2 SAMUEL 17 - KHYINGEI PU'TLOU Bible (BSI)

Hushai'ne Absalom'nung Tlou Sempikhou

¹ Heiyakhi duinara Ahithophel'ne Absalom'ya shun, “Kringpibi keiya yapilaklo, keine thimi lishing chiple-khni khalthutdeise; heitoubi keine yaya thouloubine angtu masanunghak David'ya hulbi chanthungeise.

² Heirouri David'ne latekwurbi trukchangmakne louleiyei kaalnung keiya aya chanphabi kulchalkur manerou; heitoubi aidoura raal dabine toumathunyei kheenrou, akou louklei thimirap namyerwari loutrukkurou; heirouri keine Krung David'yatom hatkur maneroume.

³ Heitoubi keine thimirap nammaya neinungei yenrui'mallengrou. Neiyei hatnungei rapha thimiyatom hatdurlanungri, thimi namyerwa heiri neinungei kyingni yenkallengrou.”

⁴ Heisitoubi Ahithophel'yei shunmatubi sempikur tloulhangrap heiri Absalom'nungle, Israellei yama uparap nammanungkhi beimakne lhangai-malungamkna tlounaksi hoiyura.

⁵ Heirouri Absalom'ne kyun, “Asinungri Archia Hushai'yakhi wa'unglaka, heirou ane kou yunleiyo touri kani ningthiyeise.”

⁶ Heirou Hushai'ne wa'tlungei kheenrou Absalom'ne anungei loushun, “Ahithophelne atoubi yunmatupiwurla. Aiyei shunmatupikur heiwaya heisi touwaserouko? Heinimanungri, neiyei kningri kousi leilei, yunthilaklo!”

⁷ Heisi tounarouri Hushai'ne Absalom'nung loukyun, “Ahithophel'yei shunmatupikur tlou heiwari asiyeinungri lhangaimakrou.”

⁸ Heiyakhi duinara Hushai'ne yenyunthu, “Neiyei pawale, akou kalhonbi klei aiyei raallui rapri raalla sireikhei lhouwa'dikme touri nangnekhi kmu heiwariya; heirou yarap heiri ramhangra shun lukloheinei malungkhabi(kanthi fyoubi) klei yekthrum puinaksine thuithikur thimithil. Heirou neiyei pawa heikhi raalla beimakne sireikhei thimi khatkhi khoi; heineri masanungri ari aiyei rapkoukhi leichokmakne laine kanshangthutbine louleiroume.

⁹ Thilak, ari shuimakne thlungkhur khatra nimanung bi laikhatra yulbine leilhengrou; heirou kounakpi thimi thane lamkriyei raal loudanara yaowanungri, heiwayei paoya mayekkur thimi rapne, ‘Absalom'yei hil-chanthung thimi rapne yadikni hatrillurame,’ toubine yunnaroume.

¹⁰ Heirou krak raallui rapne yaiyei ukningra yangkong'naksine rangbinekhi, yai ukningra chitekwurbi kanchunchirouwa; kouweiyo toulanungri, nai pawari raalla beimakne sireikhei lhouwa khat hoikhou, heirou akou kalhonbi klei raallui rapkhi sireikhei thimidikme touri Israelrap nammane kmu heiri.

¹¹ Heiya keiyei yunmatu kniri, Israelrap nammane neileinara wakartilyerrou da; Dan'rouweine Bersheba waphayei klei thimirap nammane, tuymak ruirei shitnruinak chungwane kartilbine, heitoubi nei'mshani ruibine raal darou da.

¹² Heisitoubi kani aiyei louleirouyouna bi khatra chabine, heitoubi thleimaira rdai dakurnaksine aidoura raal darou; heitoubi ayale, akou kalhonbi thimirap nammayakhi thimi hukhatkhi lakkhoumakne hatdurou.

¹³ Heirou kounakpi David'ne khukarthil rilla truklhakbi louyullanungri, Israelrap nammane ruifret urthutbine khukarthil heiwaya phailoura thlunghar khatchakhi mumaknungei rahui thukne tangdeeksundarou.”

¹⁴ Heirouri Absalom'le, Israellei thimirap nammane kyun, “Archia Hushai'yei yunmatupikur tlou heiwari Ahithophelyei shunmatupikur tlouya duine lhangailei.” (Kouweiyo toulanungri, Ahithophel'yei shunmatupikur lhangaiyei tlou rapya toumangurbi, Absalom'ya klal dayernanungei toubi Umpune wairaangkur).

Hushaine Pao Shunthungbi David'ya Kalpikur

¹⁵ Heirouri Hushai'ne Suipi purap Sadok'le, Abiathar yasinung shunpikur, “Ahithophel'ne Absalom'nungle, Israellei yama upa rapnung atoubi shunmatupiwurla, heirou keinekhi atoubi shunmatupiwurla.

