2 SAMUEL 14 - KHYINGEI PU'TLOU Bible (BSI)

Absalom'ne Jerusalem'ra Yenkallengkur

¹ Asinungri Krung David'yei ukningra Absalom'ya kalthi muniyurame touri Zeruiah'yei chanapawa Joab'ne mulhakurla.

² Heitounei ngamrou Joab'ne Tekoa'ra thimi heimalhetbine, bi heirouwei shingkhei napuiyawi khatya yenruiheikur. Heitoubi Joab'ne aya loushun, “Nangne asinung neilura phichun hupbaangbine khi-kanrelnaksi toukarsalak; neilura kou-shirekkhi teiphangmakne leibi, tlaini kounak tlaei maibongrouwei shal hiwurnei chapbi kleinaksi khi-kanrel toukarsalaklo.”

³ Heitoubi Krungei leinara wabine anungei atoubi wayunrou da. Heisitoubi Joab'ne anungei Krungei maibongra wayunnungei tlou rapya shunmatupikur.

⁴ Heisitoubi Tekoa'rei napuiya heiwine Krungei maibongra wachangbi, heitoubi ani thleira aiyei mairung shikhuplhakbi wa'kyun, “Krungwa, keiya bei trungpilaklo!”

⁵ Heisi tounarouri Krungne napuiya heiwinung loukngai, “Neiyei lhawai klah'ya kouwo?” Heirouri napuiya heiwini mallangbi loukyun, “Tanghakpane keiri trulmeiwi khat hoiyurame, keiyei shalri hiyurame.

⁶ Heirou neiyei shokpuiyawi keiyei chanapawa teinao napung'khni leikhou; heiya yakhu teinaoni phailoura chawurbi kalthi ngaalrilkur; heitoubi kheen heirouri bi heirou yakhu teinaoei kngaalya khampirou thimi hukhatkhi makkurbi, yakhu teinao khatpani khatpaya umtluiwurbi hatkur.

⁷ Heirou asinungri thilak, cheemkhur bommai nammane fyoumalnabi neishok puiyawi keidoura karhane yani atoubi yunleime: ‘Aiyei teinaowaya umhatpikur thimi heiwari kai hutra pithutlak, heiyanungri kani ayakhi ani hatkur teinaowa heiyei runghutra khlang lhakbi hatdurou, heitoubi aiyei cheemkhur shullamya toumitdurou.’ Heisitoubi yane keiyei cheemmaiya hattumwurbi, keishalwaei minya heirou aiyei shullamya tlaipangpalla leithungyermakne louthutdurou waiyouwurame.”

⁸ Heirouri Krungne napuiya heiwiya shun, “Neicheemra shallaka, neiyei tlou makatkur heinung'tlim keine pichar toupirouwa.”

⁹ Heirou Tekoa'yei napuiya heiwini Krungne loushun, “O keiyei Krung, mral heiri keiyei dourale, keipawaei cheemkhur-bommaiyei doura leiyurame, heiya Krungei dourale, neiyei Krungbom dourari koumralkhi makme.”

¹⁰ Heisi tounarouri Krungne loukyun, “Huhune neiyei doura karhane kyun yaowanungri, ayari keileinara heilhaklak, heiyanungri neidoura ani hanui kallengni yunchangmakrou.”

¹¹ Heirouri ani loumallangbi kyun, “Kringpibi Krungne neiyei Pu Dunpu, Umpuya ningthutpilaklo; heiyanungri thimi hatnei khlang lhakni thimi rapne keicha napawaya hatbine maangyerrou waiyounarei toudongkur maneroume.” Heitounei Krungne kyun, “Umpune mupilaksu, touri neicha napawayei lurei sham pumkhatchakhi thleira trulyerchangmakrou.”

¹² Heirouri napuiya heiwini kyun, “Kringpibi louningpilaklo, neishok puiyawi keine Krungnung tloulhang khat-khnicha yunneise.” Heirouri Krungne loushun, “Kou tlouwo yunlaklo, kei ningthiyeise!”

¹³ Heitounarou napuiya heiwine kyun: “Kouya tounei nangne Dunpuei thimi rapya karhane heinaksi lhouya rangkurawo? Kouweiyo toulanungri, Krungne heihakpa touwurnarou, aitam ai'mshaya klal dayerchawurla; ngamri ane miramra trukyulbi leikur aiyei chanapawa heiyakhi yenruimallengpimakne khouwurla.

¹⁴ Kouweiyo toulanungri, kari maangrou leiyurame; ngamri kari thleira shungthekkurbi hanui kallengni shukmarkum yamakkur yuinaksi hoiyurame. Heisiya hoiyanungkhi, Dunpune lhawaihakyari louwurmaklei; heiya ani kanungei ringnanungei lamya sheempibi, trukyulkur thimi heiya Krungei bom'rouwei khingthutkur toumaknungei marshikpilei.

¹⁵ Asinungri keine keiyei upawa Krungnung tlou awaya shunpirou wakurei ngamri, thimi rapne keiya touchiwurla, heitounei ngamrou neishokpi keine ukningra ningchakhou, ‘keiyei Krungnung shunlanungri keiyei buchakurya Krungne loutoupiroume toubi ningchabi kyunme.

¹⁶ Kouweiyo toulanungri, shunchakur heiwaya Krungne ninglhakpibi, neishokpi keiyale, keiyei chanapawaya Umpune kanungei piwurkhouna birouwei mangyernungei marshikbi klei thimi rapbei hutrouwei kaya kalpikurkhi kya touneime.’

