2 SAMUEL 11 - KHYINGEI PU'TLOU Bible (BSI)

David'ne Bathsheba'ya Kungloukur

¹ Heirouri manthral-neilangei kheenrouri asitoubi thukkura, touri Krung rapne kartilbi hutdangrilkur, heitoubi raalbomra raal kardourilnungei wathukkur; kheen heirouri David'ne Joab'ya aiyei shok raple heirou Israellei raalluirap nammaya raal chanungei watyilwurbi, heirou yani Ammonia'yei chanao rapya raal dabine kontumpikur, heitoubi Rabbah khukarthilya raal maniwurbi lukloukur. Kheen heirou David'ri Jerusalem'ra heileithungkur.

² Heirouri nungkhatnuiyei rawainung David'ne aiyei rkhum dourei kanthoubine Krungei shangkai doura marthee langbine ramthrilyeinung, napuiya khatne hakchoubi kleiya ani yukmulhakkur; heirou napuiya heiwiri shakrung beimakne lhangai, heirou thiyeinungkhi karyuikna.

³ Heisi tounarouri David'ne thimi malhetbi napuiya heiwiyei ngamrou huwo toubine ngaiphayerkur. Heirouri napawa khatpani, “Napuiya heiwiri Eliam'yei chanapuiya, Hittia cheemkhurrei Uriah'yei nu, Bathsheba nimakeiko?” toubine loukyun.

⁴ Heirouri David'ne thimi malhetbine aya wa-ungyerkur; heirou ani David'yei leinara wachangei kalnang, aya rkhum iptilpikur.(Kheen heirouri Bathsheba msha marthingtirhui). Heihillou ani aicheemra kallengkur.

⁵ Heiya kheen beiyei hillouri Bathsheba nao urkanthouwura; heitounei ani David'nung pao manthunbi, “Keiri nao urwurame,” toubine shunkur.

⁶ Heirouri David'ne thimi heimalhetbi Joab'nung pao washunyerkur, “Hittia Uriah'ya keileinara bei yenyillaklo.” Heisi tounarouri Joab'ne Uriah'ya David'yei leinara yenyilmallengkur.

⁷ Heirou Uriah'ne David'yei leinara hungtlungei kheenrouri, ani Joabei raal ruinei lhoule, raalluirap, heirou raalbomei ngamrou pao loungaithikur.

⁸ Heirouri David'ne Uriah'ya shun, “Neicheemra shalbine hut-ho choumathaibi mathrillaka.” Heisitoubi Uriah'ne Krungei cheem'rouwei shalthutkur; heirou aiyei hilnamni Krungrei chanung-mainungei tha marshikbine hutthulput khoine heithulpikur.

⁹ Heiya Uriahri aicheemra yongtlungmakne, Krungkullei palshung shumtrumra, aiyei Krungei shokrap nammale kalhonne ipbi leiwurkhou.

¹⁰ Heirouri yani pao heiwaya David'nung, “Uriahri aicheemra shalmakurame,” toubine shunpiwurla. Heitounei ngamrou David'ne Uriah'ya shunkur, “Nangri ramra chabine yenkalleng nimaka? Heiyanungri koutounei neicheemra hungtlungmakne leikurawo?”

¹¹ Heirouri Uriah'ne David'nung loumallangbi, “Mardingpina Theengkung'le, Israel raple, heirou Judah'ri khuiluphiyei cheemra heileithungbi, heirou Joable, upawaei raallui rapri ramhang-phaikarra rungbom sheembine leithungleihui. Heiyanungri keine cheemra kallengbine, chaak-an chamaibine, heirou keiyei nule pulni ipkalhonbine leiserouko? Neiyei rongchanni ringliyenri, Keiri kouniroukhi heinaksi lhouri toumakroume,” toubi kyun.

¹² Heirouri David'ne Uriah'ya shunbi, “Angtukhi bi arou heisi yukleilaka, heitoubi keine neiyari ninga tlainirou shalyerrouwa.” Heisitoubi Uriah'ne heiyei tlaini'le, heithangei tlainiroukhi bi heitamrou heisi leiwurkhou.

