1 TIMOTHY 3 - KHYINGEI PU'TLOU Bible (BSI)

Church'yei Lhou-Urpu Uparap

¹ Kyun ari chimhakme: Thimi hukhatne Church'yei lhou'ur upa khat hoiniyanungri, a heiri lhangaiyei lhou toukni thimi.

² Church'yei lhou'urpu upa khatdei chaanrou klallei lhoutou thimi hoimakrou da: a heiri nu khattom klei thimi hoirou da, ukning khnim heirou ai'msha-aitamya ukning manphopchang thimi hoirou da, mukhei thimi hoirou, miram-mithrillei thimi rapnung picha-pimai khei thimi hoirou, a heiri mideiya shunmatupi khei thimi hoirou da;

³ a heiri tul malipmak thimi hoirou da, nimanung ngaal'ok thuktermak thimi hoirou, heiya ukning khnim heirou kying thimi hoirou da; a heiri tuy paamkalmak thimi hoirou da;

⁴ napawa heiri aiyei bommaiya karbilni kulchalbi heirou aiyei chanao rapya lhou kantangrou aiyei kyun chanthungkyer mane thimi hoirou da.

⁵ Kouweiyo toulanungri, aiyei bommai'ya thilhak manemak napawa heini koutoubi Dunpuei Church'ya ruichingpi manerou?

⁶ Napawa heiri uklumnara rongtlung thimi hoirou da, heineri akhi napal touwurbine Satanyei malhimnara dakurkhi kya.

⁷ Napawa heiri Church'rei purakhi thimi deinikhi rikrai khrumkna thimi hoirou da, hei nimanungri ayari thimi deini thinimakni ilthutdurbi, Satanyei chaang kamnara mankurkhi kya.

Church'ra Lhou Churtrungpi Thimirap

⁸ Heinakrimni Church'yei lhou'urpu upa hoibi klei Deacon rapnekhi ukning khnim heirou karbilni lhouchur thimirap hoirou da; yane darkha yuira kraothuk thimirap heirou tuyra khramtang thimi hoimakrou da;

⁹ Muyerkur uklumnei chim tlou rapya yane karbilni shinphopla toubine mukheine leirou da.

¹⁰ Yayari lamkrine uklumya martambine thirirou da, heitoubi yaya watlhou touyerrou da.

¹¹ Heitoubi yai nu rapkhi chorit lhangai napuiyarap hoirou da, heirou miya yuncharilcol napuiya hoimakrou da; yakhi lhou kantangrou ukning khying heirou yaitamya ukning manphopchang napuiya hoirou da.

¹² Church'yei Deacon rapne nu khat-khattom klei thimirap hoirou da, heitoubi yaiyaiyei bommai'ya heirou yaiyaiyei chanao rapyakhi karbilne thikulmane thimirap hoirou da.

¹³ Heinaksi Deacon rapne yaiyaiyei watlhouya lhangaine toukur thimirap heiri yai mayungbi klei Christa'ra uklum heiyei ngamrou yane krakni yunthutchangrou.

Muei Klei Dunpuei Tang Tlou

¹⁴ Keine chethi awaya mayekurle kalhonne keine neileinara khrangni waneleime.

¹⁵ Heiya keine kounakpi theengni warou dawanungkhi, neinungei chethi ane muyerlei touri kousitoubi kane Dunpuei Cheemlhoura touri, cheemya mardoubaangbi klei, heirou shutlai hoipibi klei khring Dunpuei Church'ra watlhou tounanungei lamya mutpilei.

¹⁶ Dunpuei kning muei klei tlou heiwaya shunthutpinarou thimi hukhatnekhi yamakri manemaklei. Upawane sharung khoine muyerwurla, Aya Lhawaini chim thimi khat khoine mutdurla, heitoubi Thangring rapne Aya muwurla. Upawaya tlaipang lim kounakei maibongra shunthutdurla, Tlaipangpal karyouni Aya uklumwurla, heitoubi Aya Thangmun'ranung loubaangpiwurla.