2 SAMUEL 2 - KHYINGEI PU'TLOU Bible (BSI)

David'ne Saul Hiwurnei Pao Mayekkur

¹ Heihillouri asitoubi hungthukkura touri, David'ne Umpurei tlou ngaithibine, “Keine Judah'yei khukarthil rapbei hangrouwei khatra kachangbine palserouko?” toubi kyun. Heirouri Umpune anungei, “Kawalo, heitoubi bi heirou pallaklo!” toubine loushunpikur. Heisi tounarouri David'ne loukngai, “Heiyanungri bi koutamrou kapaalserou?” Heirou Umpune loumallangbi kyun, “Hebron'ra kapaallak!”

² Heisitoubi David'ne bi heitamrou kakur, heirou aiyei nurap napung'khni touri Jezreel'rei Ahino-am'khi heirou Carmel'rei Nabal'yei trulmeiwi Abigail'khi kyaoni kapaalkur.

³ Heirou David'ne aiyei raallui rapkhi, yaiyei nuwa-chawa rapkhi kalhonne, katruiheikur; heitoubi yane Hebron'ra pulni paalmalnakur.

⁴ Heirouri Judah'yei kulyom rapne wakartilbine, heitoubi bi heitamrou yani David'ya Judah'yei cheemkhur doura Krung khoine shirek teipikur. Heirou yani David'nung pao heiwaya, “Saul'yei khi'lhung heiwari Jabesh-gilead'yei thimi rapne khi ruypiwurlame,” toubine shunpikur.

⁵ Heirouri David'ne paocha thimi rapya malhetbine Jabesh-gilead'ra heiyilkur, heitoubi yanungei washunkur, “Umpune naidoura phor pilaksu, ngamri nani naiyei upawa Krung Saul'ya kringpikheini watlhou toupiwurla, heitoubi aiyei khiya nani ruipiwurla.

⁶ Heirou asinungri, Umpune naya malungshipilaksu, heitoubi nanungei malungamkna lhouya toupilaksu; heirou nani heinaksi lhangaiyei watlhou toupiwurnei ngamrou, keinekhi nanungei lhangai lhouya toupirouwa,

⁷ Ngam heineri asinungri, naiyei hut-ho mantranglakasu, heirou sireikhei hoilakasu; kouweiyo toulanungri, asinungri naiyei upawa Krung Saul'ri hiyura; heitoubi Judah'yei thimi rapne keiyari yaidoura Krung hoipinanungei shirek teipiwurla.”

Ish-bosheth'ya Israelyei Krung Hoiyerkur

⁸ Heiya Saul'yei raalluipu upa Ner'yei chanapawa Abner'ne Saul'yei chanapawa Ish-boshethya ruilouheibine, Mahanaim'ra wakur.

⁹ Heitoubi Abner'ne Ish-bosheth'ya Gilead'yei doura, Ashuria rapbei doura, Jezreel rapbei doura, Ephraim rapbei doura, Benjamin'yei doura, heirou Israelrap nammaei dourakhi Krung hoiyerkur.

¹⁰ Saul'yei chanapawa Ish-bosheth'ne Israel rapbei doura Krung hoiyei kheenrou ai'mshaei kum somli tlungura, heitoubi ani kum'khni Krung khoine thrungkhou. Heisiya hoiyanungkhi Judah'yei thimi rapneri David'yei hilla chanthungkur.

¹¹ Heirou David'ne Hebron'ra Judah rapbei doura Krung khoine kum enile lhang'khat thrungkhou.

Judah'le Israelyei Tlakra Raal Youkur

¹² Asinungri Ner'yei chanapawa Abner'ne Saul'yei chanapawa Ish-bosheth'yei shok raple kalhonbi Mahanaim'rouweine Gibeon'ranungei wathukkur.

¹³ Heirou Zeruiah'yei chanapawa Joab'le David'yei shok raple kalhonne wathukbine Gibeon'yei yuisora yaya murilkur; heitoubi yani yuiphumyei khatlhang mnakra ombine leiyeinung, khatnekhi khatlhang mnakra thidakrilni ombine leikur.

¹⁴ Heirouri Abner'ne Joab'nung heishun, “Asinungri raallui rapne khatreikhi-khatreikhi kanthourilbine, heitoubi kai maibongra raal karshul shingnalaksu.” Heirouri Joab'ne loumallangkur, “Shingnarillaksu, kya, thirillase!”

¹⁵ Heisi tounarouri yani fyou'kanthourilbi, Benjamin cheemkhurrei thimi napung-chiple khni khalthutbi, heitoubi Saul'yei chanapawa Ish-bosheth'yei lhangrei wathukkur; heitoubi David'yei lhangrei aiyei shokrap napung chiple khni khalthutbine chunthutrilkur.

¹⁶ Heisitoubi yane khatle-khatrei napung-khatsol raalpal khoine mayungrilbine, ngakkhungra rkuikolrilbine, heitoubi mnakra raalshon'ne thunkalleirilbi pulpulni kanellhakkur. Heisitounei ngamrou Gibeon'rei klei bi heiwaya “Helkath Hazzurim” touri “Raalshonyei Phailou” toubine min thulkur.