¹⁷ Heirou asinungri neishokpi keine yunnilei, touri ‘keiyei upawa Krungei tloulhang rapne keiya malung damyerpilaksu; heineri, Dunpuei Thangring naksine, Krungne lhangaikhi-lhangaimakhi khintamrekya mu maninei toumani kleime. Heirou neiyei Dunpu, Umpune neiya kalhonpilaksu.’ ”

¹⁸ Heirouri Krungne loumallangbi napuiya heiwinung shun, “Kringpibi keine neinungei ngairou kyou tloubom rapya yulkhoumakne keinungei yunthutpilak.” Heirouri napuiya heiwini loukyun, “Keiyei Krungwane khyamakne ngaipilaklo.”

¹⁹ Heisi tounarouri Krungne kyun, “Neiyei kyun tloubomrap namma heiri Joab'ne shunmatubi neiya yunkyer nimakka?” Heirouri napuiya heiwini loumallang, “Keiyei Krungne ringliyenri, neiyei kngai tloubom rapya hunikhi loukhreichabi chimmakme toubi yunchangmakrou. Tanghakpane neishok Joab'ne tloubom heirapya yunthutpinanungei keiya chay pibine heiyilkurme; heirou tloulhangrap namyerwa heikhi ani keinungei shunmatupikurme.

²⁰ Lhoubomrap heiya lhangaiyernanungei toubi neiyei shok Joab'ne heinaksi lhou rapya toukurame, heiya keiyei Krungri Dunpuei Thangringei shingkhei-mukheinakni tlaipangpalla thukbi klei lhoubomrap heiri namma loumuchileime.”

Absalom Jerusalem'ra Yenkallengkur

²¹ Heirouri Krungne Joab'nung shun, “Thilak, asinungri neiyei kning lhouya touyerrouwa; ngam heineri chalaka, heitoubi kartlang douwa Absalom'ya yenruiheilaka.”

²² Heirouri Joab'ne thleira mai shikhuplhakbi, Krungya rikrai khrumkna mutkur, heitoubi ani kyun, “Angturi Krungne neishok keiyari kringpibi yapiwurlame touri muwurla; ngamri Krungne neishok keiyei shunchakurya lhoukhoine toupiwurla.”

²³ Heisi tounarouri Joab'ne kanthouwurbi Geshur'ra wakur, heitoubi Absalom'ya Jerusalem'ra yenruiheikur.

²⁴ Heisiya hoiyanungkhi Krung David'ne kyun, “Absalom'ne aiyei cheemra yenkallengbi leilaksu, heiya ani keiyei mairungya murilnungei yamakrou.” Heisi tounei ngamrou Absalom'ne aiyei cheemra hungchangbine leikur, heiya Krungei mairungya ani muphamakur.

David'le Absalom'ya Karyarilkyer

²⁵ Heiya kheen heirouri Israelrap nammaei hangra Absalom'naksi shakrung lhangairi dei hukhatkhi yaomak; aiyei lhangai-karyuikna heiwari homairouweine lu kaphane koukhatkhi shuimakne lhangai karyuikna. Heitounei ayari choune mathangpikur.

²⁶ Heirou Absalom'yei lurei sham heiwari beimakne chung, heitounei sham heiwa ritdachaknei ngamrou, kumserrei kum yenluilhakei kheenrou ani sham heiwaya ngoumathaikur. Heirou aiyei sham heiwari Krungkullei khrit holmarkhena hilthungni shekel macha-khni'yeimal khrit.

²⁷ Heirou Absalom'yei chanapawa napung-khyum, heirou chanapuiya napung'khat pukkhou; heirou aiyei chanapuiyawiyei minri Tamar toubi ung, a heiri shakrungkhi beimakne lhangai nangaka khat.

²⁸ Asinungri Absalom Jerusalem'ra kum'khnibil Krungei mairungya muphamakne leiwurkhoula.

²⁹ Heirouri Absalom'ne thimi malhetbine Joab'ya Krungei leinara watyilnungei wa'ungyerkur; heiya wa'ungkur heiwaya ani louchanthungpimakur. Heitounei ngamrou ani hanuikhi khnui tlungne wa'ungyerkur, heiya heiroukhi wapimakkur.

³⁰ Heitounei ngamrou Absalom'ne aiyei shok rapya ungloubi shun, “Thilak, Joabei phailou heiwari keiyei phailoule ri karchunrilbi klei; aiyei phailoura chanal tuklhakkhoulei, nani wabine phailou heiwaya mei shulhakwurlaka.” Heisi tounarouri Absalom'yei shok rapne wabi heiwaya mei shulhakkur.

³¹ Heirouri Joab'ne loukanthoubi, Absalom'yei cheemra wabine anungei wakyun, “Koutounei neiyei shok rapne keiyei phailouya mei shulhakkurro?”

³² Heirou Absalom'ne Joab'nung loumallangbi kyun, “Thilak, keine thimi heimalhetbi, neiya Krungei leinara heiyilbi, anungei, ‘Kounungei keiya Geshur'rouwei ungthutyerbi keicheemra leiyerkurro? Wa'ungthutmakne bi heirou leiyerlanungri duine keinungei lhangairoume,’ toubi wayunyer'nungei toubi neiya keine wa'ungyerkur. Heiya asinungri keiya Krungei mairungya murilyerlaka; heirou kounakpi keinungei hibomthuk mral louleiyanungkhi, keiyari ani hatlakasu.”

³³ Heisitoubi Joab'ne Krung'nungei Absalom'yei tloulhang rapya washunpikur; heirouri Krungne Absalom'ya wa'ungyerkur. Heisitoubi Absalom'ne Krungei maibongra wachangbi thleira mai shikhuplhakni kanellhakbi Krungya rikrai khrumkur. Heirouri Krungne Absalom'ya loumachuppikur.