2 SAMUEL 19 - KHYINGEI PU'TLOU Bible (BSI)

Joabni David'ya Khi-kanrelnarei Manelkur

¹ Heirouri Joab'nung, “Krungri Absalom'ya khi-kanrelbi chapbine leiyurame,” toubi pao shunpiwurla.

² Heineri heiyei tlainiyei raal maninei pao heiwari thimirap namma'nungeiri khi-kanrelnei pao hoiyura; kouweiyo toulanungri, heiyei tlainirou thimi rapne, “Krungri aiyei chanapawa Absalom'ya khi-kanrelbi chapburame,” toubi yunrilkurya mayekurchila.

³ Heisitoubi heiyei tlainirou raallui rapne raalbomra raal manemakkurbi mu-muni trukyulkur heinaksine, kholil rilla anung-anung mu'muni hungchangurchiya.

⁴ Heirou Krungne lu khumphopbi, hou choune ungraobine, “O keichawa Absalom! O Absalom, keicha samranwa!” toubi kanrelbine chakur.

⁵ Heirouri Joab'ne cheemwaira hungchangbi, heitoubi Krungnung hungshun, “Angturi neiya machin thimi rapya malungshibi, neiya malungshipi thimi rapyari machinpibine; heirou angtu tlainirou neiyei rongchanya, neiyei chanao rapbei rongchanya, neiyei nu rapbei heirou neiyei nukhu rapbei rongchanya kalpikur neiyei shokrap ka namnung'tlim rikraibine mai khumbine chapleinu!”

⁶ Kouweiyo toulanungri, neiyei raallui upa raple, neiyei shokrap ka nammari neiyei maibongrari koukhi nimakme toubi nangne mutdurla; kouweiyo toulanungri, angturi keine ningmuwurla, touri kounakpi angtu Absalom'ne riengbi louleithanganungri, ka nammari hiwurchiyarou; heiyanungri neiyei malung khrah hoirounu!

⁷ Ngam heineri asinungri nangne kanthoubi wathuklak, heitoubi neiyei shok rapnung malung damni tlou wayunpilak. Kouweiyo toulanungri, keine Umpuei minra kantombi yunlei, “kounakpi nangne wathukbi tlou yunpimanungri, tanghakpane thimirap napung khatchakhi angtu masa kraalne neihilla chanthungmakrou; heiyanungri neiyei kartlangei waiyoubine angtu rampharou thukwurkhou lhangaimak lhouthukyari angtuei heiwanedui thuithikur lhouthuk khat hoirouwa.”

David'ne Jerusalem'ra Krung Khoine Hanui Yenkallengkur

⁸ Heisi tounarouri Krung David'ne loukanthoubi wathukbine heitoubi palshung shumtrumra wa'omkur. Heirouri yane thimi rapnung, “Thilak, Krungri palshungra ombine leiyurame,” toubi shunpikur. Heirouri thimirap nammane Krungei maibongra wachangbine murilkur. Kheen heirouri Absalom'yei hil-chanthungkhou Israel rapri ai'aiyei cheemra trukkurchiya.

⁹ Heirouri Israellei cheemkhur phunghlam nammaei hangra yadikdik tlou rkalrilbine kalthi yitrilwurbi atoubi kyun, “Krungne kayari kaiyei yeekna thimi rapbei hutrouwei lhukthutkhoubi, heirou kaya Philistia rapbei hutrouwei kalthutkhoupi, heiya asinungri ani Absalom'ya chiwurbine kai ramya lakurkhoubi trukkurame.

¹⁰ Heisiya hoiyanungkhi, Absalom'neri, kane ayari kai doura Krung khoine khalthutkhounarei ari raalbomra hiyura. Heineri, asinungri, nani ayari kai ramra yenrui'mallengnungei koukhatkhi yunmakne mulleikurya koungameiyo?”

¹¹ Heirouri David'ne thimi malhetbi Suipipu'rap Zadok'le Abiathar'ya atoubi shunthungkur, “Judah'yei yama upa rapnung atoubi shunpilaklo, ‘Israelrap nammaei yunrilkur tloubom rapya Krungei cheemra wa'tlungbi aiyei khnara mayekurlawaya, nani Krungya asilumpha aiyei Krungbom cheemra waruilhakmakne khoukurya koutouneiyo?

¹² Nari kei cheemkhurrei teinaorap, keiyei shullamrei sharung khatrei teinaorap, keiyei heenai khatrei teinaothilme. Heiyanungri koungammei nane Krungya ruimallengni leikurrawo?’

¹³ Heitoubi nani Amasa'yakhi shunbi, ‘Nangri keiyei shullamrei heinai khatrei teinaorap nimakko? Kounakpi keine neiyari Joabei rungkhlangra keiyei raallui rapbei chaylampu khat khoine bom lhakpimanungri, Dunpune keiyari awayakhi duine thuithine klah dayerlaksu,’ toubine yunpilak.”

