2 CHAANLAM 10 - KHYINGEI PU'TLOU Bible (BSI)

Rehoboam'yei Doura Israel Rapni Yanemakne Raal Youkur

¹ Rehoboam'ne Shechem'ra kawura, ngamri Israel rapne Shechemra aya Krung hoiyerna'nungei wairangkur.

² Kheen heirouri Nebatyei chanapawa Jeroboam'ne pao heiwaya mayekbi, (heiyei kheenrouri Jeroboam'ne Krung Solomon'yei bom'rouwei trukwurbi Egyptra yulbine leikur), ani Egyptrei yenkallengkur.

³ Heisi tounarouri yane thimi heimalhetbine Jeroboam'ya wa'ungyerkur. Heirouri Jeroboam'le kalhonne Israellei thimirap nammane wabi, heirou yane Rehoboamnung atoubi wakyun:

⁴ “Neiyei pawane kanungei putkhrit khangbangurkhoula, ngam heineri, neipawaei kanungei nanbangurkhou putkhrit awaya loushundawurlaklo, heiyanungri kani neiya watlhou toupiroume.”

⁵ Heirouri Rehoboam'ne yanungei loushun, “Tlaini khyumni leibi keileinara hanui wathuniya.” Heisi toubine thimi rapne kallengbi shaalkur.

⁶ Heirouri Krung Rehoboam'ne aiyei pawa Solomon'ne ringei kheenrou aya watlhou sempipu yama upa rapya murilbine tlou kartongrilkur, heirou ane kyun, “Nane keiya thimi rapnungei koutoubi mallangyerkni leilei? Keinungei bei shunmtupilak!”

⁷ Heirouri yama upa rapne anungei loushun, “Kounakpi nangne yanungei lhangaine, heirou kringpi kheine toupibi, heirou lhangai-marnimei tlou yunlanungri, yane klui naimakne neiyei shok hoirou.”

⁸ Heiya Rehoboam'ne yama upa rapbei anungei sempibi shunmtupikur tlou rapya lakkurkhoubine, akou tangmalkna aiyei lingthral rapbei, heirou aya watlhou toupi douwa raple hanui murilthubine tlou khalrilkur.

⁹ Heisitoubi ani yanungei shun, “ ‘Neiyei pawane kanungei nanbangurkhou putkhrit awaya lousundawurpilak,’ toubi wakyun thimi rapnungei nane keiyari kouroubi louyunyerkni? Keinungei bei shunmtupilak.”

¹⁰ Heirouri akou kattangmalkna aiyei lingthral rapne anungei atoubi loushun, “ ‘Neiyei pawane kanungei putkhrit khangbangurkhou, heiya nangne kairouwei putkhrit awaya louthutdurpilaklo,’ toubi wakyun thimi rapnungei nangne: ‘Keiyei hutmyung mandicha ane kai pawaei shintlakyakhi duine thalei!

¹¹ Heirou asinungri, kai pawane nanungei putkhrit khangbaangkhoume toulanungri, keineri heiwaya duine hanui lhakbaangbi khangbangthurou; heirou kai pawane naya shangkrui cheini umbi raakkhouwanungri, keine naya chogkhene chikyerbi raakrouwa,’ toubi louyunlak.”

¹² Heisitoubi thimi rapne, Krungne yaya khyumni tlung tlainirou wathungeiyalo toubi loushunpikur hilthungne, Krung Rehoboam'yei leinara hanui wachangthu.

¹³ Heirouri Krungne yanungei thuithine loushunkur, ngamri ane yama upa rapbei shunmtupikur tlou rapya khingurkhou.

¹⁴ Heirou ani aiyei lingthral douwa rapbei shunmtupikur tlou rapya hilthungne, “Kai pawane nanungei putkhrit khangbangkhou, heiya keineri heiyei doura hanui lhakbangthurou; kai pawane naya shangkrui cheikhukni umbi raakkhou, heiya keineri naya chogkheni chikyerbi raakrou,” toubi ani louyunkur.

¹⁵ Heisitoubi Krungne thimi rapbei wakyun tlouya ninglhakpimakur, kouweiyo toulanungri, awari Umpune Nebat'yei chanapawa Jeroboam'yei ngamrou Shilonia thimkhui Ahijahnung shunthutdurkhou Umpuei tloulhang rapya chimne hungtlung'yerna'nungei toubi Dunpune touthutkur lhouthuk khat.

¹⁶ Heirou Israellei thimirap nammane, Krungne yai wakyun tlouya ninglhakpimakurame toubi mukur heirouri, yane Krungnung shun, “Kane David'rei phabomthuk kou'siruk kleiyo? Kaiyei phabomthuk sirukri Jesse'yei chanao raprei koukhatkhi maklei; Israel thimirap, asinungri mimiyei cheemra kallenglaka, David'yei chanapawane aitamtom Krung hoithunglakasu!” Heisitoubi Israellei thimirap nammane ai'aiyei cheemra kallengkur.

¹⁷ Heiya Rehoboam'ne Judah'yei Krungkul rilla leithungkur Israel rapbei doura Krung khoine paalbi leikur.

¹⁸ Heirouri Krung Rehoboam'ne nambine watlhou pangnabi klei thimi rapbei doura lhousilla pu upa khoiyei klei Hadoram'ya Israel thimi rapbei leinara heimalhetnarou, yane aya thlungni lounanghatkur. Heirouri Krung Rehoboam'ne sapuk kaarira tungbangurbi, heitoubi Jerusalem'ra trukkur.

¹⁹ Heisitoubi Israel rapne David'yei cheemkhur-bommaiyei doura angtu rampha yanimakne raal youbi leileihui.