2 SAMUEL 10 - KHYINGEI PU'TLOU Bible (BSI)

Ammon'le Aramya Raal Manekur

¹ Heihillouri asitoubi hungthukkura, touri Ammonia'yei Krung hikur heirouri, aiyei chanapawa Hanun'ne aiyei rungkhlangra Krung hunghoikur.

² Heirouri David'ne kyun, “Keine Nahash'yei chanapawa Hanun'ya, aiyei pawane keinungei kringpi kheiya mutpiwurkhou heinaksine, keinekhi anungei kringpi kheiya mutpirou.” Heisi tounarouri David'ne aiyei shok rapya heimalhetbi, aiyei pawa hikurya nungwaimaknei kanrel tlouya washunpiyerkur. Heiya David'yei shok rapne Ammonia rapbei ramra wa'tlungei kheenrouri;

³ Ammonia rapbei lhou'urpu upa rapne yaiyei ruipipu upawanung touri Krung Hanun'nung pao tambi, “David'ne neiyei pawaya rikrai khrumkname toubine, aiyei shok rapya watyilbine, neiya khi-kanrelnarei malung damyernanungei heimalhetkur heiwaya neiyei khalnarari chimroume touneiko? Heihakpari nimakroume. David'ne aiyei shok rapya heiyilbine neiyei khukarthilra muni changbi raalmucha khoine thikulnanungei heimalhetkur nimakrouko?” toubi kyun.

⁴ Heisi tounarouri Hanun'ne David'yei shok rapya manyerwurbi, heitoubi yaiyei khamul pangkhatsol ngoukukpikur, heitoubi yaiyei shamb rapkhi shintlakbil kaphane threltatdurbine, heitoubi yaya louhilmallengkur.

⁵ Heirouri yani yenkallengbi, heiyei paoya David'nung hungshunpikur, heirouri yaya wa-unglhaknungei David'ne thimi heimalhetkur; ngamri thimi rapne yaya thuithine loumareknabi rikrai phayerkur. Heirouri Krungne yaya loushunkur, “Naiyei khamul shaangcheibongyen Jericho'ra heisi yukleiriya, heitoubi khamul pukbi shaanganung nane shaalniyalo.”

⁶ Asinungri Ammonia rapne, yani David'ya toumalungkhawurlame touri yaitamni ningmukur heirouri, Ammonia rapne thimi malhetbi, Beth-Rehob'le, Zobah'rei Aramea touri Syria rapya raal trungyernanungei toubi, raallui lishing somni, heirou Maccah'yei Krungeikhi raallui lishing khat, heirou Ish-Tob'rouweikhi raallui lishing chiple-khni waneekloukur.

⁷ Heirouri David'ne heiwaya mayeknarouri, ani Joab'ya, sireikhei raalluirap nammale toubi marshikbine heiyilkur.

⁸ Heirouri Ammonia rapne wathukbi, yaiyei khukarthil palshung rouweine lingshaang riengbine raal marshikbine louleikur; heitoubi Zobah'le, Beth-Rehob'rei Aramea touri Syria raple, Ish-Tob'le, heirou Maccah'rei raallui rapne ramhangra yaitam lingshaang riengbine louleikur.

⁹ Heirou asinungri, Joab'ne raal heiwari aiyei maibong-lhangrakhi heirou hil-lhangrakhi mayungthatbine leiyurame toubi muwurnarouri, ani Israellei raallui sireikhei lhouwarap nammaya khalthutloubine, heitoubi Aramea touri Syria rapya raal kardourilnanungei lingshaang khoine heimalhetthutkur.

¹⁰ Heiya heirouwei maleithungkur raallui rapya ainaowa Abishai'yei hutra ani silnakur, heitoubi Abishai'ne yaya Ammonia rapbei maibongra karhane lingshaang riengbine raal marshikkur.

¹¹ Heirouri Joab'ne shun, “Kounakpi Aramea rapne kaya raal manerou youwanungri, nangne keiya raal pangrou da; heiya kounakpi Ammonia rapne neiya raal manerou youwanungri, keine neiya raal hungpaangpirou.

¹² Chimakne ukningra raangalo! Kouweiyo toulanungri, kani kaiyei thimi rapnung'tlim, heirou kaiyei Dunpuei Krungkulnung'tlim kani krakni raal kardourillou da; heirou Umpune Aiyei mit'thrilnara lhangairoume touya heisi toupilaksu.”

¹³ Heisitoubi Joab'ne ale chakalhonkur raallui rapne Aramea rapbei maibongra karhane raalbomra heitonlhakkur, heirouri yani aiyei maibongra loutrukkur.

¹⁴ Heirou Ammonia rapnekhi Aramea rapbei loutrukurya munarouri, yanikhi Abishai'yei maibongrouwei trukkurbi, heitoubi khukarthil rilla loutruklhakkur. Heirouri Joab'ne Ammonia raple raal kardourilnarei yenkallengurbi Jerusalem'ra hungchangkur.

¹⁵ Heirou Aramea rapne, Israel rapne yaya raal maniwurlame toubi munarouri, yaitamni hanuikhi pulni ungmarkumbi kartilwurthu.

¹⁶ Heitoubi Hadadezer'ne pao-ur thimi malhetdurbi Euphrate kung ralbi klei Aramea rapya wa'ungyerkur, heitoubi yani Helam'ra wakartilkur; heirou Hadadezer'yei raallui upa Shobach'ne yaya upa khoine raal ruipikur.

¹⁷ Asinungri pao heiwaya David'nung shunpikur heirouri, David'ne Israellei raalluirap nammaya ungmarkumkur, heitoubi Jordan kung heiralthutdurbi Helam'ra wadakur. Heirouri Aramea touri Syria rapnekhi raallui lingshaang riengbine David'ya raal loukardourilkur.

¹⁸ Heiya Aramea rapri David'yei maibongra loutrukkur, heirouri David'ne hulbi chanthungbine Aramea'yei sapuk kaaritung thimi macha'enile, hoei raallui rapya lishing somli hatthungkur; heirou yaiyei raallui upa Shobach'khi hatdurbi, bi heitamrou hikur.

¹⁹ Heirou Krungrap nammanekhi, heirou Hadadezer'yei shokrap nammanekhi, Israel rapne yaya raal maniwurlame toubi mukur heirouri, yani Israel rapnung rochawurbine yarilkur, heitoubi yaidaakra watlhou toubine leikur. Heisi tounarouri Aramea touri Syria rapne hillouri hanui kallengni Ammonia rapya raal trungammakkur.