¹⁴ Heisitoubi David'ne Judah'yei thimi rapya thring-malknani leikhounarei marmulkur naksine manelbine malhimloukur; heitounei ngamrou yani Krungnung pao shunthungbi, “Kallenglakalo, Krungwa nangle, neiyei thimirap nammakhi kyaoni hunglakalo,” toubine ungmallengkur.

¹⁵ Heitounei ngamrou Krungne yenkallengthubi, Jordan'bil hungtlungkur. Heirouri Judah'ne Krungya murilnanungei toubi Gilgal'ra yuchumkur, heitoubi Krungya Jordan kung kraalne ane yuruiloukur

¹⁶ Heirouri Benjamin cheemkhurrei Gera'yei chanapawa Shimeikhi Krung David'ya murilnanungei toubi Judah'yei thimi raple kalhonne Bahurim'rouwei khnotni yuchumkur.

¹⁷ Heirou akou kalhonne Benjamin'yei thimi lishing khatle, Saul'yei cheemmairei shok Ziba'khi, aiyei chanapawa napung chiple-phangale, aiyei shokrap napung somnikhi kyao. Heirou yani Jordan'ra khnotni yubine Krungya yumurilkur.

¹⁸ Heirouri yani Krungei cheemmai thimirap nammaya Jordan kung kraalne ruilounanungei toubi marshikkur, heitoubi yani Krungei malung khrahnanungei lhou rapya toupikur. Heirouri Krungne Jordan kung ralthutnanungei marshikyei kheenrou Gera'yei chanapawa Shimei'ne aiyei maibongra kanellhakbine khrumkur.

¹⁹ Heitoubi ani Krungnung shunchakur, “Keiyei Krungne keiyari klalni loupimaklo, heirou Krungne Jerusalem'rei wathukei tlainirou neishok keine neinungei touwurkhou lhourap heiwaya hanui kallengni ningthutpimaklo, heiwaya Krungei solungra tloukhoine loupimaklo.

²⁰ Kouweiyo toulanungri, neishok keine ningmuwurlame, touri keine klalyei lhouya touwurkhoula, heingammei angtu tlainirou keine Krungya yubi murilnanungei toubi Josephbei cheemkhur-bommai nammaei maibong lamkrini wathukkur awariyame.”

²¹ Heiya kheen heirouri Zeruiah'yei chanapawa Abishai'ne mallangbi loukyun, “Heiyanungri, Gera'yei chanapawa Shimei'yari, Umpune shirek teipikur Krungya manchowurnei ngamrou, ayari hatbom thukmakka?”

²² Heirouri David'ne loushun, “Zeruiah'yei chanapawarap, nari keiyei lhou tounara koukhi yaothungbom thukmak, ngamri angturi nari keiya karhane klei thimirap hoileihui. Angtu tlainirou Israella thimi hukounak khatya hatduserouko? Kouweiyo toulanungri, angturi keine Israel rapbei doura Krung khoine thrungleime touri kei'mshane mumakrouko?”

²³ Heirouri Krungne Shimei'ya shun, “Angturi neiya hatmakarou.” Heisitoubi Krungne anungei tlou kantombine shunpikur.

David'ne Mephibosheth'ya Kringpikur

²⁴ Heirouri Saul'yei chanapawa Mephibosheth'khi Krungne Jerusalem'ya lakurkhoubi chakur tlainirouwei waiyoubine, raal manibi kyingni yenkallengkur tlaini rampharou Mephibosheth'ne aiyei ho deeknawakhi chaamthaimakne, heirou lukhi shumathaimakne, heirou phirul-phishambkhi shumathaimakne Krungya murilnanungei toubine yuchumkur.

²⁵ Heirouri asitoubi thukkura, touri ani Jerusalem'rei Krungya murilnungei yuiei kheenrouri, Krungne aya loukngai, “Mephibosheth, nangri keikou kalhonne chanthungmakuri koutouneiyo?”

²⁶ Heirouri ani loumallang, “O keiyei Krungwa; keiyei shok Ziba'ne keiya mandalpiwurnei ngammei chanthungmakur; ngamri neishok keine anungei shunbi, ‘Keinungei gadha khat put marshikpilak, keiri ho deeknei ngamrou heiwaya tungbine Krungkou kalhonbi chaeise,’ toubine chay pikur.

²⁷ Heiya Ziba'ne keiyei ngamrou neinungei mandalpikur. Heiya keiyei Krungri Dunpuei Thangring naksime; heineri asinungri, Krungei lhangairoume toubine ningchakur heiwaya heisi toupilaklo.

²⁸ Kouweiyo toulanungri, kai pawaei cheemkhur-bommai'yei thimirap nammari keiyei pu Krungei mit'thrilna maibongrari khi thimithilme; heisiya hoiyanungkhi, Krungne neishok keiyari neiyei lukturngra omkarhungbi chamaikur thimi rapbei hangra omthungyerpilame; awaya duinarari keine Krungnungei kouya yunnungei leiheirouwo?”

