2 SAMUEL 21 - KHYINGEI PU'TLOU Bible (BSI)

Saul'yei Yu-cha Rapya Gibeonia Rapne Hatkur

¹ Heirouri David'ne Krung khoine thrungei chaanrou, kum'khyum'rekpa thang-knaini butam thukkurbi cha'kmai kanringkur. Heisi tounarouri David'ne Umpuei maibongra wachangbine shunchakur. Heirouri Umpune loushun, “Butaam thukkur awari Saul'le aiyei hut mraokur cheemkhur-bommai'yei ngammeime, ngamri Saul'ne Gibeonia rapya hatdurkhoula.”

² Heisi tounarouri Krung David'ne Gibeonia rapya ungyerkur, heitoubi yanungei kyun, “Kouweiyo toulanungri, Gibeonia rapri Israel rapbei thimiri hoimak; heiya Amoria rapbei hirom chanao rapme. Kheen khatrou Israel rapne yakou yakantlangrilbi tlou kantomrilkhou; heiya Saul'neri Israel rapya kalhopbine, yayari mangyernanungei wairaangkhou.”

³ Heisitoubi David'ne Gibeonia rapnung shun, “Keine nanungei'tlim koutoupiserou? Heirou koutoubi keine naya lhukthutbine Umpuei thimi rapya phor phayerserouwo?”

⁴ Heirouri Gibeonia rapne anungei loushun, “Kane Saul'rouwei kou kulshan khatkhi, sinakhi madumakme, heirou aiyei cheemreikhi koukhi madumakme, heirou kanungei'tlim thimi hukhatyakhi Israella hiyernimak.” Heirouri ani loushun, “Naiyei koukou yunkur tloubom rapya nanungei keine toupirouwa.”

⁵ Heisitounei ngamrou yani Krungnung shun, “Kaya toumangpikur thimi, heirou Israellei ram ri-karchunna rilla kourou-kourou paalbine klei thimirap kaya louthutdurbi toumitnanungei raangkhou thimiyei chanapawa napung'eniya pithutbi kai hutra silnapilak;

⁶ heiyanungri kani yaya Umpune khalthutpikur Saul'yei khukarthil Gibe-ah'ra Umpuei maibongra, ngakra ruifretni manyarbine hatdureise.” Heirouri Krungne loushun, “Keine yayari naihutra silnapirouwa.”

⁷ Heiya Krungneri Jonathan'yei chanapawa, Saul'yei yuwa Mephibosheth'yari silnapimakne khaithutdurkhou, ngamri David'le, Saul'yei chanapawa Jonathan yakhuntayei tlakra Umpuei minra mardingrilkur tloukantom hilthungni ayari silnapimakkur.

⁸ Heisitoubi Krungne, Aiahyei chanapuiya Rizpah'ne Saul'nung pukkhou chanapawa napung'khni - Arnoni'le, Mephibosheth, heirou Saul'yei chanapuiya Merab'ne Meholothia Barzillai'yei chanapawa Adriel'nung pukkhou chanapawa napung-phangale kalhonne ya thimi napung'eniya khalthutloukur.

⁹ Heitoubi David'ne yaya Gibeonia rapbei hutra pilhakbine silnapikur; heirouri yani yarapya lhungdoura Umpuei maibongra manyarhatkur. Heisitoubi ya napung'eniya hanuitomrou pulni, gehu trunwai khumnei knei waiyouni tlainirou ruifretni manthuibine manyarhatkur.

¹⁰ Heirouri Aiah'yei chanapuiya Rizpah'ne ramolpun mtumya loubine, thlung doura mherpakbi, trunwai khum waiyoutirrei youbine khi'lhung rapbei doura nungne yenrophopbongyen heiyei doura neingaakbine khi-kanrelbi leikur; heisitoubi nunghangei kheenrou nungthourei ramwaa rapyakhi chuyermakne, heirou masanungne ramyaa rapyakhi simyermakne khi'lhung rapya ane thranbine chakngaakkur.

