2 SAMUEL 1 - KHYINGEI PU'TLOU Bible (BSI)

David'ne Saul Hiwurnei Pao Mayek

¹ Heihillouri asitoubi hungthukkura touri, David'ne raalbomra Amalekia rapya hatbine yenkallengei kheenrou, Saul hiwurnei paoya mayeknarouri, David'ne Ziklag'ra tlaini khnini karyimbi leiwurkhou.

² Heirou khyumni tlung tlaini heirouri asitoubine hungthukkura touri thilak, napawa khatne Saul'yei rungbom'rouwei aiyei raal-shamb rapkhi cheetchatni, heirou aiyei lura rahuikhi kyaoni yentrukthutkur. Heirou ani David'yei pongra hungtlungei kheenrouri ani David'yei maibongra kanel'lhakbi thleira khuplhopni kanel'lhakbine khrumkur.

³ Heirouri David'ne aya loukngai, “Nangri koulhangrei leibi hungo?” Heirou ani loumallang, “Keiri Israel rapbei rungbomrei kartleithutkurme.”

⁴ Heirou David'ne anungei loushun, “Raallei lhouri kousitoubi leileiyo? Keinungei bei yunpilaklo!” Heisi tounarouri ani David'nung loukyun, “Thimi chungni raalbom'rouwei trukthutdurchiya, heirou Thimi chungwakhi raalbomra kanelwura heirou hiyura, heitoubi Saul'le aiyei chanapawa Jonathan'khi hiwurchiya.”

⁵ Heirou David'ne anungei pao hungshunpikur kartlang douwa heiwanung loukngai, “Saul'le aiyei chanapawa Jonathan yakhuntakhi hiyurame touri nangne koutoubi kmu?”

⁶ Heirouri anungei paotamkur kartlang douwa heiwane anungei atoubi loumallang, “Keine tinrimrimni Gilboa Lhungdoura kakanarouri, heirou thilak, bi heirou Saul'ne aiyei raalchei nanchabine louklei, heirouri thilak, sapuk kaari raple, heirou sapuk'tung raallui rapne aihilla kalni hulbi knakni chanthungkur.

⁷ Heirouri ani loukallekthinarou keiya loumubi, ani keiya ungbine loukyun, heirouri keinekhi, ‘Kouwo, kei leileime,’ toubi loumallangkur.

⁸ Heirouri ani keinungei shun, ‘Nangya huwo?’ Heirou keine anungei, ‘Keiri Amalekia'me,’ toubi louyunpikur.

⁹ Heirouri ani keinungei loushun, ‘Kringpibi keipongra wamayungbi heitoubi keiya shaat'hatdurpilak; kouweiyo toulanungri keiri lahwachaknei mrimura, ngamri keiyei lhawai leileihui.’

¹⁰ Heisi tounarouri keine aiyei pongra wachangbine, aya shaat'hatkur, ngamri ari kanellhakura'nungri hanui kanthoubi ringmakaroume touri keine ningmukur. Heisitoubi aiyei lurei loukyao Krung lukhup heiwale, heirou aiyei malungpakrei loukyao malungpak'khang heiwaya keine lhuklouheibi heitoubi keiyei upawa neinungei yenpikur awariya.”

¹¹ Heirouri David'ne aiyei phirulya shinbine heirapya namma threlchaalkur, heirou akou louklei thimirap nammanekhi heisitoubi yaiyei shamb rapya threlkur.

¹² Heisitoubi yani Saul'le aiyei chanapawa Jonathan yakhu pachanung'tlim lhawai klahne chamak-maimakne chara yilbi rawai phane chapni khi kanrelkur, heirou Umpuei thimi rapnung tlimkhi heirou Israel rapnung tlimkhi lhawai lahpikur; kouweiyo toulanungri yarap heiri raalshonra hiwurchiya.

¹³ Heirou David'ne anungei paotamkur kartlang douwa heinungei shun, “Nangri koulhangrei thimi?” Heirouri ani loumallang, “Keiri Amalekia napawa khatdei chanapawa.”

¹⁴ Heirouri David'ne anungei shun, “Kouya tounei nangne Umpuei khalthutbi shirek teipikur Krung khatya neihut lhangthutbi hatmaniyo?”

¹⁵ Heirouri David'ne kartlang douwa raprei napung khatya ungloubine shun, “Chalaka, heitoubi aya hatlaka.” Heisi toubine aya hatkur.

¹⁶ Heirouri David'ne anungei shun, “Neiyei hee heiri neidoura yongdakura, ngamri neimurni, ‘Umpuei shirek teipikur thimiya keihutni hatkurme,’ toubine yunthutdurla.”

David'ne Saul'le Jonathan Yakhu Pachanung'tlim Kanrilkur

¹⁷ Heirouri David'ne Saul'le aiyei chanapawa Jonathan yakhunta'nungtlim kanrel-laa sherbi lhawai klah mutkur.

¹⁸ Heitoubi ani yaya shunbine Judah'yei chanao rapnungei kanrel-laa marnopina'nungei shunpikur: thilak, kanrel-laa heiwari Jashar'yei lailikra mayelhakbine khoulei:

¹⁹ “O Israel, neiyei thang lhangairi, naiyei lhungdou bi rapra hatdurpilame! Koutoubi Lhouwa rapya raalbomra kanelyerkuro!

²⁰ Gath'ra pao heiwaya shunthutpimaklo, heirou heiyei pao heiri Ashkelon'yei khullamra paothutpimaklo; Nimanungri Philistia'yei chanapuiya rapne mayeklhakbi langthourou, heirou murdanmak thimi rapbei chanapuiya rapne haraobi laonarou.

²¹ O Gilboa Lhungdourap, Neidoura rdai chumakniyasu, nungkhi romakniyasu, heirou heengna-ronakhi katbomakniyasu; Kouweiyo toulanungri, bi heirou lhouwa rapbei chung rapya marmokyerkurme, Saul'yei chungkhi, bi heirou shirek teiphangmakurme.

²² Yeekna thimi rapbei heerouwei, heirou mantrang thimi rapbei sharung'rouwei, Jonathan'yei malaa'taak heiwari hangwalni yenkallengmak, heirou Saul'yei raalshon heiwakhi hangwalni yenkallengkhoumak.

²³ Saul'le Jonathan yakhu pachari khatle khat beimakne malungshirilbi karbairilkhoumak, heirou yakhu pachani hiyei kalnungkhi karbaikhoumakne himalnakur; Yari malaangyakhi duine kyaang, heirou yari yangkongyakhi duine mantrangkhou.

²⁴ O Israellei chanapuiya rapbo, Saul'nungtlim chapbalo; Ane nayari thang'allei phi'mraoni kansamyerkhou, heirou naiyei shamb doura sinayei thang'alni sambaangpikhou.

²⁵ Koutoubi lhouwa rapne raalbomra kanelkuro! Jonathan'ya naiyei lhungdou chounara hatdurpila.

²⁶ Keiri neinungei'tlim keilhawai lahwurame, keiteinao Jonathan! Nangri keinungei beimakne malungamkna khat hoikhoume. Neiyei keiya malungshipikur kngak khat khoine, napuiya khatdei malungshiyakhi duihoume!

²⁷ Kousitoubi Lhouwarap heiri raalbomra kanelkuro! Heirou kousitoubi yaiyei raal hutshurap heiri maangkurawo!”