²⁹ Heisi tounarouri Krungne aya shun, “Heiyanungri kounungei neiyei ngamrou hanuikhi yunkurawo? Asinungri keine tlou kartinwurla, nangle, Ziba nakhuntani ram yerkhairillaka.”

³⁰ Heirou Mephibosheth'ne krungnung loukyun, “Asinungri krungni aiyei Krungbomra kyingni yenkallengurari, Ziba'ne ram namwaya aitamei khoine louchalaksu.”

³¹ Kheen heirou Gileadia Barzillai'ne Rogelim'rouwei yuchumbine, heitoubi ani Krungle kalhonne Jordan'bil wabi, aya heiruithutbi thulthutpikur.

³² Heiyei kheenrouri Barzillai'ri ai'mshaei kum somshri tlungurbi beimakne tarwura; heirou ari lal dun thimi hoiyabine, Krungne Mahanaim'ra leikhouyeinung ani Krungya chaak-an thulpikhou.

³³ Heirouri Krungne Barzillai'ya shun, “Nangri keikou kalhonne Jordan heiralthutbi chawase, heitoubi keine neiya Jerusalem'ra chaak-an lhakpiroume.”

³⁴ Heiya Barzillai'ne Krungnung loushun, “Keineya Jerusalem'ra kabine Krungkou kum kounak tlani leikhouweirouwo?

³⁵ Keiri asinung kei'mshaei kumkhi somshri tlungurawaya. Heineri asinungri keine lhangai-lhangaimakya khalthut maniheirouko? Nimanung, neiyei shok rapne keiyei chamaibi klei chaak-anya heirou keine mongbi klei yuidingya mongchangrouko? Nimanung, keineya laarung-sheirung rapbei houya mayekchangeirouko? Heiyanungri, kounungei neishok keiyei ngamrou Krungya klah putkhrit hoiyerrouwo?

³⁶ Neishok keiri Krungle kalhonne Jordan kungyatom heiralthutlanung luila, heiya kouya tounanungei heinungei'tlim Krungne keinungei klahman piroutouneiyo?

³⁷ Krungne kringpibi neishok keiyari kallengyerlaklo, heiyanungri keine keiyei khukarthilla, kaiyei nutar-patar rapbei lhan pongra pulni hirouwame. Heisiya hoiyanungkhi, neiyei shok Chimham'ri bi atamrou leiyurame, ani keiyei pu Krungle kalhonne heiralthutlaksu, heitoubi Krungne lhangairoume touya anungei heisi toupilaklo.”

³⁸ Heirou Krungne loumallangbi kyun, “Chimhamri keikou kalhonne heiralthutrouwa; heirou nangne lhangairoume tou heiwaya anungei keine toupirouwa; heisitoubi nangne keiya touyerkni heirap nammaya keine neinungei toupirouwame.”

³⁹ Heisitoubi Krungne Barzillai'ya machuppiwurbi, phor shampikur, heitoubi Barzillai'ne aiyei cheemranung kallengkur. Heirouri thimirap nammane Jordan kung heiralthutkur, heitoubi Krungkhi heiralthutkur.

⁴⁰ Heisitoubi heihillouri Krungne Gilgal'ra wakur, heirou Chimham'khi akou kalhonne wakur; kheen heirouri Judah'yei thimirap nammakhi, heirou Israellei thimi rapkhi rul lhang'khatne Krungkou kalhonne chakur.

⁴¹ Heirouri thilak, Israellei thimirap napawa nammane Krungei leinara wachangbine anungei wakyun, “Koutounei kai teinao Judah'yei thimi rapne neiya muni ruilouheibine, heitoubi Krungyale, aiyei cheemkhur-bommai'yei thimirap nammayakhi, heirou David'yakhi aiyei thimi raple kalhonne Jordan kung kraalne ruilouheikurawo?”

⁴² Heirouri Judah'yei napawarap nammane Israellei thimi rapnung loumallangkur, “Ngamri Krungri kaiyei karnakril shullamrei teinaome. Heinung'tlim nani meithukni malungkhakurrako? Kane Krungei chaak-anya chamailoukur leiyurako? Nimanung kaiyeime toubine airouwei kou-kouya louheikur leiyurako?”

⁴³ Heiya Israellei napawa rapne Judah'yei napawa rapnung loumallangbi kyun, “Krungei bomra kaiyeiri siruk chip klei, ngam heineri David'yei dourari nayari kani duine yunbom thuk tangwane klei. Heiyanungri kayari koungammei nani ningmupimakne thuithine horthutkurro? Kaiyei Krungya ruimallengna'nungei tlou shunmatupikur heiwari kani lamkri nimakko?” Heisiya hoiyanungkhi, Judah'yei thimi rapbei kyun tlourap heiwari Israellei napawa rapbei kyun tlou rapyakhi duine thuithi.