2 CHAANLAM 3 - KHYINGEI PU'TLOU Bible (BSI)

Solomon'ne Jerusalem'ra Umpu nungei Pucheem Sabaangkur

¹ Heirouri Solomon'ne Jerusalem rilla, Moriah Lhungdoura, Umpu'nungei Pucheem khat sabaangnanungei wairangkur. Bi heiwari Umpune aiyei pa David'nungei kandangyerpikur Jebusia Ornan'yei phailouei cha umna ruitlai bikhat.

² Heitoubi Pucheem heiwari ane Krung hoiyeikaal phalitam tlung kummei, tlun'khni tlung tanglaei, khnini tlung tlainirou sabaang waiyoukur.

Pucheem Rong Tang-chou, Heirou Heiyei Putchei-Heengrorap

³ Heirou Solomon'ne Pucheem sabaangna cheemrong heiri- lamkriyei holmarkhekhou heiwari, dungrari thong somruk shaang, heirou homrari thong somni marya.

⁴ Heitoubi cheemmun heiyei yuntlangmai heiwari cheemphu heiyei homle pak malknane thong somni maryalei, heitoubi cheem heiyei chounarari thong machale somni choulei. Heitoubi cheem heiwari ane sina khyingne rilla namma lupbaangbi mansamkur.

⁵ Heitoubi cheemphu heiyei rillei bomthorap namma heiri karyoune uchal heengpikne lhopbine, heitoubi heiyei doura sina khyingne heilhopbaangthu, heitoubi heiyei doura kangoina lharap yeekbaangbi, heiyei doura sina khrulruini hanui heimansambaangthu.

⁶ Heisitoubi cheemphu heiwari karhilne thlungkwaar thulbaangbine mansamkur. Heirou heiyei sinarap heiri Parvaim ramrei sinathil.

⁷ Heisi toubine Solomon'ne cheem heiwaya dourei khangyalkhi, shumtrum heeng rapkhi, raapthangrakhi, heirou heiyei cheemkhar rapkhi namma sinane lhopbaangbi mansamkur. Heitoubi ane raapthangra Cherubim lha rapkhi yeekbaangkur.

⁸ Heitoubi ani yerrouwei khyingduina bomtho khatkhi thungkhaibi sheemkur; heiyei dung heiwari cheemphu heiyei homle malknane thong somni marya, heirou heiyei homkhi thong somni paaklei; heirou bomtho heiwari sina khying talent machathruk changne lupbaangbi mansamkur.

⁹ Heitoubi hemphopnanungei thirmsui sheemna sinari shekel somngabil tlung. Heirou shangkai dourei bomtho rapkhi sinane lhopbaangbi ane mansamkur.

¹⁰ Heitoubi ani Yerrouwei Hyingduina bomthoei rilla Cherubim sheembine, heitoubi heirapya sinane lupbaangkur.

¹¹ Heirou Cherubim khat'khatdei sha pangkhat-khatra thong phanga-phanga shaangyerkur; heitoubi sha msur heiwane raapthangra wa'tlungkyer; heirou Cherubim khat'khatdei sha msurrap heiri khatdei sha msurra karchurilkyer.

¹² Heisitoubi Cherubim khatpayei sha msur heiwakhi raapthangra wa'tlungyer, heirou sha thong somnga shaang msur heiwakhi lamkriyei Cherubimei sha msurra karchurilkyer.

¹³ Heisitoubi Cherubim khintamei sha rapne thong somnibil mherpakbi, heitoubi yaiyei ho rapne mayungbi Cheemphuei bomtho lhangra mai hollhakbi mayungyerkur.

¹⁴ Heirou ani khmongdup kimle, mraosot kimle, heirou mraosan phaikhringne yarkhalna phiyeng yekbine, heitoubi heirapbei doura Cherubimei lharap thutbaangkur.

¹⁵ Heitoubi ani Pucheem heiyei maishukra shutlai khintamkhi thong somthumle phanga choune sabine bunbaangkur, heitoubi shutlai khat'khatdei bungra lu khoine mtumkhi thong phangasol tangne sheembine dunbaangkur.

¹⁶ Heirou ane sina khrulrui'naksine riengbine, heitoubi shutlai lu rapbei doura yarbaangbi manthuisundakur, heirou ane pohei lha rapkhi machakhat sheembine heirapya sina khrulruira riengbaangkur.

¹⁷ Heitoubi ane shutlai rapya Pucheem maibongra, khatpane thya lhangra, heirou khatpane thyoi lhangra toubi bunbaangkur, heitoubi thya lhangrei heiwari “Jachin” heirou thyoi lhangrei heiwayane “Boaz” toubine min thulkur.