2 PETER 1 - KHYINGEI PU'TLOU Bible (BSI)

¹ Jesu Christaei ruishik hoibi klei heirou Aiyei paocha thimi Simon Peter keirouwei- Kaiyei Kalpipu, Jesu Christaei ngamne Dunpuei chimyerpiya phawurbi kale kalhonne manklu uklumya phakur thimi rapnungei chethi aya mayepithunglei.

² Dunpura heirou kaiyei Pu Jesura klei kaiyei shingkhei heiyei ngamne nanungei kringpi kheile kyingya thimni leipiniyasu.

Dunpuei Ungthutpi Heirou Aiyei Kning

³ Upawane Aiyei thang'alya heirou lhangaiya siruk urmalnanungei kaya ungthutpikur heiyei shingkhei ngamne kane ringeinung Dunpuya shak kmu thimi khoine ringnanungei kaiyei changbomthuk nammaya Dunpuei khying thang'allei mantrangni kanungei piwurla.

⁴ Heinakrimne kanungei Aiyei kantompiwurkhou man kluei hutthul rapya Ane piwurla, heitoubi anaksi hutthul rapbei ngamne maangyerkur kya tlaipangpallei madu raprouwei nane kartleikur manerou, heitoubi nane Dunpurei youkna kyingei rongchanya siruk dongmalnarou.

⁵ Heisi toubine ngam heinung'tlim nane raphabine kaiyei uklumnara lhangaiya martumlhakyerlak; lhangainara shingkheiya martumlhakyerlak;

⁶ shingheinara kai ukning manphopyerlak; ukningya manphopnara kanthramkhei hoiyerlak; kanthram heinara tharmu klei lhakbanglak;

⁷ tharmu kleiyei lhoura teinaorap hoinei kringpi kheiya leiyerlak; heirou teinaorap khoiyei kringpikhei heiyei doura malungshipikhei leiyerlak.

⁸ Lhourap ari kaiyei leibomthuk thangrap, heirou nane heinaksi thang rapya thimni leiyanungri, thangrap heini naya Pu Jesu Christara kaiyei shingkhei heini krakle kalhonne lhangaiyei lhoutou thimirap hoiyerrou.

⁹ Heiya heinaksi thangya mak thimirap heiri tlatnara muphachangmak mitdeo thimi hoiyura, heirou aya hallei borh'rouwei kukpiwurkhou heiya mumakni malummurla.

¹⁰ Heiyanungri keiyei teinaorap, Dunpune naya ungthutpikur heirou Aiyei kningni khalthutpikur heiwaya kaidoura chutmakni klei hoiyernanungei nane krakni lhou toulak; heisi toulanungri, nane kouniroukhi kaiyei uklumya hil kallengurmakrou.

¹¹ Heisitoubi naya kaiyei Pu heirou Kalpipu Jesu Christaei klui naimak Krung ramra changnanungei chimyerpikur heiya phayerpirou.

¹² Heisitoubi keine lhoubomrap heiyei ngamrou nane mukurya hoiyanungkhi, heirou kaiyei phaloukur chim heiyei doura nane chetni mayungkur hoiyanungkhi keine naya kheenserou ningthutyerlei.

¹³ Heitoubi keine ringleiyenri lhoubomrap heiyei ngamrou naya ningthutyernanungei kai ukningya thoubangpini chimrousame toubi keine ningchalei.

¹⁴ Kaiyei Pu Jesu Christani keinungei shunpikur heinakni, keiyei trimkur kya sharung awari khrangni hiyeirou touri keine ningmulei.

¹⁵ Heiyanungri, manileiyen, keine hiwurhillou ramphane lhoubomrap heiya nane kheenserrou ningthutnanungei lamya keine nanungei mutkhourou.

Christaei thangya Mitni Muthungni Tloumayung Thimirap

¹⁶ Ngamri tlaipang thimiyei sheemthutkur warirourei thibine kaiyei Pu Jesu Christaei Mane-mantrangle kalhonne yongrou younei tlou rapya nanungei yunpikuri nimak. Heiya kaimitni Aiyei thang'alya muwurla.

¹⁷ Heirou pawa Dunpune Aya rikrai khrumyei kaalnung heirou thang'al piyei kaalnung, thang'allei Pu Umpune atoubi yukpaobi “Awari Keiyei kringkna Chanapawa hakme, heirou Aidoura Keine beimak malung khrahwura!” toubi yunyei kaalnung bi heirou kakhi heiklei.

¹⁸ Kane Upawakou khyingei lhungdoura pulne leimalnayei kaalnung hou heiya Thangmunrei yukpaokur heiri kanekhi loumayek.

¹⁹ Heingamei thimkhui rapbei shunthutpikhou paolaarap heiya kane tangni malungamlei. Heini nane tlou heiya lhangaini ninglhakna'nungei toulak, ngamri tlou heiri kmehya waaryerpina meishar naksi, heirou kul kabongyen waaryerpibi klei, kai ukningya ningshunnei Kafla naksi.

²⁰ Heinaksi nam'rouwei nane lamkrine ningthutlak touri Khyingei Lailikrei shunthutpikur tlourap heiri thimi hukhatnikhi aitamtom mallengthut manimak.

²¹ Kouweiyo toulanungri, thimkhui rapbei shunthutkhou paolaa heiri khatchatomkhi tlaipang thimi rapbei kning hilthungni shunthutkhou nimak, heiya thimi rapne Dunpurei kyong paolaa rapya shunthutpiyei kaalnung, yayari Lhawai Khyingni yai ukning kulchalbine yunkyer.