¹³ Kheen heirouri David'ne aya unglhakbine, aiyei pongra pulni chaak-an chamaiyerkur; heitoubi David'ne Uriah'ya tulkhi pimong'malipkur; heirouri rawainung ani wathukwurbi aiyei rkhum doura Krungei shok raple pulni iplhakkur, heiya ani aicheemra hungchangkhou'makura.

¹⁴ Heitoubi ninga thangei tlainirouri asitoubi thukkura, touri David'ne Joab'nungei chethi khat mayebine heitoubi chethi heiwaya Uriah'yei hutra manthunthungkur.

¹⁵ Heirou ani aiyei chethira asitoubi mayebine kyun, “Uriah'yari thuithikur raalbomei maibong lhangra louyillhaklak, heitoubi nani airouwei kantlatdurlak, heiyanungri aya hatdurbi hithunglakasu.”

¹⁶ Heirouri asitoubine thukkura, Joab'ne khukarthil heiwaya luknanungei marshikeinung ani thirochabine Uriah'yari thuithikur sireikhei raalluirap louleina maibonglhangra hillhakbi wachangyerkur.

¹⁷ Heirouri khukarthil heiyei thimi rapne louwathukbine Joab'kou raal kardourilkur; heirouri David'yei raalluirap thakhi hiyura, heirou Hittia Uriah'khi bi heitamrou hikur.

¹⁸ Heirouri Joab'ne thimi malhetbine David'nung raalpao hungshunyerkur.

¹⁹ Heirou ani paokyen thimi heiwanung asitoubi shunmatuthungkur, “Nangne Krungnungei raalpao heiwaya namyerwa shunchilanungri;

²⁰ heihillouri kounakpi Krungne loumallangbi neinungei, ‘Koutounei nani khukarthil heiwaya heinak knakni wachangbi kardourilkurro? Yane raalpal dourei malaa'chei loukaapthutroume touri nani ningmumakko?

²¹ Heisi toubine Jerubbesheth'yei chanapawa Abimelechyakhi yani hatpikur nimakka? Ayari Thebez'ra napuiya khatpini raalpal chouna dourei chakhri thlungtum khat khingsundabi, lura khingshawurbi hikur nimakka?’ toubine louyunlanungri, heirou nangne, ‘Neiyei shikrui Hittia Uriah'khi hiyurame,’ toubine nangne louyunlak.”

²² Heisitoubi pao-ur thimi heiwane shalwurbi, heitoubi Joab'ne anungei yunmatupithungkur tlourap namma hungshunpikur.

²³ Heirouri pao-ur napawa heiwane David'nung hungbine, “Ammonia rapne kaya karhane louwathukbine phaikarra kaya raal loukardoukur, heiya kanekhi yaya raal hullouheibi khukarthillei palshungbil hulmallengkur.

²⁴ Heirouri yani raal paallouwei malaa'chei loumalhetthutbi, neiyei shokrap thakhi hiyura, heirou Hittia Uriahkhi hiyurame,” toubine paotamkur.

²⁵ Heirouri David'ne pao-ur thimi heiwanung loushun, “Nangne Joab'nung atoubi paotamlaka, ‘Heiwane lhawai lahmakniyasu, ngamri raal kardourillo touri khatnekhi hatrou, heirou khatnekhi louhatrou; heiwari youkna. Heiya aiyei raalbomya luknanungei krakni kardourillaksu, toubine washunpilaka.’ ”

²⁶ Asinungri Uriah'yei nu heiwini, aishalwa Uriah heiri raalbomra hiyurame tounei paori mayekkurla; heitounei ngamrou ani aiyei shalwanung'tlim khi kanrelbi chapkur.

²⁷ Heirou aiyei khi kanrelnei trum hei yenluilhakkur hillouri, David'ne thimi heimalhetbi aya Krungkulla yenruiheikur, heitoubi David'ne ayari nu khoine loulhakpikur. Heirouri ane chanapawa khat hungpukkur. Heiya David'yei touthutkur lhouthuk heiwari Umpuei mithrilnarari beimakne lhangaimak machinkna lhoubom khat hoikur.