2 SAMUEL 15 - KHYINGEI PU'TLOU Bible (BSI)

Absalom'ne David'yei Krungbomya Lungnanungei Raangkur

¹ Heihillouri asitoubi hungthukkura, touri Absalom'ne aiyei maibongra louchanungei raalluirap napung somngale, sapukrap, heirou sapuk kaari rapkhi khalthutbi marshikkur.

² Heirouri Absalom'ne ningshun manmama kanthoubi, heitoubi ningshunserrei palshung shumtrum pongra ombine louklei, heitoubi huhune Krungya pichar touyernanungei wachanganungri, Absalom'ne aya ungloubine, “Nangri kou khukarthillei thimiyo?” toubine loukngai. Heirouri ane, “Neishok keiri Israel cheemkhur hangrei thimi khatme,” toubine loumallangrou.

³ Heirouri Absalom'ne anungei kyun, “Thilak, neikyun tlouri lhangailei, heirou chimkhi chimlei; heiya Krungneri neiyei tlou makat heiwaya ninglhakpi'nungei thimi dei hukhatkhi maklei.”

⁴ Heiyakhi duinara Absalom'ne atoubikhi kyun, “Thimi hukounak khatne keiya ram awaei picharpu khoine khalbaangbi bom lhakpilanungri, lhouthuk-raalthuknei klah'knang phakur thimi rapne keinungei wachanganungri, keine tharmu chimne pichar toupirou.”

⁵ Heisi toubine klah'knang dakur thimi hukhatpani Absalom'yei maibongra wachangbine thleira kanellhakbi aya rikrai wakhrumyeinung, Absalom'ne aiyei hut loulamthutbine khulkanthoupikur, heitoubi aya loumachuppikur.

⁶ Heirou heisidik toubine Absalom'ne Krungei leinara pichar touyernungei wachangkur Israel thimirap namyerwaya loutrungpikur. Heisitoubi Absalom'ne Israel rapbei solungya malhimloukur.

⁷ Asinungri kum'phali yenluiyei kheen heirouri Absalom'ne Krung David'nung shunbi, “Kringpibi keiya Hebron'ra kayerpilaklo; heiyanungri keine kabine keiyei kantomwurkhou tlouya pangthutdeise.

⁸ Kouweiyo toulanungri, neishok keine Aram'yei ram Geshur'ra leikhouyei kheenrou tlou kantombi atoubi: ‘Kounakpi Umpune keiya shuimakne Jerusalem'ra yenkallengyerlanungri, keine Hebron'ra Umpuya Puwatlhou toubine khrumroume,’ toubine yunthutdurkhou.”

⁹ Heirouri Krungne anungei loushun, “Neimalung damni kawalo!” Heisi tounarouri ani kanthoubi Hebron'ra kakur.

¹⁰ Heiya Absalom'ne Israellei thimirap nammanungei karyouni thimi malhetbi muni paochilkur; heirou aiyei paochilkur heiwari: “Nane pengkul hou loumayekle tallengni, ‘Absalom'ne Hebron'ra Krung hoiyurame,’ toubi paobine louyunlak.”

¹¹ Heirouri Absalom'le kalhonne thimirap napung macha-khnikhat toubi Jerusalem'rei ungthutloubine wathukkur; heirou yaneri kouya tourou kyouwo toukhi ningmumakne icham-chamni wathukbi louchanthungkur.

¹² Heirouri Absalom'ne Pukhrumnei malanthut putya makatyeinung, ani thimi malhetbine, David'yei doura tlou sempipu upa Gilonia cheemkhurrei Ahithophelya Giloh khukarthil'rouwei wa'ungyerkur. Heisitoubi Absalom'ne mukheine wairaangbi lhou tounarouri duiduine katkallhakura, heirouri thimi rapne aihilla chanthungbi thimi mshingkhi duidui katchunglhakkur.

David'ne Jerusalem'ya Lakurkhoubi Trukkur

¹³ Heirouri pao-ur thimi napung'khatne David'nung hungbine paotamkur, “Israel thimirap nammaei ukningri Absalom'yei hilla chanthungurchiame.”

¹⁴ Heirouri David'ne akou kalhonbi klei thimirap nammaya shun, “Kane kanthoubi truklakase; hei nimanungri kari Absalom'yei maibongra thimi hukhatkhi kartleikur manemakrou. Heineri khrangtoubi truklakase; nimanungri ani kaya chanphawurbi, heirou khukarthilkhi raal dabine mangyerrouwa.”

¹⁵ Heirouri Krungei shok rapne Krungnung loushun, “Thilak, neiyei shokrap kari kei Krungwaei shunpikur koukou nammaya tounanungei marshibine leiwurchiame.”

¹⁶ Heisitoubi Krungne aiyei cheemmai-bommai'yei thimirap nammaya ruilouheibine akou kalhonne trukthutkur. Heiya aiyei nukhurap napungchipyari cheemwairei putchei rapya thikulthungnanungei toubi lakurkhou.

¹⁷ Heisitoubi Krungne shalthutkur, heitoubi thimirap nammanekhi aihilla chanthungkur; heitoubi yani tlatnarei klei watongna cheemra wadongurbi kan-ngankur.

¹⁸ Asinungri aiyei shokrap nammane Krungya katlhaduikur; heitoubi Cherethia rapkhi, Pelethia rapkhi heirou Gath'rei Gittia'rap nammanekhi Krungya katlhaduibi aiyei maibongra louchakur.

