2 PETER 3 - KHYINGEI PU'TLOU Bible (BSI)

Puni Yenkallengna'nung Tlou Kantompi

¹ Keiyei paluirap, awari keine nanungei khnui tlungei mayekur chethi. Heitoubi chethi khintam'rekra keine naya anaksi tlou rapya ningthutyerbine naiyei khyingei ukning rapya thoubangpilei.

² Bongei kheen kounakei maibongrei khying thimkhui rapbei yunthutkhou tlou rapya, heirou kaiyei paocha thimi rapne nanungei piwurkhou Puei heirou Kalpipuei Chaylam rapya keine naya ningthutyernilei.

³ Lamkrini nane mulhakbom thuklei touri, luilhakrou younei tlaini rapnungri yaiyei chaanrou sharungei kningni kul chalphopbi klei thimirap thakhi hungthukheirou.

⁴ Heitoubi yane naya laonabi heirou asitoubi tlou ngaiheirou, “Ane yongeiroume toubi tlou kantomkhou nimaka? Heiyanungri asinungri Ari kourangawo? Kaiyei nutar-patar rapri hiwurchiya, heiya tlaipang sheemtirrei waiyoubi angtu rampha koukhatkhi kartlikmakne khatnakdik leileihui.”

⁵ Ngamri awari yane anaksi chimmei lhouya tanghakne mupimakeise toubi mupimakur, touri kheen kounakei maibongrei waiyoubi Dunpuei tloulhangne Thangmun heirou tlaipangpalya sheemthutkur. Tlaipangpal awari yuirouwei heirou yuiyei ngamne sheemthutkur.

⁶ Heitoubi yuini heirou yuitangne khman tlaipangpalya maangyerkur.

⁷ Heiya angtu ramphane Thangmunle tlaipangpal awari Dunpuya shak mumak thimi rapya pichar toubi meine maangyernanungei tlaini hungbongyen Aiyei chaylamne marpeibi khoulei.

⁸ Heiya keiyei paluirap, tlou awaya nane malumpimakniya, touri Dunpuei bomrari nungkhatnuile kum lishingkhat heiri koukhatkhi kartlikril makni khatnakdik hoilei; heitoubi Anungeiri khintamrek heiri khatnakdik hoilei.

⁹ Heirou thimi thaei ningchanakne, Dunpuri Aiyei kantomkur tlou heiya tapni touheirou touri maklei, heiya Ari nanungei'tlim kanthrampi khei, ngamri Aneri thimi hukhatyakhi maangyernimak, heiya thimi namyerwaya yai borh'rouwei kallekthutyerni.

¹⁰ Heiya Dunpuei Tlaini heiri mucha thimi'nakne yongeirou. Heitoubi heiyei Tlaini heirouri Thangwanram nammane kartlinkur hou khatle kalhonne traiwurheirou, heirou nungthoura kleirap namyerwa heiri meini kaangtlumbi maangurou; heirou tlaipangpal'le heirou heiyei dourei klei put namyerle kalhonne maangurheirou.

¹¹ Heiyanungri, heinaksi putcheirap namyerwa heiri heisitoubi maanganungri, nari kounaksi thimirap hoiroulei? Heiyanungri kaiyei chaanri Dunpu'nung khyingei makatkur chaan khoine leirou da,

¹² heirou nane Dunpuei Tlainiya karngeibi klei heinakni, nane lhangaiya toubi khrangni yongyernanungei toulak-ngamri nungthouri meini kaangtlummurbi maangyerheirou, heirou nungthourei kleirap heikhi meithlanne leobi yaawurheirou.

¹³ Heiya kari Dunpuei kantomkhoupi ran Thangmunram, heirou ran tlaipangya, heitoubi bi heirou chim thimi rapne thrungbi leirou youna bom heiwaya kane karngeibi leilei.

¹⁴ Heisitoubi keiyei paluirap, heinaksi Tlainiya nane karngeibi louklei heini Dunpuei mit'thrilnara khying thimi heirou paapmak thimirap hoinanungei, heirou Akou kyingni kalhonbi leinanungei nane lhangaiya toubine leiyalo.

¹⁵ Heirou kaiyei malungshina Paul'ne anungei Dunpune pikur shingkheiya yrengbine nanungei mayepikur heinakni, Dunpune naya kalpi phayernanungei Pu Jesuni nanung'tlim klah doupikur heiwaya thilak.

¹⁶ Heirou Paul'ne nanungei chethi mayeyeinung, aiyei chethi kantangrou Dunpuei pikur shingkhei heiya tloulu khoine mintlangbi mayekur. Heingamei aiyei mayenara tloubomrap thari mulhaknungei beimakni klu, heirou thimi rapne heinak rapya mu'tlungmakne, Khyingei Lailikbom deirei'nakni, klalne mallengthutbi leilei. Heisitoubi yane yaidoura maangyernanungei hoiyerkur.

¹⁷ Ngam heineri, malungshi'kna paluirap, nane lamkrine mubi, klallei lhoutou thimi rapne heirou chorit naimak thimi rapne naya lam lehyerbi kai uklumnarei kanelyermak'nungei mukheini leiyalo.

¹⁸ Heiya Kalpipu Jesu Christaei kringpi kheiyei bomra heirou Aiyei shingheina rilla karyomne tangbaang-choubaangniasu. Anungei klui naimakei luinaimak thangya alniyasu. Amen.