1 TIMOTHY 4 - KHYINGEI PU'TLOU Bible (BSI)

Chimmak Tlou Shunthut Thimirap

¹ Asinung Lhawaini asitoubi yunpilei touri hillouri thimi rapne yai uklum heiwaya lakurkhouna trum hungthukeirou; heitoubi yane mandal lhawai rapya, heirou Satanyei shunmatupi rapya hil chanthungeirou.

² Heinaksi marnopirap heiwari mandal thimi rapne lhangai kansabi yunthutkur tlourap, heirou yari yaiyei mulhakna ukningra meira roushakur thirmsuini martamnarei hikur thimi rapnaksi.

³ Heinaksi thimi rapbei shunmatupikur heiri, uklum thimi rapne malungambi chimya mubine, heirou yane mathangle kalhonne Dunpuei yapikur hilthungei nu'klou, heirou cha'kmai put heirapya chimmakme toubi yunthingbine leilei.

⁴ Kouweiyo toulanungri, Dunpuei sheempikur put namyerwa heiri lhangaithil, heirou put namyerwa heirapya mathangnei shunchale kalhonne loulhaklanungri khingurnungei koukhatkhi yaomaklei,

⁵ ngamri put namyerwa heiri shunchawurnei ngamrou Dunpuei tloulhangni marthingpibi Anungei loulhak kya hoiyerwurla.

Christa Jesuei Lhangai Shok Khat Khoi

⁶ Anaksi shunmatupinei tlou rapya teinao rapnungkhi shunpilanungri, neiyei chanthungbi klei chimmei shunmatupikur uklumnei tloura, heirou heiyei doura nangne ringbi lhawaiyei lamra nangri Christa Jesuei lhangai shok khat hoirou.

⁷ Heiya yunbinekhi koukhatkhi karsukmak phabni sheemthutbi klei warirap, heirou tharmu yaomak lhou raprouwei nangne tlatni leiyalo. Heitoubi neimsha neitamni Dunpura lhawai kyaowei chaanra leinanungei marnolak.

⁸ Tlaipang sharungei khoine marnoloukur heiri beicha tungcharou, heiya lhawaiyei lamra marnoloukur heiri angtuei chaanrakhi, heirou hillei hungrou kyou chaanrakhi khintamrek tungcha hoinanungei kantompiwurla.

⁹ Asitoubi yunthutkur ari uklumle kalhonne loulhak kya chimmei tloubom khat.

¹⁰ Kouweiyo toulanungri, angtu ramphane kane klah-knang doubi lhou kalni churbi leilei, ngamri kaiyei malungam ari thimi namyerwayei touri lilkhoine uklum thimi rapbei Kalpipu hoibi klei khring Dunpura khoulei.

¹¹ Anaksi shunmatupinei tlourap, heirou marnopikur heirapya yanungei shunpilak.

¹² Thimi hukhatnekhi neiya douwame toubi mandine thi'msityermak, heiya neiyei tlouyunnara, lhouchur-lhoupaangnara, malungshinara heirou khyingei chaanra uklum thimi rapbei maibongra yai mulouheina bom hoiyerlak.

¹³ Keine neileinara wabongyenri, nangne Khyingei Lailikya sherthutpinara, lhangai Pao-laaya shunthutpinara, heirou marnopinara thimi rapnungei lhouchil thimi khat khoine leiyalo!

¹⁴ Thimkhui rapne shunpikhouyei kaalnung, heirou Church'yei hutthul heiya nangne lhouhoipimakri toumak.

¹⁵ Neiyei lhoutou heiwari maibong lhangra chaleime toubi thimirap nammane munanungei, anaksi lhoura lhawai kyaoni neimshane pilhakbine lhou toulak.

¹⁶ Neimshane mukheine leiyalo, heirou neiyei shunthutpi tlou rapya nangne chetne churphoplak. Heitoubi lhourap heiya karyomni toubi leiyalo, ngamri nangne lhou heiya toubi leiyanungri, nangne neimshayakhi heirou neiyei kyunya ninglhakur thimi rapyakhi khintamrek kalpirou.