2 CHAANLAM 7 - KHYINGEI PU'TLOU Bible (BSI)

Pucheem Makatnei Thang'al

¹ Asinungri Solomon'ne shunchakurya luilhakwur heirouri nungthourei mei yongdabine, meira pumne hongnungei malam putle, heirou makat put rapkhi kaangtlummurchi, heitoubi Umpuei thang'alni Pucheem namma karyoune omthimkur.

² Heirouri suipipu rapri Pucheem rilla wachang manemakura, ngamri Pucheem heiwari Umpuei thang'alni bil thimkur.

³ Heirou Israellei chanaorap nammane thangwanrei mei yongdabi heirou Umpuei thang'alni Pucheem doura yongdakur heiwaya loumukur heirouri, Pucheemyei yuntlangmaira yaiyei lu sikhuplhakbine Umpuya khrumchabi heirou Aya mathangbi kyun, “Tanghakpani Ari lhangai, kouweiyo toulanungri Aiyei malungshi-kringpikhei heiri klui naimaklei.”

Malamput Rapya Makatkur

⁴ Heirouri Krungle, thimirap nammane Umpuei maibongra malam putya makatkur.

⁵ Heirou Krung Solomon'ne halpa lishing somnile khnile yao lishing machale somni malamput khoine makatkur. Heisitoubi Krungle, thimirap nammane Dunpuei Pucheemya makatkur.

⁶ Heisitoubi suipipu rapne ai'aiyei watlhou bomra mayungbine leiyeinung, Levia rapnekhi Krung David'ne Umpuya mathangnanungei toubi sheemthutkhou phung-dar hutshu rapya shinbine mayungkur, heitoubi yane, “Aiyei malungshi-kringpikhei heiwari klui naimakleime,” toubi yunbine mathangkur. Heisitoubi suipipu rapne Levia rapbei mairone mayungbine pengkul khungeinung, Israelrap nammane kanthoubi mayungkur.

⁷ Heisi toubine Krung Solomon'ne Pucheem maibongrei klei yuntlangmai pakna heiwaya marthingthutbi makathutkur, heitoubi bi heitamrou ane malamput rapya pumne meira hongbine, heirou malung damna makat put rapbei anyao rapkhi meira hongbine makatkur; ngamri Solomon'ne kulshanni sakur khrahpal heiwari pumne meira hongbi makatput raple trunwailung makat put raple, heirou anyaorap heiri bi heitamrou changmakur.

Pucheem Makatnei Knei

⁸ Heisitoubi Solomon'ne heiyei kheenrou tlaini eninibil Knei tlunkur, kheen heirou Israelrap nammakhi akou kalhonne, Lebo Hamath'roueine Egyptbei Wadi kungban waphaei klei thimi rapkhi thimi chungwane knei tlunnara wachangkur.

⁹ Heisitoubi yane tlaini eninibil knei lhunbine khrahpalya Dunpuei watlhou makatbine Knei tlunkur, heitoubi chotni tlung tlainirouri yane luilhaknei kulyom kartilbi marngeikur.

¹⁰ Heirouri tlun'eni tlung tanglaei somnile khyum tlung tlainirou Solomon'ne thimi rapya ai'aiyei khuiluphi cheemranung shalyerkur, heirouri yane ukningra hakraone shalkur, ngamri Umpuei malungshi-kringpi kheiya Krung David'nungle, Krung Solomon'nungei heirou Aiyei thimi Israel rapnungei lhangaine mutpikur.

Umpu ne Solomon'nung Mukandangyerkur

¹¹ Heisitoubi Solomon'ne Umpuei Pucheem sabaangkurya, heirou aiyei Krungkulya sabaangnara aiyei manrangkur lhoulam namyerwaya lhangaine luilhakchibi, Pucheemrei watlhou rapkhi namma luilhakwurla.

¹² Heirouri Umpune masanung Solomon'nungei mukandangyerbi anungei shun, “Neiyei shunchakurya Keine mayekpila, heitoubi bi awaya Keiyei malamput makatna Cheem khat khoine khalthutdurla.

¹³ Kounakpi Keine nungthou cheemkhar thungurbi nung royermakuryei kheenrou, nimanung kounakpi Keine khaorul rapya ram heiwaya shaitumna'nungei chay piwuryei kheenrou, nimanung kounakpi Keine Keiyei thimi rapbei doura phar thraine chansher dayerkuryei kheenrou,

¹⁴ heirou Keiyei thimi rapne Keiminya ungbine, yaitamne ukning hungbi marnimni Keinungei shunchabi, heitoubi Keiyei mairungya raphabi yaiyei lhangaimak lhourei ukning holthutlanungri, thangmunrei Keine ninglhakpirou, heirou yai borhya kukpirou, heitoubi yai ramya damyerpirou.

¹⁵ Asinungri Keiyei mitmingbi, heirou Keiyei khnane bi arouwei shunchakurya ninglhakpirouwa.

¹⁶ Kouweiyo toulanungri, Pucheem awaya Keine khalthutdurbi, bi arou klui naimakne Keiminya phunkhounanungei toubi makatdurla; heitoubi Keiyei mit'thril heirou Keiyei solungri bi arou chutmakne leipirouwa.

¹⁷ Heitoubi neinungeiri, kounakpi nai pawa David'ne Keiyei chay piwurkhou hilthungne lhou toukhounaksine, nangnekhi Keiyei pikur chaytlou nammaya chanthungbi, Keiyei Pu'tlouwei lammit raple, heirou kulyomyei lammitrap nammaya ngakbi chalanungri,

¹⁸ heiyanungri Keine nai pawa David'nung, ‘Israel rapbei doura Pu khoine palyernungei neinungei thimi watyermakrou’ toubi shunbi kantompikhou hilthungne Keine neiyei Krungbomya phunbaangpirou.”

¹⁹ Heiya kounakpi nani mai kallekthutdurbi, Keine neinungei malanthutkhou Keiyei Pu'watlhouwei lammit raple, Keiyei chaylam rapya khingurkhoubi dei thrailha rapya watlhou touwurbi khrumla'nungri,

²⁰ heiyanungri, Keine nanungei piwurkhouna ram'rouwei Keine naya phukthutdurbi, heitoubi Keiyei minnung'tlim makatkhou Pucheem awakhi phukthutdurbi Keiyei mithrilnarouwei Keine khingthutrou, heitoubi heiwaya thimi rapbei hangra yailim tlou khoine yunrilkna wari hoiyerrouwa.

²¹ “Heitoubi choune mathangbaangkhou Pucheem awari, huhune heiyei pongra heiraalyeinung mulhakbine, ‘Koutoubi Umpune ram aei doura, heirou Pucheem heinungei heisi toupikurawo?’ toubi kngakne yunrilheirou,

²² Heirouri yane, ‘Yai pawa rapbei Dunpu, yaya Egypt'rouwei yenruithutpikur Umpuya lakkurkhoubi, heitoubi thrailha dei rapya loulhakurbi, yaya khrumbi watlhou touwurnei ngamrou, heinaksi klah'knang heirou mrimyei lhouya yaidoura yongdayerkurame’ toubine yunrilheirou.”