirou keine Aiyei youkna kulyom lammit raprouwei chutkhoumaklei.

²⁴ Keine Aiyei maibongra koukhi mral leikhoumak; heirou keine klal lhou tounarei kantlatdurkhou.

²⁵ Ngam heine keine tharmu chimne lhou toukhounei, heirou keine Aiyei mithrilnara marmokmaknei ngamrou, Umpune keiyari klah'man mallengpikur.

²⁶ Heisitoubi malungamkna thimi rapnungei Neiyei malungamknaya mutpilei; heirou marmokmak thimi rapnungei Neiyei khying heiwaya mutpilei.

²⁷ Khying thimi rapnungei Neiyei khyingya mutpilei; heiya khril lhangaimak thimi rapnungeiri Neiyei thuithikur heiwaya mutpilei.

²⁸ Heirou ukning khnim thimi rapya Nangne kalthutpilei; heiya horthitang thimi rapyari Nangne namsundawurlei.

²⁹ Kouweiyo toulanungri, O Umpu, Nangri keiyei meisharme; Nangne keiyei kmehya waaryerpilei.

³⁰ Ngamri Neiyei trungpiwurnei ngammei yeekna raallui rapya keine namsundakur maneme; heirou Dunpune trungpinei ngamrou raalpalya chunralkur maneme.

³¹ Dunpuei lamtlunri-Anungei koukhatkhi marmoktou makne rongtlung; heirou Umpuei kantompikur tloulhangrap heiri shuikurtoukhi maklei; heitoubi Ari Anungei kallecha thimirap nammanungei lousoupina chung hoilei.

³² Umpu nimakne Pu deiri hu leilei? Heirou Dunpu nimakne Thlungtang hu leilei?

³³ Dunpuri keiyei mantrangkur raalpalme; heirou ani keiyei lamtlunya touyengpilei.

³⁴ Heirou Ane keiyei hoya rchao ho'nakni hoiyerpilei; heitoubi keiya chounara shuikngam yaomakne urbaangpilei.

³⁵ Ane keihutya raalnung sireikhei marnopilei; heitounei ngamrou keihutne kulshan thirtaakya kuimanelei.

³⁶ Nangne keinungei lousouna chungkhi silnapilei, heitoubi Neiyei kringpi kheiyei trungpikur heiwane keiya mathumbaangpilei.

³⁷ Nangne keiyei ho trumna biya maryayerpilei; heitounei ngammei keiyei ho trumnara tatkartleikur maklei.

³⁸ Keiyei yeekna thimi rapya keine hulthungbi heitoubi yaya toumangurlei. Heirou yaya tlumne hatbongyenri keine hil kallengkhoumak.

³⁹ Heitoubi keine yaya tumni shaat'hatdurbi toumaangkur, heitounei ngamrou yane hanui kanthouchang'maklei; heitoubi yane keiho daakra kanelhakkur.

⁴⁰ Ngamri Nangne keiya raalnung'tlim marshikyerkur; heitoubi keiya karhane raal kyou thimi rapyari Nangne keidaakra namsundawurpi.

⁴¹ Nangne keiya yeekna thimi rapya keirouwei mai khreithutyerrubi trukyerrula; heitoubi keiya machinpi yeekna thimi rapya keine hatdurla.

⁴² Yaya trungpina'nungei yani thimi thiphakur, heiya hukhatnekhi yayari kalpirou maklei; Umpuyakhi yane ungphakur, heiya Aneri yaihouya ninglhakpimakur.

⁴³ Yayari keine lamtlairei rahui'naksine honfletchawurpi, heirou keine yayari khullamrei thleibul tatmanuikur heinaksine tatmanuipikur.

⁴⁴ Keiyei thimi rapne keidoura raal dabine noryei kheenroukhi Nangne keiya kalpikur. Keiyari lim rapbei doura Pu khoine khoupiwurla; heirou keine tekkhi shak mukhoumak thimi rapnekhi keinungei watlhou touyerpilei.

⁴⁵ Miram-mithril rapnekhi keinungei wachangbine rochakur, heitoubi yani keiyei kyun houya mayekle tallengne keishunya louchanthunglei.

⁴⁶ Miram-mithril rapne chitekwurbi, yaiyei yulbi leinabi raalpal rillouwei kanchunbi wathuklei.

⁴⁷ Umpuri riengbi klei Puhoume! Keiya Kalpipu Thlunglil heiwari likarsui lhangai hoiniyasu! Heirou keiya Kalpipu Dunpuya choune mathanglaksu!

⁴⁸ Umpune keinung'tlim khlang lhakpilei; heitoubi yeekna thimi rapya keidaakra taangsundapiwurlei.

⁴⁹ Ane keiyari yeekna thimi rapbei hutrouweikhi lhukthutpilei; heirou ane keiyari keidoura karhane raal kyou thimi rapbei dourakhi khangbaangpilei; heitoubi keiya thuithikur thimi rap'rouweikhi kalthutpilei.

⁵⁰ Ngam heineri, O Umpu, keine Neiya lim rapbei hangra mathangpirou, heitoubi Neiminya keine choune laa shabine kanyerpirou!

⁵¹ Umpuri Aiyei Krungya kalthutpi Puhoume. Heitoubi Aiyei shirek teipikur Krungya kringpikhei mutpikur Pume! Awari David'nungei, heirou aiyei yu-charap nammanungei klui naimakne hoilakasu.”