¹⁷ Heisitoubi heiniyei raalbom heiwari beimakne thuithikur raalbom khat khoine kardourilkur; heirouri Abner'le Israellei thimi rapya David'yei raallui rapne beimak thuithine raal manikur.

¹⁸ Kheen heirouri Zeruiah'yei chanapawarap, Joab'le, Abishai, heirou Asahel yateinao khyumrekpa bi heitamrou louklei; heirou Asahel'ri ramhangrei klei rchao kallanaksi hut-ho khrang thimi khatkhi khoi.

¹⁹ Heirou Asahel'ne Abner'yei hilla chanthungbi, thyoirakhi-thyarakhi kallekkhoumakne chanphabongyen hulbine raal chanthungkur.

²⁰ Heirouri Abner'ne aiyei hillhangra loukallekbine anungei loushunkur, “Nangri Asahel nimakeiko?” Heirouri Asahel'ne, “Moi, keime!” toubi loumallangkur.

²¹ Heisi tounarouri, Abner'ne aya loushun, “Keiya heichanthungmaka, heinung'tlimri neiyei thya lhangra nimanung neiyei thyoi lhangra khreilhakbine raallui raprouwei napung-khatya chanthungbine hulmanlaka, heitoubi aiyei putchei heirou aiyei hutsuya lunglouheilak.” Heiya Asahel'neri Abner'ya lakhounimakne hulbine chanthungkur.

²² Heirouri Abner'ne hanuikhi kallengni Asahel'ya loushunthu, “Keihilla chanthungnarei mai khreithutdurlak, kounungei keine neiya hatrouwo? Heirou koukumma keine neiyei tei Joab'ya rorilchangrou?”

²³ Heisiyanungkhi, Asahel'ne dongmakne heichanthungnarouri, Abner'ne aiyei raalchei mayuni Asahel'yei yaipungnara hilkarshon'ne louilkalleikur; heisi tounarouri chei'myu heiwari Asahel'yei namkalra kalleithutkur. Heisitoubi Asahel bi heitamrou kanellhakbi hikur. Heirouri thimi nammane Asahel kanellhakni hibi louleina bi heitamrou wa'tlungkurle, ya nammane mayungkar'umbine leikur.

²⁴ Heiya Joab'le Abishai yakhuntari Abner'ya dongmakne hulbine chanthungkur. Heisitoubi yani rawai Kinni yongchipbil hil-chanthungbi, Gibeon ramthingei lampallei klei Giah'yei maishuk touri kulkung lhangrei klei Ammah lhungdoubil wadani chanthungkur.

²⁵ Kheen heirouri Benjamin cheemkhurrei napawa nammane Abner'yei ruichingna daakra markhulbi rulkhat khoine kartilkur; heitoubi yani lhungdou khatra raal kardourilnungei marshikbine leikur.

²⁶ Heirouri Abner'ne Joab'ya ungloubi kyun, “Kane kalui naimakne raal tourilbi hatrillaserouko? Awane hungdongnara duine kharilloume touri nang ningmuleiko? Heiyanungri kounak tla leibi nangne neiyei thimi rapya yaiyei teinao rapya hulchanarei shundongrouwo?”

²⁷ Heirou Joab'ne loumallangbi kyun, “Dunpune mulaksu; kounakpi nangne heihakya louyunmakur hoiyanungri, tanghakpane keiyei raallui rapne yaiyei teinao rapyari ningshun nungwar phane chanthungbi hulchaheirou.”

²⁸ Heisi tounarouri, Joab'ne pengkul sakhungbine paochilkur; heirouri thimirap nammane Israel rapya raal hulthungnarei dongurbi kan-ngankur; heitoubi raalkhi hanui kallengni kardourilmakkur.

²⁹ Heirouri Abner'le aiyei thimi rapne masantan lamtla chabi Jordan'yei Arabah phaikarya heiraalkur; heitoubi Jordan kung ralthutdurbine ningshunphit lamtlabi, Mahanaim'ra hungtlungkur.

³⁰ Heirouri Joab'ne Abner'ya hil chanthungbi raal channarei yenkallengkur; heitoubi Joab'ne aiyei thimirap nammaya ungmarkumbi thimi mshing kansherbi thiyeinungri, Asahel, heirou David'yei shok raalluirap ya napung-chiple tako heikhi tlungmakura.

³¹ Heiya David'yei shok raallui rapneri Benjamin'yei thimi raple Abner'yei raallui rapya chungwane hatdurpi; heisitoubi yai hatkur thimiri macha-khyumle somruk tlungkur.

³² Heirou yani Asahel'yei khi'lhungya khulloubine, Bethlehem'ra aiyei pawaei lhanra phumkur. Heirouri Joab'le aiyei thimi rapne masantan lamtla chabine ningshun kulkayei kheenrou Hebron'ra hungtlungkur.