¹⁶ Ngam heineri, asinung khrangtoubi thimi malhetbi David'nung pao shunpilak: Angtu masari ramthingei rungbom raalpal rilla yarekmakka, heiya kousi-kousi touwanungkhi Jordan sralla louralthutlaka; hei nimanung, Krungkhi heirou akou kalhonbi klei thimirap nammakhi shuimakne hirouwa.”

¹⁷ Kheen heirouri Jonathan'le Ahima-az yakhuntari En-rogel'ra louklei; heirou shok-napuiya khatpini yanungei pao washunpibi, heirou yarukhnine chabi David'nungei pao washunpirou; kouweiyo toulanungri, yarukhnine khukarthilla wachangeinungri hunikhi muthungyer'nungei yamak.

¹⁸ Heiya napawa douwa khatne yarukhniya muthungurla; heitounarou ani Absalom'nung shunpikur. Heisi tounarouri Jonathan'le, Ahima-az yarukhnine khnotni shalwurbi, heitoubi Bahurim'ra napawa napung khatdei cheemra wachangkur; heirou aiyei cheem yuntlangmaira yuiphum khat louklei, yarukhnine heiyei rilla yuchangurbi yulbine leikur.

¹⁹ Heirouri napuiya khatpini touri cheempuwaei nuwine khumna khat loubine, heitoubi yuiphum purra pingphopburbi, heiyei doura gehu shungmherbi phoukhalkur, heitounei ngamrou yuiphum heiyei rilla thimi kyulme touri hunikhi mumakkur.

²⁰ Heirouri Absalom'yei shok rapne napuiyaei cheemra wachangbi anungei wakngai, “Ahima-az'le, Jonathan yakhuntari kouranga?” Heirou napuiya heiwini yanung loushun, “Yarukhniri kungban'thung heiraalbine chawurame.” Heirouri yani yarukhniya raphathibi, phamakurnarouri, yane Jerusalem'ra kallengkur.

²¹ Heirouri yani shaalkur hillouri atoubi thukkura, touri yarukhnine yuiphumrei kathukbine, heitoubi wawurbi David'nung pao washunpikur, “Khrangtoubi kung heiralthutlaklo; kouweiyo toulanungri, Ahithophelne neiya karhane tlou shunmatuwurla.”

²² Heirouri David'ne, akou kalhonbi klei thimirap nammane kanthoubi chakur, heitoubi Jordan kung heiraalthutkur; heisi toubine nung katwaarbongnung thimi hukhatkhi Jordan kung raalthutmak yaomakkur.

²³ Asinungri Ahithophel'ne, aiyei shunmatupikur tlou rapya chanthungpimakurame toubi muwurnarouri, ane aiyei gadha tungbangloubine khukarthillei aiyei cheemranung shallura; heitoubi ani aicheemya namma marshalkhouchibi, heitoubi aitamtom kanthuihatkur. Heisitoubi a heine hiwurbi, yai pawaei lhanra phumkur.

David'le Absalom Yakhu-pachane Raal Kardourilkur

²⁴ Heirouri David'ne Mahanaim'ra wa'tlungkur kheen heirouri Absalom'ne Jordan kungra heiraalthutkur. Heirou Israellei thimirap nammakhi akou kalhonne heiraalthutkur.

²⁵ Heirou Absalom'ne Amasa'ya Joabei rungkhlangra raallui nammaei chaylampu khoine bom lhakpikur. Amasa'ri Ishmael cheemkhurrei napawa Jether toubikhi ung Ithra'yei chanapawa. aiyei puiwi'ri Nahash'yei chanapuiya Abigail toubi ung, a heiri Joabei puiwi Zeruiah'yei teinao khatkhi khoi.

²⁶ Absalom'le Israellei thimi rapne Gilead'yei ramra rungbom sheembine leikur.

²⁷ Asinungri David'ne Mahanaim'ra wa'tlungkur heirouri, Ammon rapbei ram Rabbah'rei Nahash'yei chanapawa Shobi'le, Lo-debar'rei Ammiel'yei chanapawa Machir, heirou Rogelim'rei Gileadia cheemkhurrei Barzillai'ne wabine,

²⁸ heitoubi yane ipna rkhum raple, chakpang-leithlam, phuwan rapkhi, heirou gehu tsai, heirou chanalkhi, yamkhi, takchaalkur tsaipak rapkhi, bekhi heirou bekun rapkhi;

²⁹ khuiningkhi, nushungyui kankhankhi, yaokhi, heirou nushungyui karkang rapkhi heibine David'nungle, akou kalhonbi klei thimi rapnungkhi yani chamainungei malanpikur. Ngamri thimi rapri ramthingra kalthi msul-yuikhat doubine louleikur.