2 SAMUEL 12 - KHYINGEI PU'TLOU Bible (BSI)

Nathan'ne David'ya Samkur

¹ Heirouri Umpune Nathanya David'nung heiyilkur. Heirou ani wabine David'ya shunbi, “Bongnung khukarthil khatrou napawa napung'khni leikhou; napawa khatpari laldun thimi, heirou khatpari kanring thimi.

² Heirou laldun napawa heiyeiri halrulkhi heirou yaorulkhi chungwane leikhou.

³ Heiya kanring thimi heiyeiri yaoshuncha nimakne deiri kouchakhatkhi khoumak. Heichaya ani lobine lhangaidui duntangkur; yaoshun heichari ale heirou aiyei chanao raple pulni tangmalnakur. Yaoshun heichane akou chaamal-mongmalnabi, aiyei pheikhnang doura pomtangbine, aiyei chanapuiya nakrimne leikhou.

⁴ Asinungri ramdeirei lamtla thimi napung'khatne laldun thimiyei cheemra mal khoine wa'tlungkur; heirouri cheempu heiwane aiyei mal heiwanungei aiyei halrulrei nimanung yaorullouwei manthutbi hatpimakkur; heiya heinung'tlimri ani kanring thimiwaei khatchatom dunbi klei yaoshun heichaya ani lunglouheibi, aiyei cheemra wa'tlungkur mal heinungei hatbine thungpikur.”

⁵ Heirouri David'ne heinaksi napawa heiwaya meithukbi malungkhapiwura, heitounei ani Nathanya shun, “Umpune ringliyenri, anikhi mulaksu; heinaksi thimi heiyari hatrou da.

⁶ Heitoubi ani yaoshun heiyei rungkhlangnung siruk-phali duine mallenglhakrou da; ngamri ane kringpikhei yaomakne heinaksi lhouya touwurkhoula.”

⁷ Heirouri Nathan'ne David'ya loushunkur, “Thimi heiwari nanghakme! Israellei Dunpu, Umpune atoubi shunpilei, ‘Israel rapbei Krung khoine neiya shirek teipikur heiwari Keime, heitoubi Saul'yei hutrouwei neiya kalthutpikur heiwakhi Keime.

⁸ Heirou Keine neiyei cheempuei cheem-keikhi heirou aiyei nu-cha rapyakhi neihutra pilhakwurbi silnapikurme, heitoubi Keine neihutra Israelkhi heirou Judahkhi pilhakwurlame. Heiyakhi bangmakanungri heiyakhi duine pilhakpiroume!

⁹ Koungammei nangne Umpuei tloulhang rapya manthapimakne Aiyei mithrilnara lhangaimak lhouya toukurrawo? Hittia Uriah'ya nangne raalshon'ne shathatyerwurla, heitoubi aiyei nuya neiyei nu khoine lunglouheila; heirou Uriah'yari Ammonia rapne hatdurpila.

¹⁰ Ngam heineri, asinungri, raalshon heiwari neiyei cheemmai'rouwei kanchai'khoumarou, ngamri nangne Keiya yapimakkura, heitoubi Hittia Uriah'yei nuya neiyei nu khoine louheila.’

¹¹ Umpune asitoubine shunlei, ‘Keine neiyei cheemmai-bommai hakrouwei neidoura yarilyermakne karhayerrouwa; Keine neiyei nu rapya neiyei mithrilna maibong'rouwei lunglouheibi, heitoubi yayari neiyei palui rapnungei pilhakrouwa, heitoubi yarapne neiyei nu rapya nunghangnung rkhum iptilpirouwa.

¹² Nangneri heiwaya muni loutouwurkhou, heiya Keineri Israelrap nammaei maibongra nunghangnung mitdodo kandangthut'yerrouwa.’ ”

¹³ Heirouri David'ne Nathan'nung loumallangbi, “Keine Umpuya karhane borhlhou touwurkhoulame,” toubine louyunthutkur. Heirou Nathan'ne kyun, “Umpunekhi neiyei borhya limwurbi louthutdurpila, heini asinungri nangri himakarou.

¹⁴ Heisiya hoiyanungkhi, heinaksi borh lhouya touwurbi nangne Umpuya manthamakurnei ngamrou, neinungei pukrou kyou chanapawa heiri shuimakne hirouwa.”

David'ne Chanapawa Khat Pukbi Hiwurthu

¹⁵ Heisitoubi Nathan'ne aiyei cheemranung shalkur. Heirouri Umpune Uriah'yei trulmeiwine David'nung pukpikur nao heichaya kalthi nayerwurla.

¹⁶ Heitounei ngamrou David'ne naochaei ngamrou Dunpu'nung shunchabine tlou ngaithikur, heitoubi David'ne cheemwaira hungchangurbi masantan chara yilbine thleira neilhakbi kalletchani leikur.