¹¹ Heirouri Aiah'yei chanapuiya, Saul'yei nukhuwi Rizpah'ne heinaksi touwurnei pao heiwaya David'nung shunpiwurla.

¹² Heirouri David'ne wabi Saul'le aiyei chanapawa Jonathan'yei thru'khrong rapya Jabesh-gileadia rapbei hutrouwei walouheikur. (Philistia rapne Saul'le Jonathan'ya Gilboa'ra hatdurbi, heitoubi heinirou yani Beth-shan'yei kulyom kartilna phungtungra manyarbine khounarei Jabesh-gileadia rapne mulouheibi khoukur.)

¹³ Heisitoubi David'ne Saul'le aiyei chanapawa Jonathan'yei thru'khrong rapya Gilead'rouwei yenheikur, heitoubi thimi rapne Saul'yei chanapawa napung'eniya manyarbi hatdurna thru'khrong rapkhi khummarkumkur.

¹⁴ Heitoubi yani Saul'yei thru'khrongle, aiyei chanapawa Jonathan'yei thru'khrong rapya Benjamin'yei ram Zila'ra klei yaipawa Kish'yei lhanpurra phumkur. Heisitoubi krungei chaytlou hilthungni lhou namma touwurbi luilhakkur; heihillouri Umpune ram heinung'tlim shuncha-buchakur nammaya yapiwurbi loulhakpikur.

Philistiayei Mannulim Raple Raal Kardourilkur

¹⁵ Heirouri hanuikhi Philistia rapne Israel rapkou raal kardourilwurthula; kheen heirouri David'ne aiyei raallui raple kalhonne yuchumbine, heitoubi Philistia rapya raal kardourilkur; kheen heirouri David beimakne lahkur.

¹⁶ Heirouri Mannulim touri Philistia'yei Raphah shullamrei napawa Ishbi-Benob toubi ung khatne, aiyei hutra raalchei taangra kulshan shekel macha'khyum khrit khat shinbine, heitoubi aiyei sintlakra raalshon khatkhi msuibine wachangbi, heitoubi David'ya hatnanungei raangkur.

¹⁷ Heiya Zeruiah'yei chanapawa Abishai'ne David'ya trungpiwurbi, Philistiaei napawa heiwaya shon'ne shaatbine hatkur. Heirouri David'yei raallui rapne anungei tlou kantombine shun, “Nangri hanui kallengni kakou kalhonne raalbomra chamakalo; kounakpi nangne hiyuranungri, Israel rapbei meishar mitkurnaksi hoirouwame.”

¹⁸ Heihillouri hanuikhi Gob'ra Philistia raple raal kardourillurthu; heirouri raalbom heirou Hushathiaei lhouwa Sibecai'ne Saph toubi ung Mannulim touri Raphah'yei lhouwa khatyakhi shaat'hatdurthula.

¹⁹ Heirou hanui kallengni Gob'ra Philistia rapkou raal kardourilwurthu; raalbom heiroukhi Bethlehemrei Jaare-Oregim'yei chanapawa Elhanan'ne Gittia touri Gath'rei lhouwa Goliath'ya hatkur. Aiyei cheitaang heiwari napuiya rapbei yaheengro tainam'atmal tang.

²⁰ Heitoubi heihillouri hanuikhi Gath'ra raal kardourilwurthula. Raalbom heirouri lhouwa manrol tang-lamchou khatkhi loukyao. Aiyei hutmyar-homyar thyoi-thyara thruktamsol karbakbi pulni hut'myarle ho'myar somnile-phalibil tlung; heitoubi a heiwakhi Mannulim Rapha cheemkhurrei napawa khat.

²¹ Kheen heirouri ani Israel rapya daimarekbi khremnayei kheenrou, David'yei naowa Shimei'yei chanapawa Jonathan'ne ayakhi shaat'hatkur.

²² Heisitoubi Gath'rei pukkhou Mannulim Raphah'yei chanao Lhouwa ya napung-phali heirapya David'yei, heirou aiyei raallui rapbei hutra namma hiwurchiya.