1 SAMUEL 7 - KHYINGEI PU'TLOU Bible (BSI)

Philistia Rapbei Hutrouwei Lhukthutkur

¹ Heirouri Kiriath-Jearimrei thimi rapni yubini, heitoubi Umpuei Mardingpina Theengkung heiwaya yulouheikur; heitoubi lhungdou ramrei Abinadabei cheemwaira urlhakloukur, heitoubi bi heirou yani aiyei chanapawa Eleazar'ya bom lhakbini marthingthutpibi Umpuei Mardingpina Theengkungya watlhou silnabi thikulyerkur,

² Heirou Theengkung heiwari Kiriath-Jearim'ra kum tlani khoukur, heiwari kum somnimal leikur, kheen heirouri Israel rapni Umpuya ungbi chapni kanrilkur.

Samuel'ne Israel Rapbei Doura Picharpu Khoini Paalkur

³ Heirouri Samuel'ne Israelrap namyerya atoubi kyun, “Kounakpi nani Umpunungei naiyei ukning-lhawai namma kyaoni hollhaklanungri, heirou naihangrei klei miramrei thrairap, heirou Ashtaroth thrailha rapyakhi louthutdurbini, naiyei ukningya Umpunungei kalleklhakbini Ayatom nani khrumlanungri, Ane nayari Philistia rapbei hutrouwei lhukthutpirou.”

⁴ Heisi tounarouri Israellei chanao rapni yaihangrei Baal thrai raple, heirou Ashtaroth thrai rapya louthutdurbini, yani Umpuyatom watlhou toukur.

⁵ Heirouri Samuel'ne kyun, “Israel thimirap nammani Mizpah'ra khultillaklo, heitoubi keine nanung'tlim Umpunungei shunchapirou.”

⁶ Heirouri yani Mizpah'ra khultilbi, heitoubi yani tuysir shukloubini heitoubi Umpuei maibongra yuikhying bunsundabi khrumchakur; heitoubi heiyei tlainirouri yani chara yilbi chamak-maimakni ngeibi leikur. Heitoubi bi heirou yani kyun, “Kane Umpuya karhani borhlhou touwurkhoula.” Heisitoubi Samuel'ne Mizpah'ra Israel rapya pichar toukur.

⁷ Heirou Philistia rapni, Israelei thimi rapni Mizpah'ra kartilbi leiyurame tounei paoya mayeknarouri, Philistia rapbei yama krung rapni Israel rapbei doura karhani raal dananungei Mizpah'ra kakur. Heirouri Israel rapni pao heiwaya loumayeknarouri, yani Philistia rapya chiwura.

⁸ Heirouri Israelei thimi rapni Samuel'nung shun, “Kanung'tlim kaiyei Dunpu, Umpuya shuncha dongpimaklo, heiyanungri Ane kayari Philistia rapbei hutrouwei kalthutpirou.”

⁹ Heirou Samuel'ne nu mongbi klei yaoshuncha khat loubini, heitoubi Umpunungei malamput khoini pumni meira hongbini makatkur; heitoubi Samuel'ne Israel rapnung'tlim Umpunung chapni ungraochabi shunchapikur; heirouri Umpune aiyei shunchakurya loumallangpikur.

¹⁰ Asinungri Samuel'ne Umpunungei malam putya pumni meira hongbini makatbi leiyei kheenrouri, Philistia rapni Israel rapya raal dananungei heikarnaklhakura. Heiya Umpune tlaini heihakrou Philistia rapbei doura lhimnung-marthee fyouwurbi, marwanni yaihangra tamungyerkur; heisitoubi Philistia rapni Israel rapbei maibongrouwei biso-bibalkhi naimakni trukchekkur.

¹¹ Heisitoubi Israel rapni Mizpah'rouwei wathukbini, heitoubi Philistia rapya chanthungurbi Beth-Car yudani hulsundaloubi lamtlunthung yaya hatdurpi.

¹² Heirouri Samuel'ne thlung khat khulbini, heitoubi Mizpah'le Jeshanah'yei tlakra thlung heiwaya bunbini khoukur, heitoubi heiwayei min ‘Ebenezer’, toubine thulpikur; ngamri ani kyun, “Bi asibil yu'tlungni Umpune kaya trungpiwurkhou.”

¹³ Heisitoubi Philistia rapya kul chalwurbi namsundakur, heirouri hanui kallengni yani Israel rapbei ram rikarchunna ramruira kachang manimakkura. Heirou Samuel'ne ringleiyenri Umpuei tanti heiwari Philistia rapbei doura norkur.

¹⁴ Heirouri Philistia rapni Israel raprei lungbi lukloukur khukarthilrap namyerwa heiri Ekron'rouweini Gath waphani hanui mallengurthu; heitoubi Israel rapni Philistia rapbei hutrouwei yaiyei rikarchunphop ram nammakhi hanui lukmallengkur. Heitoubi Israel raple Amoria rapbei tlakrakhi kyingni yakantlangrilbi paalkur.

Samuel'yei Watlhou

¹⁵ Asinungri Samuel'ne aiyei chaan khatrekrou Picharpu khat khoini watlhou toubi leikur.

¹⁶ Heisitoubi ani kumserrei khoini Bethel'ra, Gilgal'ra heirou Mizpah'ra thangknaini yenchaheibini, bi kantangrou Israel rapya pichar yentouheikur.

¹⁷ Heiya kheenserrou ani Ramahra yenkallengkur, ngamri bi'heirou aiyei cheem klei. Bi heirou leibini ani Israel rapya pichar toukhou. Heitoubi bi heitamrou ani Umpunungei khrahpal khatkhi sabangkur.