¹⁷ Heirou aiyei cheemkhurrei upa rapne aiyei pongra hungchangbine thleira neilhakbine kalletchabi leikurya kanthouyerna'nungei malhimkur, heiya ani kanthoubi yakou pulni chaak-an chamailaklo touri tekkhi yapimakkur.

¹⁸ Heirouri enini tlung tlainirouri kna nao heichari hiyura. Heirouri David'yei shok rapne naocha hiyurame tounei pao heiri anungei shunpingammakura; kouweiyo toulanungri, yaitamni, “Thilak, nao heichane ringbi leiyei kheenroukhi, ani kai kyunya ninglhakpimakur, heiya asinungri koutoubi kani anungei nao hiwurnei paoya hanui shunpiserouwo? Shunpilanungri aitam karhakcharouwame!” toubi yunrilkur.

¹⁹ Heiya David'ne aiyei shok rapne yadikni muni kartilbi yunkrilya mayeklhakwurla, heirouri David'ne nao heichari hiyurame touri ningmuwurla; heitounei David'ne aiyei shok rapnung, “Naochari hiyurako?” toubi kngai. Heirou yane, “Moi, a heichari hiyurame,” toubi louyunpikur.

²⁰ Heisi toubine David'ne thleirei kanthouwurbi, hak choumathaibi, shirek teibine phirul martlengurbi heitoubi kansambine Umpuei Pucheemra kachangbi khrumchakur; heirouri ani chaak-an bunarouri, anungei chaak-an marshikthutpibi ane chamaikur.

²¹ Heirouri aiyei shok rapne anungei kngai, “Neiyei toukur awaya kouwo? Neiyei cha heichane ringyei kheenrouri nangne chamak-maimakne chara yilbine chapni leikur, heiya asinungri naochani hikur hillouri, nangne kanthoubi chamaibine leikuranu!”

²² Heirouri ani loukyun, “Naocha'ne hibongnangri, keine chara yilbine chapbi leikhou, ngamri keine, ‘kounakpi Umpune keiya kringpibi, naocha heiri himakkhi huni kmu!’ toubine ningchakhou.

²³ Heiya asinungri a heichari hiyura; kounungei keine chara yilbi leiyeirou? Keine aya hanui kallengni ringyerchangroukhi nimak! Keine aiyei leinara charou tomngeiya, heiya aneri yenkallengkhoumarou.”

Solomonya Pukkur

²⁴ Heirouri David'ne aiyei nu Bathsheba'ya malhimbi malung damyerkur; heitoubi aiyei leinara polhakbi rkhum phitho iptilkur; heirouri Bathsheba'ne anungei chanapawa khat pukpiwurthu; heirou ani naomin Solomon toubine thulpikur. Asinungri Umpune ayari beimakne malungshikur.

²⁵ Heirou Umpune Thimkhui Nathanya heiyilpibi tlou manthunkur, heitoubi naomin heiya Jedidiah toubine thulpiwurthu, ngamri Umpune naochaya beimakne malungshipikur.

Hanuikhi Raal Kardourilthu

²⁶ Asinungri Joab'ne Ammonia rapbei chanao Rabbah'ya karhane raal youbi kardourilbine, lilkhoi khukarthilya luklouheikur.

²⁷ Heirouri Joab'ne thimi malhetbi David'nung paotambi, “Keine Rabbah'ya raal kardoubi maniwurla, heirou yaiyei tuymak ruira klei khulil rapkhi raal manibi lukloulame.

²⁸ Ngam heineri, asinung raalluirap nammaya markumbine rungbom sheemlaka, heitoubi khukarthil heiwaya raal dabine luknanungei marshiklaka; heisi nimanungri heiwaya keine lukloubine, heiwaya keimin thulbangpikurkhi kya.”

²⁹ Heisi tounarouri David'ne thimirap nammaya khumtilbine heitoubi Rabbah'ya karhane wachangbi raal kardourilkur, heitoubi khukarthil heiwaya maniwurbi lukloukur.

³⁰ Heirouri David'ne yaiyei Krungei sina lukhup heiwakhi Krungei lurei lhukloukhei; heirou lukhup heiwari kilo somthumle phangamal khrit, heirou heiyei doura manklu thlung kwaarni mansambang; heitoubi lukhup heiwari David'ne aiyei lura makhuplhakkur. Heirou ani khukarthil heirouwei putchei-lalthum rapkhi chungwane yenmarkumheikur.

³¹ Heirou David'ne bi heirou louklei thimi rapyakhi raal yenmaniheikur; heitoubi ya'rapya ani heengbaina horai shinyerbi, thirchik shinyerbi, heirou rei shinyerbi lhou churnayerkur, heitoubi chiekkhi iknayerkur. Heisitoubi Ammonia rapbei khukarthil kantangra thimi rapya heisidik watlhou churnayerkur. Heirouri Davidle, aiyei thimirap nammane Jerusalem'ra yenkallengkur.