2 SAMUEL 16 - KHYINGEI PU'TLOU Bible (BSI)

Ziba'ne David'ya Murilkur

¹ Asinungri David'ne lhungdou tungna kathoikurle tallengni thilak, Mephibosheth'yei shok Ziba'ne, gadha thaei doura mumtol tum macha-khni, heibam macha-khatle, heirou khyudhei-mumtol macha-khatle heirou darkha yui bom khatle toubi lhakbine lamtlanarouri aya rorilkur.

² Heirouri Krungne Ziba'nung, “Arap awaya nangne kouya tounanungeiyo?” toubi loukngai. Heirou Ziba'ne loumallangbi, “Gadha rapri Krungei bommaiyei thimi rapne tungnanungei, heirou mumtol raple, khyudhei rapri neiyei shok rapne chamainungei, heirou darkha heiyui rapri huhuni Ramthingei lamrakra lahlhakkur yaowanungri mongnungei toubi heimarshikkurame,” toubi loukyun.

³ Heirouri Krungne kngai, “Neiyei cheempuei chanapawa Mephibosheth'ri kouranga?” Heirouri Ziba'ne Krungnung loukyun, “Thilak, ari Jerusalem'ra kleime; kouweiyo toulanungri, ‘angtutou tlainirou Israel rapne keipawaei Krungbomya keihutra mallenglhakpirou,’ toubi ani ningchabi karngeileihui.”

⁴ Heisi tounarouri Krungne Ziba'nung shun, “Thilak, asinungri Mephibosheth'yei touwei'mkhei heiri neiyei hoiyura.” Heirouri Ziba'ne loukyun, “Keiyei pu Krungne keiya kringpikur hoiniyasu; ngamri keine Krungnung buchakur awariya.”

Shimeini David'ya Manchokur

⁵ Heirou David'ne Bahurim'ra wayei kheenrou, bi heirou Saul'yei bommairei thimi Gera'yei chanapawa Shimei toubi ung khatne wathukbi David'ya kalthi manchokur, heirou ani heisi wathukmalom David'ya manchokur.

⁶ Heirouri Krung David'yei raallui raple aiyei thimirap nammane Krung David'ya thyoi-thyara mayungkulbine leiyei kheenrou Shimei'ne David'ya thlungni heinanglhakkur.

⁷ Heirou Shimei'ne David'ya manchoyeinung atoubi yunkur, “Wathukkuralo, hut'mraokur thimi, heirou karsukmak thimi nangri shalluralo!

⁸ Saul'yei cheemmai-bommaiyei thimiya hatnei mral heiri Umpune neidoura yongdayerwurla. Heirou nangneri aiyei rungkhlangra Krung khoine thrungbine leilei; heiya neiyei Krungbomri Umpune neicha napawa Absalom'yei hutra pilhakwurlame. Heirouri thilak, nangri neitamyei lhangaimak lhou toukur heiwane neitamya mangyerrouwame. Kouweiyo toulanungri, nangri hut-mraokur thimime!”

⁹ Heirouri Zeruiah'yei chanapawa Abishai'ne Krungnung shun, “Koutouneiyo? Heinaksi khi-uini keiyei pu Krungya manchonung yarouko? Keine asinunghak wathukbine aiyei luya dintatdureise!”

¹⁰ Heiya Krung David'ne loushun, “Zeruiah'yei chanaorap, nani keilhoura yaothungbine kouya tounarou? Nari yaothungmak, aitam mancholaksu; heirou kounakpi Umpune anungei shunpibi, ‘David'ya mancholaka,’ toulanungri, ‘Kounungei nangne heisi toukurawo?’ toubine louyunchangrou.”

¹¹ Heirouri David'ne Abishai'le, aiyei shokrap nammaya shun, “Thilak, keiyei yukpukkur chanapawa'hakni keiya hatnanungei raangbi raphawurlari, kousiyabi Benjamin'yei thimi khatne heisi toumakrou? Heiyakhi duine ane toubomthuk. Aitam aithukpa keiya mancholaksu, kouweiyo toulanungri, Umpune anungei shunpiwurla.

¹² Huni kmu, angtu ane keiya manchowurnei ngamrou, Umpune keiyei klah-mrimkur awaya mupiwurbi, heitoubi keinungei lhangaiya mallenglhakpikhi kyame.”

¹³ Heisitoubi David'le aiyei thimi rapne lamtla heisi chayei kheenrou, Shimei'khi lhunglim khatlhang mnakra heichanthungbi David'ya manchothotho thlungni heinangthungkur, heitoubi rahuikhi khrephangthungkur.

¹⁴ Heisitoubi Krungle, heirou akou chakalhonkur thimirap nammakhi lam tlabi Jordanra wa'tlungei kheenrouri lahtekkurchiya. Heisitoubi yane klah mathrilkur.

Absalom'ne Jerusalem'ra Wachangkur

¹⁵ Kheen heirouri Absalom'le, Israellei thimirap nammane Jerusalem'ra wachangura, heitoubi Ahithophel'khi akou kalhonne wachangkur.

¹⁶ Kheen heirouri asitoubi thukkura touri, David'yei palui Arkia Hushai'ne Absalom'nung wachangbine anungei atoubi wa'kyun, “Krungwao, pulchini thrungniyalo! Neiyei rongchan roshuk pulchiniyasu!”

¹⁷ Heirouri Absalom'ne Hushai'nung loushun, “Neiyei karyalkril palui David'nung rikrai khrumnapi touri ariyako? Koutounei neiluikou kalhonbi chamakkuro?”

¹⁸ Heirouri Hushai'ne Absalom'nung loukyun, “Nimakme! Heiya Umpune, thimi rapne, heirou Israellei thimirap namyerwane khalthutpikur Pu heiwayei khoine keiri leirou; heitoubi keiri akou kalhonne leirou.

¹⁹ Aya duinara, keine dei huya watlhou toubi leirouwo? Aiyei chanapawa heiwaya keine watlhou toubom thukmakrouko? Bongnungri neipawaei watlhouya keine toukhou, heiya asinungri keine neiyei watlhouya tourouwame.”

Ahithophel'ne Absalom'ya Tlou Sempipu Khoini Leikur

²⁰ Heirouri Absalom'ne Ahithophel'ya loushun, “Neiyei kmu kou leilei, keinungei bei yunpilak, kane koutoubi touserou?”

²¹ Heirouri Ahithophel'ne Absalom'nung loukyun, “Neiyei pawane Krungkulya thikulnanungei horkhoukur aiyei nukhu rapbei leinara wachangbine ippiwurlaka, heiyanungri Israellei thimirap nammane mayeklanungri, nangri neiyei pawale yarilmakne karhourillurame toubi yani murouwa. Heitoulanungri nangkou kalhonbi klei thimirap namma heikhi hutdangbi neinungei leichirouwa.”

²² Heisitoubi yane shangkai doura Absalom'nungei cheemkhat makhupbangkur; heitoubi Absalom'ne Israellei thimirap namyerwaei maibongra mitdodo muthungni aiyei pawaei nukhu rapbei leinara wachangbine ippikur.

²³ Heiyei kalrou Ahithophel'yei shunmatupikur tloulhangrap heiri heikallei thimi rapneri Dunpuei shunmatupikur tlounakni loukril; heisitoubi David'le. Absalom yakhu pacha'reknekhi Ahithophel'yei shunmatupikur tlou rapya kluni loubine chanthungrilkhou.