2 PETER 2 - KHYINGEI PU'TLOU Bible (BSI)

Klallei Paocha Thimirap

¹ Bongnungkhi thimi rapbei hangra klallei paocha thimirap hungthuk'khou, heinakrimne angtukhi kaihangra klallei paocha thimirap hungthukheirou. Yane maangyernanung chimmakei shunthutpi tlou rapya marnopieirou, heirou yaya lhukthutpikur Puya yapimakrou, heitounei ngamrou yaitamni maangyernanungei lhou rapya yane touthutdeirou.

² Heiyanungkhi, thimi chungne yai chorit naimak lhoutounei lamra chanthungeirou; heirou yai touthutkur heiyei ngamrou, thimi deini Chim lamyei ngamrou manthapimakni lhangaimakya yunrou.

³ Heinaksi khramtang thimiyei lhou doura klallei marnopi pu rapne nanung thimiyei sheemthutkur wariya yunbine yai tungchananungei touheirou. Asinungri kheen kounakrei waiyoubi Pichar puni yaidoura marshikbi leiyura, heirou yaya maangyerou kyou pu heiri iplhakmakne ngaakbi leiyura.

⁴ Dunpune Thangring rapyari, yane borh touwei kaalnung khaiwurkhoumak, heiya yayari meikhurra khinglhakurbi, kmehyei bomra thirrui msuiphopbine, heitoubi kluiyei Pichar tounei Tlainiya ngaakyerbi khoulei.

⁵ Heitoubi Dunpune bongei khman tlaipangpalya khaikhoumakni, Dunpuya shak mumak thimi rapbei doura yuitang thukyerbi dumphopyerkur; heitoubi Ane chimmei paolaa shunthutkhoupi thimi napung khatyale heirou thimidei napung eni heiyakhi kalpikur.

⁶ Dunpune Sodom'le Gomorrah khukathil rapya meini kaang'taakyerbi pichar touwurbi maangyerkur; heisitoubi hillou Dunpuya shak mumak thimi rapbei doura kouya hungthukrouwo toubine mu'kna khoine mutpikur.

⁷ Heitoubi Ane chaylamya hilthungmak thimi rapne chorit naimakei lhou tounarei lhawai lahyerkur tharmu klei Lotyakhi kalpikur.

⁸ Heirou lhangai napawa heini yai hangra leiyeinung, nungkhat'nuinuiyei ani yaiyei lhangaimak lhou toukur heirapya munarou, heirou mayeknarouri aiyei lhawai beimak klahni doubi leikur.

⁹ Heineri tharmu klei thimiya klah-knang bom'rouwei kousitoubi kalpirouwo, heirou lhangaimak thimi rapya Pichar tounei Tlainirou kousitoubi tanti pirouwo touri Dunpune kmu;

¹⁰ Tlaini heirouri lilkhoine yai sharungei maduya pilyerbi klei thimirap heirou Dunpuei pu hoipibi kleiya lhouhoipimak thimi rapya tanti phayerrou. Heinaksi chimmakei marnopi thimi rapne Thangmunrei klei thang'allei pu rapyakhi rikrai khrumknaya mutmakni, koukhatkhi chimakni thuithiyei tlouni khrangni yunpilei.

¹¹ Heiya klallei marnopi pu rapyakhi duiyei kal heirou mantrang Thangring rapnekhi Dunpuei maibongra yai doura koukhatkhi klallei tlouni pichar toukhoumak.

¹² Heiyanungkhi heinak thimirap heiri kul chalphopna'nungei heirou hatdurbi maangyernanungei ramyaa naksine pukwurbi, heirou ui-waa naksine, yane koukhi muheimakni lhangaimak tlouya yunbine leilei. Heini yayari ramyaa naksine maangyerheirou.

¹³ Heitoubi yayari yai klah dayerkur heinung'tlim klah-man khoine yayakhi klah-mrim nangyerheirou. Nunghangnung yane hakrao nungkngaiyei lhouya toubine, sharungya pilyerna'nungei ukchakyatom phananungei, kai hangra rikrai mumakni heirou madupha tangni chamai'malnabi, naya minamni lhou touwurla! Heineri yari borh thimi heirou klal thimirap.

¹⁴ Heirou yaiyei thilhakniri dei koukhatkhi nimaklei, heiya chorit naimak napuiya rapyatomni; heitoubi yai borhyei ukchakri kouniroukhi kropil naimaklei. Heitoubi yane shul thimi rapya chaangra ruilhakpi. Yaiyei ukningrap heiri madupha tangei lamra marnopibi leilei. Heirou yari Dunpuei manchona daakra leiyura!

¹⁵ Yane lam'yengna lakurkhoubi chanarou lam kanwaiyura; heiya yari Beoryei chanapawa Balaamyei ruina lamra chanthungura, ngamri ari lhangaimak lhouya tounara tuy pha'kni,

¹⁶ heiya ayari aiyei borh lhourouwei tanti phayerkur; heitoubi aiyei tlou thukmak gadhani tlaipang tlouni yunbi thimkhui heiwayei yuntlungmak lhouya toudongkur.

¹⁷ Heinaksi thimirap heiri yenheepkur yuiput naksi; heirou lhimnung marthee hangrei ramei naksi; Dunpune klui naimak khyukni kmeh bomya yanungei'tlim marshikbine khouwurla.

¹⁸ Ngamri yane yuntlungmakei tlouya tangchani yunthutdurla, heirou yane sharungei madu lhou rapne chaang'kambi tlaipangrei klal bom'rouwei kartleikur thimi rapya manlhakna'nungei toubi leilei.

¹⁹ Yahakpani maangnanungei lhoura shok hoirerikhi heinaksi thimi rapya kning tlungne leiyernanungei yane tlou kantomlei. Ngamri thimi khatni aiyei doura maniyerkur heiwani ayari shok hoikyer.

²⁰ Kouweiyo toulanungri thimi rapne kaiyei Pu heirou Kalpipu Jesu Christaei shingkheiyei ngamne tlaipangpallei lhangaimak lhourouwei kartleiwurbi, heitoubi yane hanui heinaksi lhangaimak lhoura kallenglhakbi yai doura pu khoine leiyerthulanungri, heinak thimirap heiri hungdongna heirouri haalleiyakhi duine lhangaimak thimirap hoirouwa.

²¹ Ngamri heinaksi thimirap heinungeiri Khyingei Chaylamya piwurbi, heiya mukhoubi hil kallengurnung tlimri, chimmei lamya tekkhi mukhoumakni duine lhangairou.

²² Heitoubi yanungei thukkur lhourap heini muyerlei touri anaksi yailim ari chimlei: “Uini aiyei pawurkhounara hanui kallengni malikthu; heirou hogni aiyei karbulkhouna thleibul hangra karbulthunungei hanui kallenglhakthu.”