¹⁹ Heirouri Krungne Gattia napawa Ittai'ya shun, “Koutounei nangri kakou kalhonne charouwo? Kallengalo, heitoubi Absalom'kou kalhonne leilaklo; kouweiyo toulanungri, nangri miram-mithrillei thimime, heirou nari nai cheem'rouwei raal manlouheibi klei thimime; heineri nairamra kallengalo.

²⁰ Heirou nangri angi-angkhnuitom keileinara kwahuime, heineri koutoubi keine naya kakou kalhonne ranchayerwo? Keikhi koulhangra charouwo toukhi mumakkhuime. Heineri kallengalo, heitoubi neiyei teinao rapya ruimallenglakalo. Umpuei kringpikhei heirou Aiyei malungshipikhei heiwari naidoura leipilaksu.”

²¹ Heiya Ittai'ne mallangbi Krungnung loukyun, “Umpune ringliyenri, heirou keiyei Krungne ringliyenri, keiyei Krungne chana-hungna bi kantangra, heirou leinabi kantangrou, hiya-ringanungkhi, tanghakpane neishok keikhi hil-chanthungbi leiroume.”

²² Heitounei ngamrou Krung David'ne Ittai'ya shun, “Heiyanungri lhangaiya, keimaibongra katlhaduibine louchalaka.” Heisi tounarouri Gittia Ittai'ne aiyei thimirap nammale, heirou naoshun-naopar'rap nammale kalhonne maibong lhangra katlhaduibine lam tlakur.

²³ Heirou thimirap nammane shalthutkur heirouri heithrilthung thimirap nammane hou choune ungraobi chapkur. Heisitoubi Krungnekhi Kidron phaikarra lamtla heiralthutkur, heitoubi thimi nammane ramthing lhangranung chakur.

²⁴ Asinungri thilak, Zadok'khi, heirou Lev rapkhi akou kalhonne Dunpuei Mardingpina Theengkungya chungbine heichanthungkur, heirou yani Theengkung heiwaya mathrumwurbi, heirou thimirap nammane heitla'raalbongyen, Abiathar'ne wathukbi malamput makatbine leikur.

²⁵ Heirouri Krungne Zadok'ya shun, “Dunpuei Mardingpina Theengkung heiwari khukarthilla yenmallengbi khoulaklo. Kounakpi keine Umpuei mithrilnara kringpikheiya phalanungri, ani keiyari khukarthilla hanui yenkallengyerbi, heirou Theengkung heile Umpuei thrungnabi heiwaya muyerpithulaksu.

²⁶ Heiya kounakpi ani keiya, ‘Keine neiyari malungshimakme,’ toubi yunlanungri, thilak, keiri bi arou leiyurame, Aiyei lhangairoume touya heisi toupilakasu.”

²⁷ Heirou Krungne Suipipu Zadok'nung atoubikhi shunthu, “Nangya kar'anbi kmu thimi khat nimakko? Neicha napawa Ahima-az'le, Abiathar'yei chanapawa Jonathan yakhunakhi nangkou kalhonne khukarthilla kyingni kallenglaklo.

²⁸ Thilak, keine neiyei paoya mayekbongyen, Ramthingei raalpal leireh rilla heisi lou'omngaakbine leiroume.”

²⁹ Heisitounei ngamrou Zadok'le Abiathar yakhuntani Dunpuei Theengkungya Jerusalem'ra yenmallengurbi heitoubi bi heirou heisi leipikur.

³⁰ Heirou David'ne Olive Lhungdoura chapthothone, aiyei hora khorkhangkhi tungmakne, aiyei lu khumphopbi kakakur. Heirouri akou chakalhonkur thimirap nammanekhi, ai'aiyei lu khumphopbi, chapthothoni lhungdoura kakakur.

³¹ Asinungri thimi hukounak khatne David'nung paotambi, “Ahithophel'khi Absalom'le muni lhou rangnara kyao thimi rapbei hangra khat hoiyurame,” toubine shunpikur. Heisi tounarouri David'ne, “O Umpu, Ahithophelyei wairaangnara shunmatupikur heiwari karsukmakei tlou hoiyurasu!” toubi yunbine shunchakur.

³² Heirouri asitoubine thukkura, thimi rapne Dunpuya khrumna bi lhungdou bungra David'ne ka'tlungkur heirouri thilak, Archia cheemkhurrei Hushai'ne aiyei linglik chulya cheet'chat nabine, heirou aiyei lura rahui chaiphaangbine David'ya rorilkur.

³³ Heirouri David'ne Hushaiya shun, “Kounakpi nangne keikou chawanungri, keinungei lakna hoiroume.

³⁴ Heiya nangne khukarthilla kallenganungri, Absalom'nung, ‘O Krung, keine youkur kheenrou neiyei pawaei shok hoikhounaksine, neiyei shokya hoiyeise,’ toubine yunlaka; heitoubi Ahithophel'ne anungei shunmatupikur tlou rapya nangne hangwalni toudongurla.

³⁵ Heirou Suipipu Zadok'le Abiathar yakhuntari nangkou leikalhon nimakko? Heineri asitoubine toulaka touri nangne Krungei cheem'rouwei koukou paoya mayeklanungri, nangne Suipipu Zadok'le Abiathar'nung shunpilak.

³⁶ Thilak, yaiyei chanapawa napung'khni, Zadok'yei chanapawa Ahima-az heirou Abiathar'yei chanapawa Jonathan'khi yakou kalhonne klei. Heitoubi yaya watyilbine neiyei mayeklhakkur paorap nammaya keinungei washunyerlak.”

³⁷ Heisitoubi David'yei palui Hushai heikhi, Absalom'ne Jerusalem'ra hungchangei kheenrou akhi hungchangkur.